الموضوع: ياترى ماندمتش بعد شرائك الصنى ؟؟!!!

المشاركة الأصلية كتبت بواسطة ramylancer

انا متضايق اوى من موضوع الردياتير المصرى .يعنى يحطوا كاوتشات بريدجستون يابانى ويحطوا ردياتير مصرى .الكاوتشات انا ممكن اغيرها بعد استلامها بساعه انما الردياتير اغيره ازاى

وهى يعنى كلمة مصرى دى كلمة ابيحة؟ ليه بنتعامل مع اى حاجة مصرى انها زبالة حتى يثبت العكس؟ هل سمعت اى شكوى من حد من ردياتير العربية؟

المشاركة الأصلية كتبت بواسطة ramylancer

مش ابيحه ولا حاجه بس كلنا عارفين ان العربيات اليابانى بالذات مبتسخنش خالص انا عندى مؤشر الحراره فى المنتصف دائما وابدا تحت اى ظروف تشغيل ومع اقصى استخدام فى احر الايام .دة انا فى 3 سنين مزودتش ميه قربه الردياتير غير مره واحده واخدت 250 ملى فى 60000 كيلواذا كانت كل دول العالم معملوش دورة تبريد جبارة زى دة .مصر هى اللى هتعملها

والعربية النيسان المجمعة محليا بالردياتير المصرى برضه مبتسخنش خالص وطوال الوقت المؤشر لا يتعدى تلت مشواره وليس نصفه حتى فى اقصى ظروف التشغيل(حر +زحام وحركة بطيئة+تكييف)، العبرة فى السخونة من عدمها ليست بلد صنع الردياتير وانما تصميم دورة التبريد بالكامل، بداية من جحم مسارات المياه فى المحرك الى سعة طلمبة المياه الى مساحة وسعة الردياتير، الخ، والشركة اللى عاملة الردياتير فى مصر مش مصممة ردياتير من دماغها وانما عاملة ردياتير طبقا للتصميم اليابانى وواخد موافقة من نيسان، يعنى الفكرة مش فكرة ان مصر هتجيب التايهة ، لكن فكرة ان الرداتير ودورة التبريد بالكامل متصممة فى اليابان، ولو الردياتير اتصنع طبقا للتصميم سواء فيما يخص الشكل او الخامات او جودة الصناعة يبقى هيشتغل زى اخوه اليابانى ،وبعدين المصانع المصرية اللى بتعمل سربنتيانت التبريد بتاعه تكيفات كارير وشارب وتوشيبا اللى بتشتغل سنوات عديدة جدا بدون الاحتياج لصيانة من اى نوع مش هتغلب انها تعمل ردياتير عربية طالما متصنع طبقا لتصميم مظبوط، مع العلم انك لما بتشترى عربية يابانى جاية من اليابان او عربية المانى جاية من ألمانيا فتأكد ان 50% على الأقل من مكوناتها جاى من الصين وكوريا وتايلاند وتايوان لوا كنات يابانى، وبرضه 50% من مكوناتها جاى شرق اوروبا لو كانت المانى، العبرة بأن الشركة بتستلم المكونات طبقا لشروط ضبط الجودة الخاصة بها وفى النهاية بيكون منشأ العربية اليابان او المانيا ، يا راجل ده المرسيدس الألمانى اللى بتتباع فى كل حته فى العالم فيها طنابير فرامل مصرى

نفسى نثق فى صناعتنا اكتر من كدة شوية