أولا انا لما بقول عليه نصاب فأنا مش بأسبه، انا باقرر واقع، ماهو حاجة من اتنين ، يا اما هو نصاب، يا إما انا حمار، وفى حالة ان هو نصاب يبقى انا لم ابتعد عن الواقع وبالتالى هذا لا يعتبر سباب، وفى حالة ان انا حمار فشتيمتى له لن تؤثر فى شخصة الكريم
ثانيا، المشكلة فى اختراعة المزعوم انه يشبه ببساطة ان يأتى احدهم ليخرج بنظرية ثورية مؤداها ان 1+1 يساوى 4 ، مهما كان عبقرى ومهما وضع من اسانيد لنظريته فان واحد + واحد لن تساوى 4
ثالثا: تفاصيل الاختراع المزعوم من دوائر الكترونية وخلافه ليست هى محورالقضية، عندما بدأنا دراسة الديناميكا الحرارية فى السنة الاولى بهدنسة عين شمس علمنا اساتذتنا ان دراسة الدايناميكا الحرارية تعتمد على دراسة المنظومات المختلفة كصناديق مغلقة(black boxes) ، يعنى كل الختراع بتاعه ده من اوله لآخره عبارة عن صندوق مغلق لا يهمنى ما بداخله لكن ببساطة احسب كمية الطاقة الداخلة اليه ايا كانت وكمية الطاقة الخارجة منه، يعنى لو طبقنا الكلام على الاختراع المزعوم دهيبقى احنا عندنا منظومتين، هناخدهم من الآخر للأول لحل المسألة:
الثانية هى محرك الاحتراق الداخلى الذى يحرق الهيدروجين لتحريك السيارة، داخل له طاقة عبارة عن الطاقة التى يحملها الهيدروجين الحر ، وخارج منه طاقة عبارة عن طاقة حركة +فاقد حرارى،
من دراسة دورة كارنوت التى تخص محركات الحتراق الادخلى تعلمنا ان افضل كفاءة لمحرك احتراق داخلى =28% ، اى ان كمية الطاقة الداخلة للمحرك من خلال الهديروجين الحر سيتحول منها على افضل الفروض 28% الى حركة والباقى سيضيع فى شكل حرارة، للتسهيل نجعلها 25% ، يبقى لو فرضان ان كمية الطاقةالحرارية التى ستنتج من احراق الهديروجين مع الأكسجين داخل المحرك هى100 كيلو جول(الجول هو وحدة قياس الطقة وتساوى 1وات ثانية) يبقى اللى هقدر احوله منها الى حركة هو بالكتير 25 كيلوجول فى حين ان 75 كيلوجول تضيع فى حرارة الردياتير والشكمان، وهذة ال25 كيلوجول الحركية لو ان المحرك بينتجها فى ثانية واحدة فهذا معناه ان هذة المحرك قدرته 25 كيلو وات اى حوالى 30 حصان تقريبا ، يعنى محرك سيارة صغيرة
طيب نرجع لورا بأه للمنظومة الأولى وهى منظومة فصل الهيدروجين عن الأكسجين، احنا اتفقنا ان كمية الهيدروجين اللى انا محتاجها كل ثانية هى الكمية التى يمكنها انتاج 100 كيلوجول لو احترقت فى جو من الاكسجين، يبقى انا لو عندى منظومة لفك الهيدروجين من الكسجين لازم ولابد وحتما وقطعا المنظومة دى تكون داخل لها طاقة ال 100 كيلوجول دول من مصدر خارجى (مضافة اليهم الفواقد بالطبع) علشان المعادلة تتزن، يعنى انا لو اعتبرت هذة المنظومة black box والخارج منها هى كمية الطاقة التى يحويها الهيدروجين الحر +الفواقد التى تخرج فى شكل حرارة ، يبقى لازم اللى داخل لهذة المنظومة يكون كمية طاقة مماثلة من مصدر خارجى، فى هذة الحالة لا يخصنى تصميم الكترونيات المنظومة ولا فرق الجهد ولا شدة التيار ولا اى حاجة داخلها، الديناميكا الحرارية تتعامل مع بلاك بوكس ،اللى داخل قد اللى خارج وماليش دعوة جوه فيه ايه، يبقى فى هذه الحالة علشان افصل كمية الهيدروجين المناسبة لازم ادخل للمنظومة دى 100 كيلوجول +الفواقد كل ثانية، او بتعبير آخر 100 كيلو وات، ولو فرضنا ان الفواقد 10 % وهو اقل رقم محتمل للفواقد ، يبقى انا محتاج للمنظومة دى 110 كيلو وات كهرباء، عارف ده معناه ايه؟ معناه ببساطة انى لو بتكلم على تيار منزلى 220 فولت يبقى انا محتاج تيار شدته 500 أمبير،( القدرة بالوات=حاصل ضرب الجهد بالفولت*شدة التيار بالأمبير) ، يا ترى عارف 500 أمبير دى تمثل ايه؟ دى تمثل اقصى تيار ممكن تسحبه عمارة مكونة من 12 شقة تسكنها اسر من الطبقة المتوسطة قامت بتشغيل جميع الأجهزة الموجدة بها فى وقت واحد وذلك لتشغيل سيارة صغيرة 30 حصان
يبقى ان اضيف انه لا يصلح ان احصل على كمية الطاقة اللازمة لفصل الهيدرووجين من مولد كهربائى مرتبط بالمحرك لسببين، الأول منهما ان المحرك ينتج 25 كيلو وات فقط فى حين اننى محتاج ل 110 كيلو وات لفصل الهيدروجين عن الأكسجين، السبب التانى هو ان هذة ال25 كيلو وات ستستهلك بالكامل لتحريك السيارة وتتحول بدروها الى حرارة نتيجة لاحتكاك عجلات السيارة بالأرض واحتكاك جسم السيارة بالهواء وبالتالى تتحول الى صورة غير مفيدة وغير قابلة للاستخدام، الأرقام لا تكذب يا عزيزى
رابعا: التاريخ منذ عصر النهضة العربية مرورا بعصر النهضة الاوروبى وحتى اليوم ملئ بالنصابين من ادعياء المحرك الذى لا يحتاج الى طاقة، وكل منهم فى زمنه استطاع اقناع الكثيرين جدا من العلماء بان محركه سليم ولا ينقصه شئ وبمرور الزمن لابد ان تنكشف الخدعة، عموما لو قدرت تعثر على نسخة من كتاب الفيزياء المسلية هتلاقى حصر بنصابى المحرك الذى لا يحتاج الى طاقة عبر التاريخ، انا عندى الجزء الاول منه سوفت كوبى ، وممكن احاول اديهولك فى اقرب فرصة
وده مقال عن حكاية المحركات دائمة الحركة وتاريخها وبعض النماذج(الفاشلة بالطبع )والملاحظ ان المقال يبدا بذكر ان هذة المحركات تتعارض مع قانون بقاء الطاقة
http://en.wikipedia.org/wiki/Perpetual_motion
خامسا: لا التفاف او حيود حول قوانين الديناميكا الحرارية ، وده مش رأييى لكن رأى علماء افذاذ من عصور مختلفة امثال اينشتاين وماكس بلانك وكارل ساجان ورديتشارد داوكينز واسماء اخرى لا حصر لها، حيث ينقسم علماء الفيزياء الى مجموعة متدينة بديانات مختلفة ومجموعة ملحدة ، وقد استخدم كل فريق منهم قوانين الديناميكا الحرارية وخصوصا القانون الثانى لتدعيم او نفى فكرة وجود الإلاه كل حسب ما يعتنق، لكن ايا منهم فى تفنيده لفكرة الآخر لم يجرؤ على ان يقول بعدم صحة اى من قوانين الفيزياء الحرارية
وبالتالى فلن يأتى هذا النصاب باختراعه التليفيزيونى ليثبت ان كل هؤلاء العلماء حمير، لأن حكاية المحرك دائم الحركة هى المقابل العلمى للشيخ ابو سر باتع وزيت القنديل فى ثقافتنا، نوع من انواع الدخل ظهر منذ نهايات القرون الوسطى وكل فترة يعاود الظهور فى ثوب جديد ويجد من يصدقه حتى تنجلى الخدعة ويختفى فترة ثم يعاود الظهور ثانيا بثوب جديد وهكذا
على فكرة انا مستمتع جدا بهذة المناقشة وبقدرك جدا لفتح هذا الموضوع، لكن برضه ده لا يمنع ان الراجل ده نصاب(او ان انا حمار ،مين عارف
المفضلات