تجربة صيانة ال 80,000 للكورولا 2009 في التوكيل

**emad_elnegmy** · 12-05-2012 05:23 AM

السلام عليكم...

أنا كنت محتار إني اروح التوكيل اعمل الصيانة ولا اجيب كل الحاجة اصلي واعملها بره (اخر صيانة عملتها فالتوكيل كانت ال 40,000). اتكلت على الله وقلت اعملها فالتوكيل وفي دهيا الفلوس، اهم حاجة راحة البال
اول موصلت التوكيل سألت المهندس المفروض ايه اللي بيتغير، قالي اللي بيتغير كالتالي..
زيت موتور وفلتر
زيت فتيس
زيت فرامل
فلتر هواء
سير
مياه رديادير
المفروض فلتر البنزين
قلت له يعني ايه المفروض فلتر البنزين؟!! قالي ممكن يتغير الصيانة الجايه علشان هو غالي شويه (800 جينه)..قلت له مياه الرديادير المفروض تتغير اول مره عند 160 وبعد كده كل 80 وده اللي مكتوب فالمانوال بيتاع العربية...!! قالي طب خاليني اراجع جدول الصيانة، وعمومان هي مش هتفرق علشان سعرها 30 جينه بس..سألته عن البوچيهات؛ قالي بتتغير عند ال 100 (ليه ده اللي ملتزمين باللي مكتوب فالمانوال!!!)
المهم الصيانة هتكلف 1,850 جينه بدون فلتر البنزين طبعا.
قلت له عاوز اغير فلتر البنزين والبوچيهات علشان انا بعمل الصيانة كل 40,000 و لو جيت الصيانة اللي جيه هتكون عند 120,000 إنشاء الله.
غيرت فلتر التكيف بالمره علشان انا مغيرتهوش خالص قبل كده، والتيل الامامي والخلفي كانو محتاجين يتغيره.
لبست في فلوس كتير اوي، بس الراجل عمل واجب معايا وعملي خصم 5% على قطع الغيار بعد مصعبت عليه. كانت التكلفه كلها 4,600، وتفاصيل الأسعار هتلقوها تحت.
بعد مستلمت العربية، الحمد لله شعرت بتحسن كبير؛ صوت الموتور اصبح اكثر نعومه بعد تغير السير، والسحب اصبح افضل بعد تغير البوچيهات وفلتر الهواء وفلتر البنزين، والتكيف اصبح افضل بكتير بعد تغير فلتر التكيف، واصبحت العربية اكثر نعومه فالطريق بعد تربيط وتظبيط العفشة.
عمومان انا انبسط من العربية الحمد لله بعد الصيانة بغض النظر عن السعر الكبير.
اسعار قطع الغيار....
فلتر الزيت. . . .50
فلتر الهواء. . . .130
السير. . . . . . 500
فلتر البنزين. . .800
التيل الامامي. .400
التيل الخلفي. . 450
فلتر التكيف. . 353
البوچيهات. . . .424

إجمالي المصنعية بالضريبة 784 جينه

انا قلت اشاركم تجربتي، واتمنى اني اكون افدكم حتى ولو بجزء بسيط

**Ahmod** · 12-05-2012 03:02 PM

الف مبروك واكيد طبعا هتحس بفرق للافضل

ولو ان اسعار قطع الغيار غالية جدا جدا !!

بوجيهات ايه اللى ب 424 جنيه دي !! ؟ اكيد فيه حاجة غلط

وكذلك السير كتيييييير اوي 500 جنيه !!

وماغيرتش زيت الفتيس وزيت الفرامل ليه ؟ ؟ ولا اتغيرو ؟ ياريت لو اتغيرو تقولنا على سعر كل واحد فيهم وايه نوعية الزيت المستخدمة

**midnightman_74** · 12-05-2012 06:19 PM

توكيل فرع أية؟؟؟

**emad_elnegmy** · 12-05-2012 08:36 PM

الله يبارك فيك ياباشا
هو فعلاً الاسعار غالية جداً، بس هي ده الاسعار لو انا جبتها اصلي من اي موزع بره ولا لأ؟
هو الظاهر ان زيت الفرامل متغيرش @: علشان مش مكتوب فالفاتورة، وبالنسبة لزيت الفتيس (M/T mobile 75 W) وسعره (2.2 * 58) 127 جنيه

**emad_elnegmy** · 12-05-2012 08:38 PM

الصيانة كانت في فرع التجمع الخامس اللي على الدائري بجوار هوندا

**asemx1** · 13-05-2012 12:39 PM

ايييييييييييييييييييييييي ه ؟؟؟؟؟؟؟؟؟؟؟؟؟؟

طب ما قولتليش ليه وهعملهالك الكلام دا بنص التمن ههههههههههه وهكون كسبان وهتمشى مبسوط اخر حاجه

سير المجموعه عامله 100 جنيه بره
تيل الفرامل 330 جنيه بره الامامى الخلفى معرفش
بوجيهات اصليه ب 100 جنيه و ngk الى بتنزل فى التويوتا ب 50 جنيه
فلتر التكيف اعرف انه غالى بس اكيد مش كدا
فلتر الهوا اه اغلى 20 جنيه

تحياتى لك .... م/ عاصم جاد