التدخين مضر بالصحة ويسبب الوفاه

كلمة بنسمعها كتير لكن محدش جربها غير المدخن
معلش الموضوع ممكن يطول شوية بس عشان الناس تستفيد
والموضوع دا مش عشان اعلن عن حاجة معينة انا يادوب هحكي علي كفاحي عشان اسيب التدخين لعل وعسي حد يفكر يعمل زيي

العمر:22 سنة

بداية التدخين :من وانا عندي 16 سنة :(
يعني 6 سنين بدخن

عدد العلب المدخنة يوميا :كانو من 3-4 علب في اليوم لحد اخر محاولة للاقلاع بقو 2 علبة

عدد محاولات الاقلاع :4 مرات

طبعا مش هقول اصحاب السوق والكلام اللي احنا عارفينو دا كلو لان دا مش موضوعنا
موضوعنا لما يبقي شاب زيي بيطلع سلم بيتهم بيموت
اللي هما 16 سلمة
اني ببقي في مناسبة مع اهلي هموت وتخلص عشان ادخن
او اني اتعصب علي حد جامد عشان مدخنتش
او
او
او
كل الكلام اللي بيوجع الراس دا

الحكاية وما فيها اني خلاص زهقت من التدخين عاوز اعيش حياتي شوية بقي انا شعري ابيض وحسيت اني عجوز من جوايا وعاوز احس شوية باني شباب

ومش هيعرف معني اللي بقولة غير المدخن

قررت اكتر من مرة اني اسيب بس فشلت
من 5 ايام جه في دماغي طيب انا هسيب بقي دلوقتي التدخين اللي كنت فاكرة اعز صديق ليا بيقف دايما جمبي في كل حاجة
طبعا عشرة طويلة وقعدت افكر
طيب بعد كدا هقف في البلكونة اعمل اية
لما اتنرفز هعمل اية
ولا مفيش احلي من كباية البيبسي مع السيجارة والهيدفون واحلي اغاني بليل ....الخ
قلت خليها علي الله
طيب منا سبتها ورجعتلها
كنت سمعت قبل كدا علي دوا بيتباع واستحرمت فيه الفلوس قلت خزعبلات وبمبلغ وقدره
جه يوم ووالدتي كانت بتتصل بالصيدلية قولتلها اساليهم عليه بكام تاني سالت وقالتلي اجيبهولك فكرت قولتلها لا بلاش
وخلاص وطبعا حزين في نفسي اني مجربتش
ومن عند ربنا الصيدلية اتصلت تاني وقولت لوالدتي خلاص هاتيه
وجه
وطبعا فرحتي متتوصفش
انا كنت بدخن علبتين ال ام احمر ب 20 جنية في اليوم (دا لما خففت كنت حريقة في الاول)
يعني في الشهر ب600 جنية حرام والله
هكتبلكم هنا في الموضوع كل يوم بيحصل اية معايا لعل وعسي اشجع واحد انو يسيبها

اليوم الاول:

خدت اول حباية
جه المعاد اللي المفروض اشرب في سيجارتي حسيت اني مش عاوز
جه المعاد اللي بعدية بردة مش عاوز
شربت سيجارة حسيت ان مش هي دي السيجارة اللي انا عارفها
واتارية المخ بيحاول يقنعني ان الدوا ابتدي يجيب مفعول
قلت خليني في وهمي احسن يمكن احاول ابطلها
اول علبة سجاير لسة فيها 14 سيجارة

اليوم التاني :

صاحي تمام
جريت اخد الدواء
اتنرفزت من اول حاجة معنها كانت صباح الخير
وطلع من اعراض الجانبية للدواء
فضلت مقتنع ان الدوا جايب نتيجة وكل ما اشرب احس اني مش عاوز وان السيجارة اتغيرت
التاثير الوهمي طبعا
خلص اليوم واتبقي معايا 3 سجاير من علبة امبارح

يعني بدل ما اشرب 4 علب في اليومين شربت علبة واتبقي منها في اليومين

اليوم التالت

خدت الدواء
المزاج معتدل
مليش نفس اشرب سجاير اصلا وطلع مفعول الدوا مش بتوهم فرحت
قلت مش شارب ورميت العلبة وكتبت علي الولاعة للذكري الخالدة
بعد شوية حسيت اني عاوز اشرب قولت هووب مش شارب عند مع نفسي
الاحساس بيزيد قولت مش شارب يعني مش شارب
بقي كل ساع كدا يجيلي الاحساس اني عاوز اشرب لمدة خمس دقايق ويروح تاني
بقيت عامل زي المدمن
دقني طولت
لقيت سيجارة
فضلت ماسكها وبكلمها
تعملي فيا كدا لية دانا حبيبك مش كدا عيب
فاكرة لما كنا بنقعد بليل مع بعض ونسمع اغاني
يختي حلوة
فاكرة لما كنا بنقعد مع بعض اول ما اصحي الصبح وانتي الل كنتي بتخليني افتح عيني
يختي كميلة
يختي سكر
طيب بتعملي فيا كدا لية بقي
وفجاه ما لم اتوقعه ابدا صداع رهيب
وبدات ازعق للسيجارة
واشتمها
البيت افتكرني اتجننت
رحت قولت اية اللي بعملة دا
دخلت اتوضي وصليت لاول مرة من مدة كبيرة
عدي اليوم وبقيت ملتزم بالصلاه وبدعي ربنا انو يتوب عليا منها

اليوم الرابع :

معاد تغيير الجرعة
اخدت حباية الصبح
ماسك نفسي مش هشرب يعني مش هشرب
اكتئاب غير عادي وبعديها بقيت مبسوط بغباء
وحصل نفس كتالوج اليوم التالت
بس الاختلاف اني بقيت جعان بطريقة بشعة اكل مفيش فايدة جعان يا ناس
لدرجة فطرت ربع كيلو جبنة و 4 بيضات و 6 رغيف بلدي :D:D:D
الغدا مكنتش بحب اللي اطبخ فمسكت نفسي ومكلتش
جه العشا انقضيت عليه زي المجانين
واخدت الحباية بتاعت بليل ونمت

اليوم الخامس

اللي هوا النهاردة
اكتشفت اني مينفعش اسيب السجاير اليومين دول :(
عشان لو سبتها هرجعلها بعد ما الدوا يخلص
يعني لازم اشرب في اول اسبوع -اسبوعين لحد ما الدواء يكرهني فيها عشان مرجعش تاني
جالي اكئاب غير عادي لاني كنت فرحان اني مشربتش بقالي يومين
وهرجع تاني ليها
وحاسس ان مجهودي راح
نزلت اجيب سجاير وشربت غصب عني ومكنش ليها أي طعم
وكنت ندمان اني شربتها
ودا لحد دلوقتي

وان شاء الله بليل ههكي علي اليوم وكل يوم هوافيكم علي الاحداث
لعل وعسي حد يكون عاوز يبطل ونشجع بعض زي بلاد برة ونحكي
واي حد عندة استفسار عن أي حاجة يكتب
انا مردتش اكتب اسم الدوا لحسن حد يفتكرني بعمل عنه اعلان او الادارة تقفل الموضوع