الموضوع: تقرير عن فورد فوكاس 2012

المشاركة الأصلية كتبت بواسطة s a m a

استاذ محمد حضرتك لو تقدر ياريت تعملنا موضوع مستقل باسعار كل فئات الفورد فوكس واكسسواراتها واسعارها

حاضر من عنيا انا ممكن اعمل موضوع اضم فيه اسعار فئات الفورد فوكس كلها وقطع الغيار والاكسسوارت كمان
بس اللينك اللي بعته الاستاذ يحيى فيه اسعار الاكسسوارات بالدولار من بره مصر فانا هاستأذنك يا استاذ يحيى بما ان انت كنت في التوكيل من يومين لو عندك اسعار الاكسسوارات عند الوكيل في مصر ابعتهالي يكون افضل لو مفيش هحط اللينك بتاع الاسعار بره حتى عشان الناس تعرف ايه هي الاكسسوارت المتاحة

المشاركة الأصلية كتبت بواسطة yehiaseg

اكتشفت ان الفانوس الخلفي فيه لدات ، وكمان العربيه بتدور المارش لوحده يعني الواحد بس يوصل المفتاح لاخر تكه ويسيب هيلاقي العربيه بتكمل دوران لوحدها ، زي التيوتا اليارس لو حد كان جربها .

الكلام ده عندك انت بس يعني؟؟ قصدي في الهاتش باك الجديدة؟ ولا عندي انا كمان؟

المشاركة الأصلية كتبت بواسطة mtak

ما شاء الله
ربنا يباركلك فيها و يعطيك خيرها و يكفيك شرها

---
موضوع رائع و قرأت 187 مشاركه ورا بعض

بصراحه انا مقبل على شراء سياره جديده
و كان نفسى فى حاجه عاليه عن الارض زى القاشقاى او الكيا بس لما شفت الهبل بتاع الاوفر برايس صرفت نظر عنهم نهائى ( اوصل العربيع الى 200 الف - ما انا اجيب بهم جيتا انضف و اقيم ) المهم

انا ناوى ان اخرى يكون 190
كنت رايح ناحيه الجيتا الجديده و الاوكتافيا
بس الجيتا خايف منها مش عارف ليه
اما الفانتازيا مضايقنى اوى ان موتورها من ساعة ما نزلت زى ما هو 102 حصان

الى ان قرأت موضوعك و رأيت شويه صور للاستيشن بتاعها بصراحه العربيه اسرت عقلى

اللى خايف منه هو استهلاك البنزين

انا استهلاكى للعربيه كتير - ممكن اعمل 150 كيلو / يوم
و معى تيدا ما شاء الله عليها مش تاعبانى فى الموضوع ده
ايه رأى حضرتك
---
ثانيا هى الاستيشن اطول و لا انا بيتهيألى

هل هناك حساسات ركن

اشكرك مرة اخرى

ربنا يوفقك يا باشا للاختيار السليم ان شاء الله بس ما تنساش اهم حاجة الاستخارة
بص عموما العربية ما شاء الله عليها ما فيهاش عيوب واضحة يعني يتقال عليها عيوب كبيرة نقدر نلخصهم في الاتي:
1- الصالون الداخلي متوسط يعني مش واسع ومس ضيق وفي رايي كان المفروض يبقى اوسع من كده شوية كانت هاتبقى افضل كتير وطبعا الاستاشن زي ما حضرتك تفضلت وقولت اطول واوسع شوية من السيدان

2- فيه نتشة بتحصل في الفتيس على السرعات القليلة كانت واضحة معايا اكتر اول ما جيبت العربية دلوقتي قلت كتير عن الاول معرفش انا اللي اتعودت عليها ولا زي ما بيقولو في التوكيل العربية في اول 1000 كم بتحفظ طريقة سواقتك وبتتكيف عليها ومع اني مش مقتنع قوي بالكلام ده انما عموما هي النتشة قلت عن الاول بشكل ملحوظ

3- هي المفضل ليها بنزين 95 انما ممكن تمشي ب 92 انما مش بنفس الاداء لكن مش هاياثر على الموتور بالسلب في حاجة هو بس هايقلل عزم العربية شوية وكمان التسارع وهايزود الاستهلاك شوية ده كلام الوكيل انما انا من ساعة ما جيبتها وانا بحط 95 ما جربتش فيها ال 92 الصراحة

هي دي العيوب الموجودة في العربية وبالنسبة لاستهلاك البنزين كان اول 1000 كيلو مرتفع انما دلوقتي اتظبط جدا وانا شايفه معقول قوي على عربية 1600 سي سي 125 حصان يعني هي بتعمل دلوقتي ببنزين 95 طبعا 230 كم في الصفيحة يعني لكل 20 لتر

وهي فيها بالفعل حساسات ركن خلفية

بس يا سيدي ولو عندك اي استفسار تاني انا تحت امرك وربنا يوفقك مرة تانية للاختيار السليم