الموضوع: عملية تصحيح النظر بالليزر

المشاركة الأصلية كتبت بواسطة MM_Mohsen

[SIZE="4"][SIZE="5"]دكتور شريف ردك بيبن انك Real Gentleman .. كالعادة فمازال الكثيرين منا فى مصر و العالم العربى ينظر للامور نظرة احادية .. مثلا هذه العملية لازم تكون
اما امنة ميه فى الميه او كارثه بالمطلق .. بينما عن تجربة شخصية و تجارب اخرين فالعملية لم تحقق الهدف منها و بعض الناس حصلت لهم مشاكل جامدة ... و العملية
كما تقول دوائر طبية بتشتغل فى الموضوع لا تصلح لجميع الحالات بل و مما قرأت ليس نفس الجهاز يصلح لكل مقياس نظر ..كما انى ايضا قرأت من قبل عن مراجعة
هيئات طبية عالمية فى الدول المتقدمة لهذه العمليات بعد مرور اكثر من عش سنوات لاعادة التقييم حيث ان هناك مشاكل او جوانب سلبية لا تظهر فورا بل قد تحتاج
لعدة سنوات .. يعنى الموضوع فى النهاية و كما قيل به نسبة مخاطرة مهما كانت نسبة نجاحها مرتفعة .. يعنى فى النهاية الموضوع مش لعبة او هزار لو لم يكن هناك داعى
او مجرد للظن بأن الشكل افضل بدون نظارة ..
بالمناسبة يا دكتور شريف عندما اجريت هذه العملية من 6 سنوات خيرنى الدكتور : هل اريد ان استغنى عن نظارة القرأءة ام نظارة المسافات حيث لا يمكن الاستغناء
عن الاثنين معا .. فهل مازال الامر كذلك حتى الان ؟؟ و ما رأيك فى وجهة النظر التى تقول ان اجراء زرع عدسة اكثر امانا و افضل من عملية الليزر او الليزك ..و هل سمعت عن قام بأجرائها
اكثر من مرة ؟؟ .. و تحياتى .

- بالمناسة صورة جراح العيون الذى اجرى لى العملية كانت فى الاهرام من حوالى شهر فى خبر عنه و هو بيحضر مؤتمر طبى .. و الباشا لسه لم يقوم بالعملية .. .و غالبا : لا .. و لم .. ولن يجريها .. و ايضا اثنين اخرين من كبارو مشاهير اطباء العيون المصريين الذين اذهب لهم فى الكشوفات العادية و لتغيير النظارة لم يجروا العملية .. يظهر فعلا باب النجار مخلع او اذا كان رب البيت بالدف ضاربا فشيمة اهل البيت .. etc!

اولا شكرا لمجاملتك الرقيقة
ثانيا سبق انى قلت لما لسانى نشف ان فيه مخاطر و مضاعفات و انها مش العملية السحرية اللى ترجع النظر و تخلى الحياة لونها وردى ، و قلت ان لازم المريض يعرف المخاطر اللى هو داخل عليها
و سبق و قلت كمان ان بيتم اعادة تقييم العملية بعد مرور 10 سنوات عليها و ظهور مضاعفاتها و مشاكلها على المدى الطويل و قلت كمان ان مش معنى ان واحد عملها و بقى كويس يبقى الكل هايعملها و هاتنجح (و تعرضت للهجوم الحاد و اتهامى بوجود مصلحة شخصية من وراء رفضى للعملية و بأنى جاهل بها و لا اعلم عنها شئ من الأخ حلوانى و لكن وضحت وجهة نظرى و موقفى بما لا يدع مجالا للشك فى ما اقوله)
و سبق ايضا انى قلت انى ممكن اعملها لمريض هى الحل الوحيد له ، اما اللى نفسه يقلع نظارته او نفسه يجربها ، فأرفض ، و هو حر يعملها بس بعيد عنى
بالنسبة لموضوع الأستغناء عن نظارتى المساقات و القراءة معا فلم يحسم الأمر حتى الآن
احيانا يقوم الجراح بعمل ليزك للقريب فى عين و للبعيد فى عين و بكده المريض يرى للبعيد و القريب معا (دى مدرسة امريكانى) و انا شخصيا بارفض لسببين
1) ممكن يحصل مصيبة لو العيان سايق مثلا و دخل تراب فى عينه المضبوطة للبعيد و حب يدعكها ... مش هايشوف يسوق لأن التانية مضبوطة للقريب ...
2) انا رافض الليزك اصلا بدون سبب قهرى
بعضهم يعمل الليزك و يلبس نظارة قراءة

موضوع زرع العدسة داخل العين مازال محفوف بالمخاطر :
لو العين مقاسها عالى قوى بالسالب ازالة عدسة العين الأصلية ممكن تصلح النظر و لكن لابد من نظارة قراءة !!! (تخيل واحد فى الثلاثينات اخليه يلبس نظارة قراءة)
لو سبنا عدسة العين الأصلية و زرعنا فوقها عدسة فكده النظر اتصلح لللبعيد و القريب (بشرط السن اقل من 45 سنة علشان ما يحتاجش نظارة قراءة) و لكن المشكلة بسيطة جدا: مكان العدسة دى فى الخزانة الأمامية و شفنا منها المشاكل الآتية
* لو خبطت ورا فى عدسة العين بتعمل مياه بيضاء
* لو خبطت قدام فى القرنية بتعمل سحابة على العين
*رجلين العدسة بتقفل جزء كبير من زاوية العين و ممكن تعمل مياه زرقاء (ارتفاع فى ضغط العين "جلوكوما")

فيه دراسات دلوقت شغالة عن عدسة قابلة لتغيير بعدها البؤرى يعنى بتعمل (Accomodation) و دى المفروض تتزرع مكان العدسة الأصلية و ليها نظريات كتير و اول واحد ابتدأ الدراسات بتاعتها Prof.Dr George Alio و ده اكبر عالم تصليح نظر فى العالم و دى فعلا لما تنجح هاتبقى طفرة و قفزة مهولة فى مجال تصليح النظر و الأستغناء عن النظارة و لكن الوضع الحالى لأ ... مخاطرتها اعلى من الليزك حاليا
و تحياتى