الف مبروك لحضرتك علي العازل الحراري
انا فعلا مبسوط اني اسمع ان في حد فاهم زي حضرتك وراح ركب حاجة زي دي في عربيته علي الرغم من ان تكلفتها (مش غالية بالنسبة لفايدتها) وانما برضه تمثل مبلغ ممكن ناس كتير تشوفه انه ما يستاهلشي وتبتدي تقارن بينه وبين تكلفة تركيب فاميه يعتبر بالنسبة له ببلاش طبعا

علي فكرة انا كمان ركبت العازل ده مش مرة واحدة لا مرتين في عربيتي اللي فاتت وكانت كيا ريو وفي عربيتي الحالية هيونداي ماتريكس
وبرضه كان من عند الاستاذ زلباني (Sun tek window film) بشفافية 70%
ودي فرصة اني اشكر الاستاذ زلباني علي الحرفية في التركيب بتاعة اكرم وكمان ابارك له علي المكان الجديد في مركز توب جير - م/ محمد فضالي
لاني في المرة الاولي لما ركبته في العربية الكيا كان بيركب عند محل اوسكار للاكسسوار في المطبعة (من اكتر من سنة) وبعدين في المرة التانية في الماتريكس ركبته عند محمد فضالي (توب جير) في شهر مايو الماضي

وبصراحة تجاربي الاثنين مع هذا المنتج اثبتت انه فعال جدا مع حرارة الشمس وفعلا بيحسن اداء التكييف وبيقلل من استهلاك البنزين بالذات اثناء السفر. دا غير ان احساسك بلسعة الشمس مش موجود حتي لو انت كنت راكن العربية في الشمس بترجع تلاقي العربية سخنة اه لكن مش لدرجة لسعة الشمس اللي متخليكش تعرف تمسك الدريكسيون او تقعد علي الكرسي
وبالذات في الماتريكس لاني اول ما اشتريت العربية ولسة ما ركبتش العازل عرفت يعني ايه معني ان زجاج السيارة يكون مساحته كبيرة وتمشي في الشمس مدة طويلة بعربية زي كدة ويا سلام لو الفرش بتاع العربية كمان يكون جلد (صباح الوحوحة)
وبعد ما ركبت العازل الموضوع اختلف تماما من حيث الاحساس بالحرارة داخل العربية مع تشغيل التكييف لدرجة ان زوجتي حست بالفرق وهي اللي اكدتهولي.
اما درجة الشفافية فالزجاج مش باين انك لاصق حاجة علية ومحدش ياخد باله الا صاحب العربية وده معناه انه مش بيعمل مشكلة مع المرور في الفحص او في اللجان علي الطريق
انا لسه راجع من مرسي مطروح يوم السبت اللي فات وواخد الطريق كله في عز الشمس لاني اتحركت من هناك الساعة 12 ونص ظهرا يعني عز حرارة الشمس وكنت مشغل التكييف علي 2 طول الطريق وساعات كنت بنزل سرعة المروحة ل 1 لما احس اني سقعت شوية.

وبالنسبة للضمان انا كلمت الاستاذ زلباني من كام يوم علشان في حتة من طرف الزجاج اليمين قدام (من فوق) لزقها فك (مش عارف ليه) والراجل بكل ذوق قاللي ما تقلقش وما تجيش جنبها وعدي علينا واحنا هنشوفهالك.

عامة انا شايف ان المنتج يستحق ان الواحد يركبة طالما عربيتك انت مش بتهملها وبتدور علي راحتك اثناء القيادة في الحر وبعدين حاجة زي دي ترفع من تمن العربية لانها مش هتتفك منها زي الجنوط مثلا او الكاسيت.

الف مبروك لحضرتك مرة تانية
انجوووووووووووووي