الموضوع: عملية تصحيح النظر بالليزر

المشاركة الأصلية كتبت بواسطة حلواني

العملية دلوقتي اجهزتها اختلفت عن اجهزة زمان اللي بدئت بتشريط العين و بعدين بقى بالليزر بس لو العين اتحركت العملية تبوظ و هكذا . لا الاجهزة دلوقتي حاجة تانية .
انا عملت العملية من سنتين تقريبا ولو رجع بي الزمن ح اعملها من وانا عندي 25 سنة (السن المعقولة لعملها) لان حياتي اختلفت كتير فوي الحمد لله .
من ناحية تانية الدكتور المفروض يكون سايب نص درجة واللا حاجة عشان طول النظر اللي بييجي بعد الاربعين و القراية كمان .

الحمد لله على سلامتك
و لكن الأجهزة برغم تطورها مش حاجة تانية زى ما حضرتك بتقول
اما بالنسبة للنص درجة و ان بيجى طول نظر بعد الأربعين ، انا آسف فكلام حضرتك مش مضبوط لأن فيه ناس ممكن تتقبل النص درجة عادى و ناس حياتها تتقلب راسا على عقب بسببه ، و بعدين يا باشا مافيش طول نظر بييجى بعد الأربعين ، دى مرونة العدسة بداخل العين بتقل و بالتالى قدرتها على التكيف للقريب بتقل و بالتالى لازم نعوضه بالتدريج بنظارة قراءة ، و الحكاية دى بتبدأ من سن 45 و تنتهى عند سن 60 سنة و بنكون ساعتها ابتدينا نظارة القراءة من 1.75+ و انتهاء ب 3.00+
و اكبر مثال لأن العملية نتائجها مختلفة هو حضرتك سعيد جدا بها و الأستاذ محسن كره حياته بسببها ، فلا داعى للتعميم ، مش معنى انها كويسة معاك ان كل الناس اللى هاتعملها هاتنجح معاهم زيك

المشاركة الأصلية كتبت بواسطة Fadi Ezzat

طيب انا عارف واحد عندة 17 وعايز يعملها
عادى ولا لا

الأخ العزيز د/أبو سيف رده كان اكثر من رائع فى النقطة دى

المشاركة الأصلية كتبت بواسطة MM_Mohsen

اولا للاخت بوسى مين قال مين قال ان النظارة للبنات و الستات شكلها و حش بالضرورة ؟ اعتقد ان فى بنات و ستات لابسين نظارات و شكلهم جميل و جذاب .. المهم
اختيار شنبر جميل و ملائم لتركيبة الوجه و طبعا العدسة تكون فلنت مش " كعب كوباية " !! ..

كلام سليم ، و خصوصا ان النظارات الحريمى دلوقت بقت جزء من الأكسسوار زى الخواتم و السلاسل و الكوليهات الخ الخ

المشاركة الأصلية كتبت بواسطة MM_Mohsen

لا جدال ان فى تطور سريع فى الاجهزة الطبية لكن العين مكان حساس و الاجهزة لا تعمل بمفردها بل هناك اولا طبيب يستعمل هذه
الاجهزة و خطأ الطبيب وارد خصوصا فى مصر اللى ياما جراحين بتنسى الفوطة جوه و تقفل !!

والله موضوع خطأ الطبيب وارد و لكن مش هوه السبب فقط ، يعنى كل المشاكل اللى حطيت لنكاتها قبل كده لناس اجانب ، طب هو الدكاترة الأجانب بينسوا الفوط هما كمان فى بطن العيان ؟؟
المشكلة فى العملية نفسها ان لا يمكن التنبوء بنتيجتها 100% ، كل واحد و بخته

المشاركة الأصلية كتبت بواسطة MM_Mohsen

ثالثا : اجراء العملية كدة عمال على بطال حتى لصغار السن 17 سنه زى ما واحد قال او لمن نظرة اقل درجة او اثنين فشئ عجيب .. العملية مش لعبة
و مش دلع كتكحيل العين و الرموش فالنظر ممكن يتغير كل كام سنه فهل يعاود الانسان اجراء العملية طوال العمر ؟؟ .. و علما بأن النظر يتغير و يتحول
لبعد نظر بعد الخمسين و يحتاج الانسان لنظارة قراءه ..و اعتقد ان العملية مفيدة لمن يعانى من مشكلة ضعف نظر حاد و يحتاج لاستعمال نظارتين للمسافات و القرايه طوال الوقت ..

هنا دى المشكلة فعلا ، مع قلة التوعية الطبية و سوء الفهم و الأعلانات اللى بدون رقابة عمال على بطال الناس فاكرة انا زى تقليم الأظافر
و علشان كده بأكد ان لازم المريض يعرف كل حاجة بمنتهى الأمانة فبل الأقدام على العملية و هو حر بعد كده

المشاركة الأصلية كتبت بواسطة حلواني

في مركز حلو في مدينة نصر ناصية سيتي ستارز بس مش فاكر اسمه .
كان عندي 32 سنة . نظري كان 1.5 و 2 .
الزغللة الشديدة قعدت اربع تيام تقريبا بس كنت قادر اسوق بيها . و الزغللة العادية قعدت شهر يمكن دي عبارة عن هالات حوالين الاضواء العالية بالذات .
الجفاف مش بالصورة اللي الناس بتحكي عنها .. يعني انا استخدمت القطرة شهرين و بعد كده ممكن كل كام شهر احتاجها مرة .
انا باشكر اللي عملها قبلي و شكر لي فيها بصراحة لانه قال لي الكلمة اللي انا باقولها دلوقتي: لو رجع بي الزمن ح اعمل العملية دي اول ما تتاح لي الفرصة .
على فكرة كان معايا صديق عزيز نظره -10 عملناها في نفس اليوم و ماشاء الله دلوقتي لابس نظارة 0.5 (نص) بس .

شوف يا سيدى الفاضل انت عديت بجزء من المضاعفات و الحمد لله لم تستمر معك ، و لكن هل تضمن لى حضرتك ان انا مثلا لو عملتها المشاكل دى مش هاتفضل معايا ؟؟
خلينا نتكلم عن تجربتنا الشخصية بدون تعميم
و السؤال الأهم بالنسبة لى ، هل اخبرك طبيبك المعالج بكل هذه الأحتمالات قبل العملية ولا لأ
بالنسبة لصديقك فالحمد لله على كده لأن 10.00- مش من المحبذ اجراء العملية أصلا لهم الا لو سمك القرنية عنده حاجة محترمة ليه و للزمن ، و اخيرا ما هو لابس نظارة برضه ، رفيعة او بيقدر يقلعها و لكن برضه لابس نظارة !!!
حمدا لله على سلامتك و سلامة صاحبك
و ربنا يوفقنا جميعا لما فيه الخير و لما يحبه و يرضاه
و تحياتى

استاذ حلوانى
بعد التحية
اسمح لى اقابل هجومك الحاد و اتهاماتك لى بابتسامة ، مش تهكم او استهزاء لا سمح الله ، لك كل الأحترام فى ردك و رأيك ، و لكن لأنى كنت متوقع هذا الرد من فترة و لكن من أحد الزملاء فى المهنة ممن يؤيدون هذه العملية مثلا ، و لكن حماسك قوى جدا
و اسمح لى ارد فى نقاط عليك كما فعلت معى

المشاركة الأصلية كتبت بواسطة حلواني

شكرا على التعليقات . اسمح لي واضح من تعليقات حضرتك على كلامي ان حضرتك ليك هدف واحد انك تكره الناس في العملية :) انا ما اعرفش الحافز بتاعك ايه لكن ده شيء انا باشوفه كتير في شغلي لاني شغال في حاجات هندسية متطورة و باقابل ناس كتير رافضين الجديد لمجرد انه ما يعرفش تفاصيله كويس و لان معلوماتهم عنها واخدينها من ناس برضو مش متمكنة او سمعت عن الموضوع هي كمان . و دي ملاحظاتي على تعليق حضرتك عليا .

أولا انا مش باحاول اكره الناس فى العملية ، لو حضرتك تابعت مشاركاتى من ساعة ما دخلت فى الموضوع كل اللى طلبته ان الناس تعرف الحقيقة و هم اللى يحكموا ، كل واحد فينا بيعمل ابو العريف و يفتى بمنتهى الثقة و للأسف النصائح دى احيانا بتودى فى داهية ، انا ماقدرش افتى فى الحاجات الهندسية المتطورة اللى هى تخصص حضرتك لأنى ده مش مجالى و مش لمجرد انى جبت جهاز منهم و كان كويس يبقى الكل كويس ، لازم اسأل و استشير قبل ما اجيب الحاجة ، و مش كل حاجة تناسبنى بالضرورة تناسب غيرى
اما بالنسبة لأتهامك لى بانى ينقصنى العلم بالتفاصيل او ان معلوماتى واخدها من ناس مش متمكنة الخ ... فانا شايف ان اتهام حضرتك ده باطل و مجحف بحقى شوية ...
أولا انت ماتعرفش عنى او عن مركزى العلمى حاجة و حكمت على
ثانيا لو حضرتك قرات ردى على الاستاذ احمد فوزى تلاقينى اتعمدت ادخل فى التفاصيل الدقيقة للعملية و كيفية التصحيح و درجاته و اعتقد ان ده ممكن يبقى اثبات كافى لأنى مش جاهل بيها او باسمع كلام غيرى و اقوله زى البغبغان بدون فهم
ثالثا لو حضرتك كنت قرأت الموضوع كاملا كنت هاتلاقى انى قلت انى موافق عليها لو مافيش حل غيرها للمريض (و دى الحالة الوحيدة اللى باعمل فيها ليزك للمريض بتاعى) يا استاذى انا جراح عيون ، و بالتالى ماينفعش يبقى فيه جراحة ماقدرش اعملها ، و لكن لما المريض بتاعى يكون محتاجها ، مش مجرد انه عايزها و خلاص

1

المشاركة الأصلية كتبت بواسطة حلواني

. لما انا اكون واخد معلومة من اتنين دكاترة عيون واحد منهم صديقي و دكتور في جامعة الازهر و تقول لي حضرتك ان بعد الاربعين مش ح يحصل طول نظر يبقى على الاقل افتح مجال لاحتمال وجود الصواب في كلامي :)

آسف جدا جدا يا استاذى ، حضرتك هنا انت اللى سامع معلومات من حد و ذكرك ليها يعتمد على فهمك للى سمعته و سردك له بيكون من وجهة نظرك ، و لكن ده مجال عملى و تخصصى ، و لو حضرتك مش مصدقنى اتفضل بمنتهى البساطة و دون الخوض فى تفاصيل مهنية آدى لنك لشبكة طبية بيها قاموس طبى يشرح بصورة مبسطة تعريف صعوبة القراءة بعد الأربعين و اسمها Presbyopia و هاتلاقى انه بيطابق الكلام اللى انا قلته قبل كده و تقدر سعادتك تسأل اساتذتنا الموقرين اصدقائك عن مدى صحة كلامى من عدمه
تعريف
Presbyopia
2

المشاركة الأصلية كتبت بواسطة حلواني

. الاجهزة اتطورت و بقت حاجة تانية بكل تأكيد . لما الموضوع يكون بدأ انه بيعمل شرط في العين و لو العين اتحركت العملية تبوظ و يوصل دلوقتي انه الجهاز يتابع حركة العين و يكمل شغله اثناء حركتها يبقى اتطورت و بقت حاجة تانية .

حضرتك مدخل تشريط القرنية Radial Keratotomy مع الليزك ، دول حاجتين مختلفتين و عموما ، مش مهم ، لو قصد حضرتك ان الأجهزة دلوقت بتتابع حركة العين و بالتالى نسبة المضاعفات الناتجة من ان المريض حرك عينه مش موجود فتبقى حضرتك مافهمتنيش ، ان باتكلم ان الجهاز بيستعمل نفس المبدأ و هو شعاع الليزر بعد عمل فلاب فى القرنية و الجدل (فى الدراسات الحالية) بيدور على التأثير بعيد المدى لذلك على العين ، و ده لأن المشاكل دى بدأت تظهر بعد مرور 10 سنين على بداية الليزك ، و لو دخلت حضرتك على موقع FDA هاتلاقى انهم بدأوا دراسة جديدة لتقييمه لهذا السبب ، و عملوا موقع عندهم مخصوص لتلقى شكاوى المرضى اللى عملوا ليزك ، و ماعتقدش انهم هايعملوا الموقع ده علشان انا مش فاهم الليزك بيتعمل ازاى !!!

3

المشاركة الأصلية كتبت بواسطة حلواني

. العملية نتائجها مش مختلفة . اللي بيفرق (بعد توفيق ربنا) هو الدكتور و التجهيزات اللي بتتعمل فيها العملية . يعني انا عامل العملية و معايا صديق زي ما شرحت و كمان فيه واحد عاملها قبلينا بسنتين و هو اللي شجعنا و الحمد لله النتائج اكثر من ممتازة يبقى الحمد لله العملية عادية جدا و مش خطر . لكن دي زي اي عملية تانية في اي مكان تاني يعني لو دبيعمل حتى عملية الزايدة و مش فاهم كويس او الجهاز مش تمام و العيان جاله تسمم و مات يبقى ما نقولش ان عملية الزايدة خطر .

كل اللى اقدر اقوله ان زى مانت كانت العملية كويسة معاك غيرك كانت بشعة معاهم ، و صدقنى ان العملية كلها تقريبا بتتم بالكومبيرتر و دور الطبيب تقريبا فى استعمال الmicrokeratome و فى اجهزة حديثة ده كمان اوتوماتيك
و لو على تلمحيات حضرتك بعدم الفهم أو سوء التنفيذ فهل كل الحالات اللى حصلت فيها مضاعفات سببها العامل البشرى اللى هو الطبيب ؟؟؟ ده كده كلامك يناقض حتى اى نظرية احتمالات
و بعدين سامحنى يا استاذى الفاضل ، اذا كنت حضرتك بتحكم من الحالات اللى شفتها و تعرفها فواضح انك سيادتك نسيت ان ده مجال عملى و ان لو حضرتك شفت 10 مرضى فانا باشوف قدهم كتير فى اليوم الواحد و فيهم اللى عاملها و كويس و اللى عاملها و طلعان عينه

4

المشاركة الأصلية كتبت بواسطة حلواني

. حكاية ان طبيبي يقول لي على المضاعفات بيأكد اللي انا ذكرته في مجمل ردي . الفكرة دي قديمة من ايام لما كانت العملية بدائية شوية .. الدكتور ادانا ورق مطبوع فيه كل التعليمات و المتوقع ايه اللي هو الزغللة و الجفاف لمدة معينة و ده حصل فعلا . لكن مش مثلا انه احتمال فشل العملية او استمرار الزغللة لاخر العمر او صداع او حاجة من كده .

بدائية ايه و جديد ايه ؟؟؟
سعادتك اتفضل ادخل على مواقع المراكز اللى بتعمل ليزك (بره مصر) و يكون سمعتها محترمة ، و اتفضل اقرأ المضاعفات اللى هما كاتبين ان محتمل حدوثها ، و شوف بنفسك لو الحاجات دى لسه بدائية ولا لأ
مطلوب الأمانة فقط و عدم اخفاء الحقيقة

5

المشاركة الأصلية كتبت بواسطة حلواني

. انت بتقول ان صاحبي كده كده لابس النضارة اللي هي -0.5 و مش فارقة بقى ما هو كان لابسها لابسها و هو -10 . اسمح لي انا ادعو الله ما يبتليكش تجرب النظر في الدرجات اللي بعد -5 . مش عارف الموضوع محتاج اشرح واللا كده بقى واضح :) بس عشان يمكن حد يكون مش واخد باله ليني اوضح: عند -10 الواحد مش بيشوف حاجة . مش بيشوف ملامح الوجوه . مش بيشوف الدش و هو بيستحمى و لو الصابونة وقعت منه ما يعرفش يجيبها الا لو لبس النضارة . مش بيشوف حاجة محطوطة في الارض لو النور خافت في الشقة .. مش بيزل مية في اي مصيف . مش بيسوق او يروح كليته او شغله لو نضارته اتكسرت . ده كله غير وزن النضارة (حتى لو مضغوطة) . لكن عند -0.5 ده معناه انه يقدر يمارس حياته طبيعي جدا (انا لما كنت -1 كنت عايش طبيعي من غير نضارة) و بيبقى لابس النضارة عشان لو سايق بالليل يكون نظره تمام مش ناقصه حاجة .

هنا خانك تقديرك ، انا مقاس عينى 8.00- ، يعنى مش بعيد عن صاحبك ، و احيانا فى العمليات بالميكروسكوب (لما بتطول) باضبط الميكروسكوب على مقاسى و اقلع النظارة و طبيعى ان بارفع راسى وسط العملية و اشوف الناس اللى حوالى فى الغرفة ، الموضوع مش سوداوى بالشكل ده ، و باستحمى و الصابونة بتقع و باجيبها (مش باستحمى بالنظارة طبعا) ، و باصيف و بانزل البحر و البيسين من غير النظارة ، و مرة اتكسرت منى على كوبرى 6 اكتوبر و انا عند مطلع التحرير و روحت بيتى فى العجوزة من غيرها ، بصعوبة و لكن مش نهاية العالم زى ما حضرتك مصور ، و على فكرة ، وزن النظارة اساسا بيعتمد على اختيار نوع و حجم الشنبر اكتر من العدسات...

المشاركة الأصلية كتبت بواسطة حلواني

ارجو ما تاخدش كلامي على محمل شخصي انا هدفي الناس تاخد تجربتي بالشكل الصحيح دون تأثير او تغيير لمحتواها . مع كامل الاحترام لشخصك .

شكرا لك مرة اخرى ، و طبعا الخلاف فى الرأى لا يفسد للود قضية ، و ان كنت اتمنى الا تهاجمنى فى ما لا تعرفه عنى او تتهمنى باتهامات غير صحيحة ، لأنى لم اشكك فى كلامك بل ذكرت ان هناك حالات تكون جيدة مثلك و اخرى مثل استاذ محمد محسن ، و زى ماحضرتك بتتمنى يرجع بيك الزمن و تعملها فى سن مبكرة هو كمان بيتمنى يرجع به الزمن و مايعملهاش
كل واحد بيتكلم من وجهة نظره
و انا باتكلم من وجهة نظر طبية فقط ... باعرض الأمور على حقيقتها و لكل واحد مطلق الحرية (زى ما بقول دايما) ، و مش باقول سيبوها و تعالوا اعمل لكم كذا ، والله ماليش مصلحة شخصية
و اخيرا تحياتى و احترامى لشخصك الكريم
و تحياتى