الموضوع: هل أنت راضي عن أداء عربيتك الألنترا 2012 الجديدة

المشاركة الأصلية كتبت بواسطة se_coralsea

أن شاء الله سيتم أعادة تنسيق الموضوع بحيث يتم نقل المشاركات الخارجة عن السياق الي موضوع ملحق أو حذفها حسب أهميتها أو فائدتها

نيجي بقي للتعديلات اللي حضرتك بتتكلم فيها بالنسبة للألنترا :
أنا شايف أن العربية كده كويسة لفئة من الناس بتستخدمها كسيارة تنتقل بها من النقطة أ الي النقطة ب بدون الحاجة الي الجري و الشد و أفتراس سيارات أخري

- تعديل العفشة : موضوع التورشن بيم مش شايف منه مشكلة لواحد مش يتاع شد و غرز و بالعكس أنا مقتنع تماما أن الالنترا الجديدة افضل في الثبات عن الالنترا hd كما ان العفشة أنعم و تماثل عفشة الكورولا المعروفة بنعومتها

- الكابينة محتاجة فعلا تعديلات في الخامات و أضافة شاشة دي في دي و جي بي أس ده هايرفع تمنها في حدود من 6000 جنيه الي 10000 جنيه

- قوة الموتور كويسة جدا بالنسبة للمستخدم العادي لكن لو محتاج قوة زيادة عندك الالنترا بالمحرك الجديد (جي دي أي) وفر بنزين مع قوة تصل الي 140 حصان و فيه طرازات منها بتنزل بمحركات أكبر 1800 سي سي بس طبعا في مصر أنسي علشان الجمارك

- الباور أنا مازلت مصر أنه كويس جدا و بيعطي ميزة هائلة داخل المدينة في المناورة و الركنة و في الطرق السريعة جيد جدا و أنا شخصيا عندي ثقة في العربية دي أني أخد ملف علي 140 كم/ساعة لكن أكثر من كده يبقي تهور حتي في اي عربية مع طرقنا الجميلة

- الفرامل العادية بتاعتها ممتازة و عن تجربة و بشهادة حق من اصدقاء معاهم أوروبي و ياباني جربوا العربية معايا و برضه للمستخدم العادي اللي بيمشي في حدود سرعة معقولة محددة بحالة الطرق و الكثافة المرورية

بأختصار العربية كده كويسة جدا للمستخدم العادي بس ياريت سعرها ينزل عن كده لكن أي تعديل أضافي هايرفع سعرها بشكل كبير

يعني مثال صغير .. شوية الاضافات اللي عملتها في العربية :
- الجي بي اس و الكاميرات و الشاشة : حوالي 4700 جنيه
- الفرش الجلد اللي حسن من شكل الكابية كتير : حوالي 2000 جنيه

و مرة أخري بأكد أني راضي عن أداء العربية بالنسبة لأحتياجاتي و متطلباتي بنسبة تقارب ال 80 %

عندك حق الواحد مركب شوية أكسسوارات مكلفة شيء وشويات وانا راجع من السفر المرة دي جبت معايا الديفيوزر الخلفي اللي بفتحتين شكمان شكله تحفه وللأسف ضاع في المطار وعملت بيه محضر وهتشل لأن تمنه لوحده 1500 جنيه أوريجينال كوري والمشكلة الكبيرة مش في تمنه المشكلة أنه مش موجود في مصر بس مش خسارة في عيون الألنترا وبردوا أنا زيك راضي عن العربية دي وفيها كل اللي نفسي ألاقيه في عربية ماعدا شوية ملاحظات زي العفشة وجودة الخامات وعجلة القيادة تبقى أفضل من كدة .

الكل بيتكلم عن خامات التابلوه انا مش شايف فرق بين خامات الالنترا واى عربيه يابانى فى نفس الفئه بالنسبه لجلد التابلوه الموتور ناعم يماثل نعومه التويوتا ويتفوق على الانسر بالاضافه الى 130 حصان اعلى من التويوتا واللانسر والنيسان وحتى الاوروبى مثل سكودا فى القوة الحصانيه لنفس الفئه الصالون واسع جدا سحب العربية ممتاز طاره متعدده الوظائف والخليجى منها بينزل بشاشه تاتش سكرين تعمل راديو وفيديو وجى بى اس وده مش موجوده فى كل اليابانى فئه 1600

السلام عليكم ورحمة الله وبركاتة

الحمد لله انا من ملاك العربية اول فئة اوتوماتك توكيل عامل بيها لحد دلوقتي 20000 ك

العربية ان شايف انها صفقة ممتازة و انا مستريح للعربية جدا مع بعض التحفظات

نبدأ اولا بالمميزات علشان نفتح النفس كدة

1- الشكل الخارجي الرياضي بالنسبة للعربية السيدان كان معادلة صعبة و الالنترا حققتة بجدارة و انا كنت لما بشوف العربية دي ماشية اول ما نزلت كنت بتوهم و بعد اكلمها اكلمها و اقولها يخربيت جمالك زي اخونا الي كاتب في اول المشاراكات.

2- الموتور الـ 130 حصان و الفتيس الاوتو الـ6 سرعات ادائهم عالي جدا و فوق الممتاز

3- الوسع الداخلي و ووسع اشنطة اكثر من ممتاز

4- اول فئة بها اشارات بالمريات, طارة متعددة المهام, كرسي السائق يتحرك حركة اضافية الي اعلي و الي اسفل لضبط الارتفاع و هي ميزة مهمة جدا, حساس علي مفتاح الكونتاكت يقوم بفتح السنتر و اضائة نور الصالون اتوماتك عند اطفاء المحرك و اخراج المفتاح, نور الصالون 2 لمبة واحدة امامية و اخري خلفية, جراب نظارة شمس, لمبة في كل شماسة + مراية - بصراحة شايف كل دة دلع و ابوشن حلوة انها تنزل في اول فئة.

5-قوة مروحة التكييف اثتثنائية عند السرعة الرابعة تحس ان التكييف جبار "لي ملاحظة علي التكييف هذكرها في العيوب".

6- ارتفاع السيارة مناسب جدا و لا تحك الا في مطبات قليلة و عند تخميل اوزان كبيرة.

العيوب

1- العفشة الخلفية تورشنال بيم و ليست مالتي لنك و هي بالنسبالي اقوي عيب ظاهر في السيارة و بحس بية خصوصا لما بيكون في طريق منحني و العربية بتاخد مطب بسيط او الطريق مدردر العربية بتنط نطة خفيفة من ورا "بس مع الوقت بتأقلم نفسك مع العربية".

2- الكلاب ولاد الكلاب الي بيطلعو ينامو علي سقف العربية عرفوني ان الصاج بتاعها خفيف و السقف لما اتطبق و اتعرج زعلت جدا.

3-التكييف - انا شكرت قبل كدة في مروحة التكييف و قوة التكييف - بس في حاجة لو ما كانتش موجودة كان التكييف بقي اقوي من كدة كمان و هي ان المسار الي بيمشي فية الهوا المكيف "Air Duct" قريب من حاجة سخنة او مصدر حرارة من المحرك لان لما بتكون طافي التكييف و فاتح الزرار الي بيسمح بدخول الفريش اير و انت ماشي العربية بتحدف عليك هواء سخن او اول ما بتشغل التكييف بطلع دفعة هوا سخن.
و دة طبعا بيضعف التكييف و لو كان معزول كويس او مش قريب من مصدر حرارة كان بقي اقوي.

4- عدم وجود انظار بالسيارة وخصوصا في الظروف الامنية الي البلد فيها اليومين دول و انا كنت كلمت التوكيل من زمان قلولي لو انت قافل العربية بالريموت و حد جة دورها حتي لو بمفتاح هو مطلعة علي المفتح الاصلي كمبيوتر العربية مش ها يرضي يدورها لانها ما اتفتحتش بالريموت الي اتقفلت بية
عربيتي موديل 2012 و انا شايف بعض الزملاء بتتكلم عن انظار في ال2013 بصراحة ما عنديش معلومة ممكن يكون غبور طور نفسة.

5- عدم وجود ABS و Air bag علي الاقل واحدة للسائق في اول فئة و خصوصا ان الحجات دي بقت من اساسيات الامان مش كماليات مع العلم فرامل اعربية العادية اكثر من ممتازة.
و الف شكر لصاحب الموضوع و كل الزملاء علي مشاركتهم المفيدة

من يومين عملت صيانة ال 20 ألف للأمورة وركبتلها نظام الحماية الجديد وبصراحة العربية على الرغم من أني معملتش صيانة ال 15 ألف الا أنها كانت زي الفل وسحبها ممتاز ودلوقتي بعد الصيانة السحب أتظبط كمان ... هأعملكم تقرير مصور عن صيانة ال 20 ألف وتركيب نظام الحماية الجديد بالأسعار والتفاصيل النهاردة بأذن الله .

العيب اللى لسه عندى ان استهلاك البنزين لسة عالى مش بينزل عن ١١ لتر كل ١٠٠ كم غير كده العربية تمام و انا عمل ٤٠٠٠ كم

العربية بالرغم من قيادتى المحدودة ليها من بعض الاصدقاء لان للاسف موش من مالكيها بعد الارتفاعات الجنونية الاخيرة بس معاى اختها الصغيرة ههههههههه الار بى الالنترا عربية رائعة واعتمادية بكل المقاييس
وعلى فكرة تم ادخال بعض التعديلات على نسخة 2013 سواء فى الالنترا او الار بى
وبالنسبة للعايشين فى وهم الالمانى واليابانى وتكنولوجيا السيتنات دى فالمستقبل لتكنولوجيا هيونداى وسيارات هيونداى
وان شاء الله اكون فى القريب من ملاك جميلات جميلات أيلى ( الالنترا يعنى )
حد يبدل يا جودعان اربى 2013 بالنترا 2012 :)