الموضوع: هل من حق امين الشرطة سحب رخصة السيارة ؟؟

حسبي الله و نعم الوكيل
انت مش حرام تدفعلة الوزر مش عليك
لكن امين الشرطة هو اللي يتحمل الذنب لانك بتحصل على حقك بالفلوس بدل ما تتبهدل و تجري ورا الرخص المسحوبة
بس هو حرام عليه لانة ظلمك و افترى عليك و اجبرك كدا تدفعلة

لو كل واحد بطل يدفع رشوة او اتاوة , الظابط مش حيقف يلم اى فلوس , محدش يدفع اى ملايم لو مش عامل حاجة غلط , و لو عامل حاجة غلط يدفع الغرامة بتاعتها , انما محدش يدفع ماليم احمر لاى حد بدون وجة حق , كفاية حرام بقى , و كل واحد يعمل الصح بغض النظر عن اى حاجة

واللهي اللي بيحصل دة تهريج بجد حرام ,لو فضلنا علي كدة يبقي نستاهل كل اللي يجرالنا ,يعني بقول لما اروح ارخص مش مشكلة نراضيهم لكن توصل لدرجة اتاوات في لشارع دة يبقي تهريج

بجد حرام عليك اللي عملته دا..

طلعله بطاقتك وقوله أتأكد بنفسك...والتاني بتاع النمر دا قوله خلاص هاتلي الظابط بتاعك و لو الظابط كان نفس الأخلاق خليهم ياخدوك على القسم و بمجرد ما هتقول كدا هيمشوك أصلا و هيعتقدو إن وراك واسطة.

لكن عمر الفلوس ما كانت بتحل مشكلة بل أنت كدا بتعودهم ياخدو منك تاني و من غيرك.

للأسف تصرف خاطئ 100% و ستحاسب عليه كمان.

طيب يا ريت يا جماعة حد من اخونا اللي عندهم خلفية في التعامل مع رجال المرور يوضح
لنا حقوقنا وواجبتنا

اسمحولي يا جماعة أحط كتاب "عشان متضربش على قفاك" ...

أنا مش عارف قوانين المنتدى تسمح ولا لأ ... بس هحط الجزء الخاص بالعربيات بس

الكمين لمين؟ س: يعني إيه كمين؟ج: المفروض إن مفيش حاجة اسمها كمين للناس، لأن الكمين بيكون للأعداء وإحنا لسنا أعداء للشرطة، لكن اللي بنشوفه بالليل اسمه لجنة لحفظ الأمن والنظام في الشارع واللي سماه كمين هم الحرامية وميصحش أبدا إن حد يقول إن الشرطة عاملة كمين للناس.

س: إيه فايدة اللجان اللي بتكون في الشوارع بالليل في كل حتة؟ج: اللجان بتكون متكونة من ظابط القسم، وظابط مرور، وظابط مباحـث ومعـاهم بـوكس وأمنـاء شرطة وعساكر لحفظ الأمن والنظام في الشارع، لضبط المتهمين الهاربين من الأحكام وأي حاجة تمس الأمن العام وضبط المخالفات المرورية.

س: علي أي أساس بيوقفوا الناس ويسيبوا ناس تانية بدون توقيفهم أو حتي سؤالهم؟ج: ظابط المباحث اللي في اللجنة بيكون عارف كتير من المجرمين والمسجلين في دايرة قسمه، وبيكون باين

س: هل من حق الظابط يقبض علي شخص لمجرد عدم وجود رخصة قيادة معاه؟ج: عدم حمل رخصة القيادة لا تبيح للظابط القبض أو التفتيش لكن من حقه يسحب رخصة التسيير فقط بشرط تكون السيارة باسم قائدها ومعاه تحقيق شخصيته، ويقوم الظابط بإعطائه إيصال سحب لمدة أسبوع.

س: ولو كان مع الشخص رخصة قيادة لكن بدون رخصة تسيير للسيارة؟ج: من حقهم يسألوا عن رخص التسيير، ولو كانت السيارة بدون رخصة تسيي

س: هل من حقهم يطلبوا البطايق الشخصية؟ج: من حقهم يطلبوا بطايق الناس عشان يتأكدوا من شخصياتهم ولو شكوا في حد ممكن يوقفه علي جنب بدون ما يركبه البوكس أو يفتشه ويستعلموا عنه من القسم باللاسلكي اللي معاهم إذا كان مطلوب أو عليه أحكام ولا لأ.

س: ومين اللي من حقه يطلب البطاقة أو الرخصة؟ج: الظـابط أو أميـن الشرطـة والمخبر والعسكري من حقهم يطلبوا الرخصـة فقط لتوصيلهـا للظابـط، لكـن اللي من حقه يسحب التراخيص لازم يكون ظابط المرور بنفسه ويعطيك وصل بالسحب لكن مش من حق الظابط أو غيره إنه يسحب الرخص بدون وصل سحب تراخيص.

س: هل من حق اللجان توقيف السيدات والبنات من قائدي السيارات ؟ج: من حقهم توقيف أي سيدة أو فتاة في اللجنة وسؤالها عن التراخيص مثل الرجال، ولو كانت أي واحدة بدون رخصة من حقهم سحب الرخصة الثانية وإعطاءها وصل بسحب الرخصة.

س: هل من حق اللجنة سؤالي عن سيدة أو بنت جالسة جنبي في سيارتي وسؤالها عن بطاقتها؟ج: من حقه سؤالها فقط عن بطاقتها للتعرف علي شخصيتها وممكن يستعلم عنها بالجهاز من القسم لو شك إنها مطلوبة في حكم أو عليها أمر ضبط وإحضار لأن زي ما فيه مجرمين ومتهمين من الرجال فيه أيضا متهمين ومجرمين من النساء وبيكون عليهم أحكام واجبة التنفيذ عليهم.

س: أعمل إيه لو الظابط سألني مين اللي معاك ؟ج: قوله بكل بساطة زوجتي أو خطيبتي أو صديقتي ومن حقي الخروج مع صديقتي في أي وقت.

س: هل من حقه ينزلها من سيارتي ويخدها علي جنب بعيد عني ويسألها عن أي حاجة أو يفتشها؟ج: مش من حقه ينزلها مطلقا من السيارة طالما غير مطلوبة في شئ أو معروفة لديه من قبل أو مسجلة، وميقدرش أي ظابط مهما كانت رتبته يفتش أنثي تفتيش ذاتي حتي لو كانت متهمة في مليون قضية

س: ليه بنشوف بعض اللجان بتنزل البنات من التاكسيات ويخدوهم ع القسم وخصوصا في شارع الهرم وجامعة الدول؟ج: فيه بنات كتير بيكونوا مسجلات آداب ودعارة وعليهم أحكام وبيكونوا معروفين للظباط
س: أعمل إيه لو الظابط طلب مني أنزل من السيارة علشان يفتشها أو طلب مني أفتح الشنطة؟ج: مفيش حاجة اسمها تنزل من سيارتك علشان يفتشها إلا لو كان معاه أمر من النيابة أو المحكمة بتفتيشك أو كنت في حالة تلبس بجريمة أو كانت ريحة السيارة تدل أن حد كان بيشرب فيها مخدرات مثلا, وترفض تفتح شنطة عربيتك وتقول للضابط "أفتح شنطتي ليه مادام رخصي سليمة وسيادتك شايف إني مش محل شك والعربية ملكي وفتح الشنطة ده اسمه تفتيش وده محتاج إذن من النيابة, وأنا مش ممسوك لا في حالة تلبس ولا أنا حرامي وأنا عارف إنك راجل قانون وعارف الإجراءات كويس وعارف إنك مش ممكن تخالف القانون.

س: ليه الضباط ساعات بينزلوا الشباب اللي راكبين في العربيات ويطلبوا منهم يقولوا "حاحا"؟ج: علشان يعرفوا لو كان اللي سايق شارب أي كحوليات أو لا، علشان بيكون ريحة فمه واضحة لما يقول "حاحا" ويبان إذا كان شارب كحوليات ولا لأ.

س: ليه الظباط بيكونوا واقفين بعيد مع بعض وبيبعتوا الأمنا والعساكر تسحب التراخيص؟ج: مـش من حـق الأميـن أو المخبـر أو العسكري يسحب رخصك, والأفضل تركن العربية وتنزل للظابط بكل ذوق وتوريه الرخص وتقوله أنا عارف إن سيادتك فقط اللي من حقه يشوف رخص العربيات مش الأمين أو العسكري.

س: ولو أخدني علي القسم أو ركني جنبه في الكمين؟ج: لازم تتصل بحد من أهلك أو محاميك وتصمم تعمل له محضر في القسم بالواقعة اللي حصلت معاك وإنك اتقبض عليك في اللجنة بدون وجه حق وتصمم علي اتخاذ إجراء مع الظابط ومتتنازلش عن حقك .

س: من حق الظابط يركني جنبه في الكمين وقت قد إيه علشان يستعلم عني من القسم؟ج: وقت بسيط ميزدش عن نصف ساعة فقط، لأن مصالح ووقت الناس ليهم تمن ومش لعبة.
س: لو كنا راكبين ميكروباص وفي الكمين نزلوا الناس اللي فيه عشان يفتشوهم؟ج: متـوفقش إن حـد يفتشـك وتـرفضوا أي تفتيش، لكن من حقهم يشوفوا البطاقات فقط ويتحروا عن اللي شاكين إن عليهم أحكام أو مطلوبين في قضايا.

س: ليه بنشوف الأمناء والظباط بيكشفوا كتف بعض الناس في اللجان؟ج: بيكشفوا كتف اللي بيشتبهوا فيه علشان يعرفوا إذا كان سوابق ومسجل ومختوم علي كتفه إنه مسجل خطر ولا لأ.

س: يعني إيه مسجل خطر؟ج: يعني شخص معتاد الإجرام واتمسك في قضايا سرقة أو بلطجة وفرض إتاوات أو بيشتغل في تجارة المخدرات أو الدعارة أو فرد في عصابة.

س: وليه المسجل خطر بيكون الشرطة ختماه علي كتفه؟ج: من فترة طويلة كانت الشرطة بتختم المسجلين خطر علي كتفهم علشان تعرفهم، والمسجلين نفسهم وأصحاب السوابق اللي متعودين علي الحبس والسجن بيدقوا وشم علي جسمهم وهمه موجودين في السجون