السلام عليكم اخواني واخواتي اللي باعتز بيهم وبآرائهم

انا ابني في الصف الثالث الاعدادي
امتحانه بعد بكرة

الولد مستواه الدراسي متفوق وتحصيله ممتاز
التيرم الاول الولد كان بياكل الكتب اكل
كان بيسهر وبيصحى بدري وكان مصمم انه يجيب فوق 95
الامتحانات كانت كويسة جدا
كان كل يوم ييجي فرحان ويقول لي قفلت
وبيحكي لي على زمايله اللي بيغشواا
اقول له اوعى تكون بتغش .. يقول لي لأ باغشش بس
قلت له لا ولا تغش ولا تغشش محدش ياخد مجهودك وتعبك

الامتحانات عدت وكنت حاطة في بطني بطيخة صيفي انه يوم ما يقل هيبقى 93
اتفاجئت الولد جاب 85
وزمايله اللي غشوا كلهم جايبين اكتر منه

اتصدمت والولد جاله احباط وانا ما كلمتوش ولا كلمة عشان انا شايفة اد ايه هوا تعب
ولما كنت باراجع معاه كنت بالاقيه ماشاء الله لا قوة الا بالله ممتاز جدا
قلتله خلاص سيبك م اللي فات وخلينا في اللي جاي

دلوقتي الامتحان بعد بكرة
الولد التيرم دة معندوش حماس خالص للمذاكرة
مش بيذاكر ربع التيرم الاول
محبط جدا .. بيقول لي مانا تعبت جدا التيرم الاول واللي غشوا جابوا اكتر مني يبقى فين العدل
ومهما جبت مش هاحصل ال 90 حتى

زهقان جدا مش طايق يذاكر
وعمال يلف حوالين نفسه في الشقة

مش عارفة اعمل ايه
حد يشور عليا
ازاي ارجعله ثقته بنفسه
والحال انقلب و المقصر هوا اللي بياخد حقه
المنظومة مقلوبة زي ما اتعودنا على طول مفيش حاجة اتغيرت