البوجيه نزل واتربط فى مكانه غلط فهل من اضرار؟

**michohat** · 30-06-2012 11:35 AM

السلام عليكم ورحمه الله وبركاته

كنت بشيك على العربية عند الميكانيكي وبغير زيت ليكومولي و اول مره اضيف اضافه السيراتيك و فلاتر فقولت له يشوف حرق البوجيهات فالصنايعي اللي عنده فكهم وصنفرهم و لما يركبهم ركب واحد بطريقة مش صح فى مكانه فاتسبب ان السنون اللى فى الماتور باظت و اضطريت اني اروح لخراط علشان يدخل فى المكان ده دكر بنفس المقاس علشان يعيد ويستعدل السنون دي وفعلا رحت و الخراط عمل كده و رجعت تاني للميكانيكي علشان يشوف لو فيه تنفيس ولا لا وقال لي لا
ودلوقت حاسس ان موتور العربية مش مضبوط وصوته مش هو فعاوز اعرف هل اللي حصل مع البوجيه ده يكون له تأثير على الموتور ولا يكون من تأثير الاضافه بتاعت الزيت اللى هيا اول مره احطها وهي السيراتيك من ليكومولي
ولا ممكن من الخراط لما قعد فوق الحوض وكان ساند برجله على فرن الشكمان علشان يعرف يعمل ويصلح مكان البوجيه
عاوز اروح بعد الشغل للميكانيكي تاني يشوف الصوت ده من ايه فعاوز اخد رايكم الاول

**chiko** · 30-06-2012 08:59 PM

شوف لو ربط البوجيه لحد الاخر معوج .. هنا تبقي المشكله لان الخراط مش هيعرف يستعدله .. لكن لو خد اول سنتين ..يبقي لو خراط شاطر هيعرف يستعدله ... و عشان تعرف اذا كان البوجيه قافل صح و الا بينفس ... فكه لفه واحده و هزه يمين و شمال و شوف اذا كان بيلعب في مكانه يعني بيتحرك معاك و الا لا ..لو بيتحرك .. يبقي لازم تفك وش السلندر و يتعمله جلبه ...

و قولي بقي لما الخراط مشت السن .. هل دور العربيه و البوجيه مش راكب و الا لا ؟؟ ده مهم جدآ

لازم يدور العربيه من غير البوجيه ده .. عشان يطلع الرايش بره من فوق البستم عشان ميسلغش ...

و بخصوص الاضافه ... انت حطيت الجركن كله و الا سبت شويه عشان الاضافه ؟؟ لان لازم تخصم الاضافه من الزيت عشان ميبقاش زياده .. و الاضافه تتقل معاك الماتور سلنسيه بس ..لكن تقل خفيف جدآ صعب تلاحظه

**michohat** · 04-07-2012 01:08 AM

المشاركة الأصلية كتبت بواسطة chiko

شوف لو ربط البوجيه لحد الاخر معوج .. هنا تبقي المشكله لان الخراط مش هيعرف يستعدله .. لكن لو خد اول سنتين ..يبقي لو خراط شاطر هيعرف يستعدله ... و عشان تعرف اذا كان البوجيه قافل صح و الا بينفس ... فكه لفه واحده و هزه يمين و شمال و شوف اذا كان بيلعب في مكانه يعني بيتحرك معاك و الا لا ..لو بيتحرك .. يبقي لازم تفك وش السلندر و يتعمله جلبه ...

معرفش ربطه لحد قد ايه و ان شاء الله اجرب الطريقة اللى حضرتك عملتها

و قولي بقي لما الخراط مشت السن .. هل دور العربيه و البوجيه مش راكب و الا لا ؟؟ ده مهم جدآ

ايوه دورت العربية مرتين والبوجيه مش راكب علشان يطلع الرايش اللي فية

لازم يدور العربيه من غير البوجيه ده .. عشان يطلع الرايش بره من فوق البستم عشان ميسلغش ...

و بخصوص الاضافه ... انت حطيت الجركن كله و الا سبت شويه عشان الاضافه ؟؟ لان لازم تخصم الاضافه من الزيت عشان ميبقاش زياده .. و الاضافه تتقل معاك الماتور سلنسيه بس ..لكن تقل خفيف جدآ صعب تلاحظه

شايل معايا من الزيت نفس حجم زجاجه الاضافة بمعني بعد ما حطيت الاضافة مليت عبوه الاضافة من الزيت و شلتها
هو المفروض الاضافة تخلي الزيت ينقص بعد قد ايه

**chiko** · 04-07-2012 01:30 AM

بعد 100 ك بص علي مستوي الزيت .. و خصوصآ لو بتمشي طريق سريع كتير ... بس قولي انت حطيط الاضافه ليه ؟!

**michohat** · 04-07-2012 09:53 AM

حطيت اضافه السيراتيك من باب الحفاظ على الموتور وذلك لاني لسه معمرة من سنه و كمان كنت سمعت انه بيهدئ من صوت الموتور فقولت اهدئ الصوت اكتر مع انه صوته كان هادئ

**HAITHAM1985** · 04-07-2012 10:40 AM

أنت ساكن فين فى الزقازيق ؟؟؟

**Eng_Mostafa_89** · 05-07-2012 06:32 AM

فى حل كدة جة فى دماغى علشان تقدر تحدد فى تنفيس ولا لا من الموتور
ممكن تجيب شوية بودرة تلك وترشهم حولين البوجية وتدور لو تنفيس اكيد هيبان لو بودرة التلك طارت

**michohat** · 05-07-2012 01:25 PM

المشاركة الأصلية كتبت بواسطة haitham1985

أنت ساكن فين فى الزقازيق ؟؟؟

ناحيه موقف المنصورة وانت؟

المشاركة الأصلية كتبت بواسطة eng_mostafa_89

فى حل كدة جة فى دماغى علشان تقدر تحدد فى تنفيس ولا لا من الموتور
ممكن تجيب شوية بودرة تلك وترشهم حولين البوجية وتدور لو تنفيس اكيد هيبان لو بودرة التلك طارت

ممكن اجرب بس اضمن ان مفيش سوائل او زيوت جبن البوجيه علشان مش تبقي عجينه