حكايتى مع ...... التوماتييييييييييييييكى

**hosamsief** · 19-05-2012 04:42 PM

مساء الفل على احلى اعضاء .... فى احلى منتدى....
مبدئيا انا بقالى كام يوم كده بعيد عنكم ... علشان كان عندى شوية مشاكل فنية فى الشبكه العنكبوتية ...
المهم ... من كام يوم كده لاقيت اخو صاحب الشركه بيقولى هتروح التوكيل الفلانى اللى فى الحته الفلانية هتلاقى عربيتى مع سواق مخبوطه و استلمها منه و دخلها التوكيل ... قولتله حاضر سعادتك ... و ذهبت الى هناك و انا هفرقع .... المهم لاقيت السواق ده واقف قدام التوكيل و بيدينى المفتاح و بيقولى كده بقى شكرا الحق اروح انا .. و كلم المهندس الفلانى ( اللى هو صاحب العربية ) علشان يبلغه انى اخدتها منه ..
العربية كانت مخبوطه خبطه غبيه فى الفانوس الورانى و باب الشنطه و الاكصدام ..
المهم دخلت التوكيل .. لاقيت مهندس الاستلام .. بيبص على العربية و متأثر اوي ... و قالى طيب احنا محتاجين نرفعها و بعدين نعمل مقايسه الاصلاح
و قد كان ... و قام رفعها .. و اتكلم شويه مع الاسطاوات و الاستشاريين و قالى اتفضل ياباشا معايا على المكتب ...و قام جايب ورقه و قلم و شويه حسابات و اكصدام امامى ( مع انه اصلا سليم ) و خلفى و باب شنطه و حوارات ... المهم عمالى مقايسه طويله عريضه زى كيس المخدة .. و تنح شويه قدام الاله الحاسبه و قالى .. يبقى تسعه تلاف و خمسيمت جنية بدون الفيبرة اللى فوق الاكصدام ... ... فرديت علية و قولتله .. ثوانى هكلم صاحب العربية و اخلية يديلك الاوكية .. كلمت الباشمهندس .. و قولتله هتتكلف تسعـــــ و لسه هكمل لاقيته جاله ذبحه صدرية و قام حازق و قالى ليييييييييييييييييييييييي ييييييييييه ... مع شوية حركات مش ولا بد ... المهم قولتله و انا مالى يا عم ؟؟ خد المهندس اهو معاك يكلمك ....
المهم من هنا لهنا وصل معاه لسبعه و نص ... و قام مدينى التليفون .. و بكلمه قالى لا خدها و هاتهالى على الشركه !!!!!!!!!!
رديت علية و قولتله .. انا معايا عربيتى .. هسوق الاتنين ازاى ؟؟؟ قالى اتصرف .. المهم التوكيل ده كان جنب فرع للشركه عندنا .. قمت واخد عربيتى و ديتها الفرع ده و رجعت اخد عربيته ... هى ما شاء الله موديل 2010 كورى اتوماتيك ....
المهم قولت لبتاع التوكيل يطلعها برة .. علشان اخدها و ارجع ... و ده كانت اول مرة اسوق اتوماتيك .. المهم قمت متصل بواحد صاحبى معاه اتوماتيك فقالى حطها الى d و بنزين و فرامل بس ..قولت يا حلولى يا حلولى .. ماشى ..
و قمت متحرك ... طبعا انا واخد على عربيتى .. و فرامل عربيتى .. مثلا لما بحب اقف فى التحرير مثلا بفرمل من رمسيس ...... المهم بحط رجلى على الفرامل الاقى العربية كلبشت فى الارض و تقريبا كانت عاوز ترجع مارشدير .. و اسمع يا عم احلى زفه ورايا ... وقفت الشارع كله ورايا ...
خطوتين و ادوس فرامل الاقى العربية تتكلبش .. بقيت احسس بس على الفرامل بصباع رجلى الكبير .. بتهيألى لو كنت عطست كانت العربية هتزحف منى على الاسفلت .. المهم حبه حبه اخدت عليها .. و فجاة عربية وقفت قدامى مرة واحدة فقمت بكل تلقائية دايس على الفرامل برجلى الاتنين .. مأنا متعود بقى على الديبرياج .. المهم لاقيت نفسى قمت رازع فى الازاز من جوة و كنت هخرج من البربريز .. حاجه سخيفه بصراحه .. العربية ده واخدة كل حاجه جد كده .. قمت مشغل الانتظار و جبت شلل للى كان ماشى ورايا ...لغاية ما وصلت الشركه و ركنتها و حمدت ربنا انها جت على قد كده ....
و تانى يوم رحت اخد عربيتى من هناك و فضلت ماشى و هى مش عاوزة تزود عن 10 كيلو .. ادوس بنزين مفيش ... اتارينى كنت ماشى على الاول و نسيت انقل .... ساعتها بقى حسيت اد ايه التوماتيكى ده حلو بجد .

**Dr.cairoky** · 19-05-2012 04:51 PM

ههههههههههههههه

ضحكتنى والله ياباشا واليوم كان قافل معايا من الصبح

أجمد حاجه المدير اللى راح حاااااازق وهوا بيتكلم ده

**A7MED_PHARMA** · 19-05-2012 05:08 PM

ليا نفس التجربة ياحسام بيك مع الاتوماتيك

واحد صاحبي معاه أوتوماتيك..قلت أجرب بتتساق إزاي دي
كانت بومة

طبعا المانيوال .. إنت واخد إن رجليك الشمال دبرياج .. واليمين فرامل أو بنزين

تطلع تجري زي الفل ... زززززززززززززززززززز .. أجي أفرمل زي مانا متعود
رجلي الشمال ( ع الدبرياج) والميني على الفرامل ..
طيب دي مافيهاش دبرياج
لكن انا متعود إني لما أفرمل .. رجليا الاتنين بيشتغلواااا

ويشتغلو على لبنزين والفرامل مع بعض
أجي أهدي .. ألاقيها تقوم مكلبشة وتلزقني في القزاز القدماني
وحاولت أخد عليها ... ماعرفتش

واضح إن الدبرياج ده .. مكيدة من الطرف التالت بغرض قلب نظام الحكم

**ossamayk** · 19-05-2012 06:19 PM

أنا بقا حصل معايا العكس، لأن عربيتي وعربية الحاج اوتوماتيك واضطرتني الظروف ان اركب المنيوال بتاع عمي واديت العربية الأول وبعد شوية اسمع صوت عالي من الماتور وبعدين إيه ده؟
فين وفين افتكرت إني لازم أنقل ورجعت بالذاكرة 15 سنة للوراء عشان استرجع كل معلوماتي عن المانيوال لما كنت لسة بتعلم على عربية منيوال عشان معملش كارثة في العربية.
ولما كنت بأقف في أي إشارة لو سبت الفرامل ألاقي العربية ريحت على إللي ورايا وكلاكسات للصبح، طبعاً في الاوتوماتيك بسيب رجلي تمشي مش ترجع
على فكرة إللي بيسوف مانيوال سهل جداً يتعود على الأوتو وليس العكس لأن إللي متعود على الأوتو هيكره السواقة لما يركب مانيوال.

**Screenplays** · 19-05-2012 06:29 PM

هههههههههههههههههههههه فعلا الاوتوماتيك سواقته مش ظريفه خالص

**karim fathy** · 19-05-2012 07:02 PM

مثلا لما بحب اقف فى التحرير مثلا بفرمل من رمسيس

ههههههههههههههههههههههههه ههههههههههههههههههه

**Ralliart** · 19-05-2012 07:18 PM

أنا حصل معايا العكس ،الظروف اضطرتني آخد عربية 131 بتاعت واحد صاحبي مشوار والعربية كانت ماشية معايا على الطريق زي الفل ومفيش مشاكل بس لما كنت بقف في حتة زحمة وبالذات لو في مطلع كوبري كانت بتريح بغباء على اللي ورايا وكنت بنط برجلي من الفرامل للبنزين بسرعة علشان متريحش الاقي العربية هتخبط اللي قدامي...