الموضوع: رأييى فى فرامل الانسر عن فهم و تخصص (فيها مشكله).

انا عندى لانسر 1600 مانيوال توكيل مصريه موديل 2006 وثباتها و عفشتها فوق الممتاز على اى سرعه.
بدايه كلامى عن الفرامل هى ان عربيتى فيها Abs&ebd
الشكوى بقه هى ان الفرامل وحشه (على فكره انا مهندس ميكانيكا و عندى خبره كويسه فى السيارات)وكلامى هيكون هندسى الى حد ما وعلى فكره انا عارف حل المشكله بس مش عارف اوصل بتتظبط منين ده لو ليها ضبظ.

اولا:الفرامل الأماميه بتتلكك على انها تتزحلق و تعمل صوت الزحلقه و احيانا ال Abs يشتغل بدرى أوى عن الظروف اللى المفروض تخليه يشتغل.

ثانيا:ده سببه ان الفرامل الخلفيه ضعيفه ولو قويت شويه المشكله ده هتتحل لأنها هتلم العربيه كويس مع فرامل الأمام والعبء اغلبه مش هيبقى على الفرامل الأماميه لوحدها بس المشكله مش مشكله تيل ولا طنابير...المشكله فى ال Ebd اللى مع الabs


ثالثا: نعرف الأول الebd ده شغال ازاى؟؟؟؟؟؟
دايما من الطبيعى فى اى عربيه ان تكون فرامل الخلف أضعف من الأمام و لكن بنسبه معينه محسوبه و ده لأن لو فرامل ورا ضعيفه العربيه هتتزحلق من قدام بسهوله و لو فرامل الخلف قويه أوى العجل الخلفى هيبقى معرض لأنه يقفش اثناء الفرمله الجامده لأن العربيه بتترفع من ورا جامد ووزنها على العجل الخلفى بيبقى قليل على عكس العجل الامامى اللى الوزن كله تقريبا بيبقى عليه و طبعا مش محتاج اقولكم مدى خطوره ان العجل الخلفى يقفش اثناء الفرمله "طبعا العربيه هتلف حول نفسها و تصرفها غير مضمون"
مصممى السيارات دائما يقوموا بتصميم النسبه بين قوه الفرامل الخلفيه و الاماميه على وضع السياره و هى مرفوعه من الخلف اثناء فرمله قويه لضمان عدم قفشان العجل الخلفى فى اى ظرف وفيه صمام مخصوص بيركب على خط الباكم للفرامل الخلفيه للتحكم فى ضغط الباكم على العجل الخلفى فضغط الباكم يكون عالى فى الفرمله العاديه ويقوم هذا الصمام بتحديد ضغط الباكم على العجل الخلفى اثناء الضغط القوى على دواسه الفرامل لتجنب قفشان العجل الخلفى (يعنى بالبلدى بيضعف فرامل ورا شويه فى الفرامل الجامده)

دلوقتى بقه ممكن نفهم ال Ebd ده بيعمل ايه؟؟؟؟؟؟؟؟
ال Ebd بديل الصمام اللى اتكلمنا عليه من شويه بس طبعا المفروض ان اداؤه احسن فى الفرمله لان الصمام العادى مضبوط على نسبه معينه بين فرامل ورا و قدام انما لو العربيه تقلت من ورا وكان فيها ناس قاعده فى الكنبه مثلا و حاجات فى الشنطه اذن مش هتترفع اوى من ورا ههيبقى ممكن ازود قوه الفرامل الخلفيه بامان و كمان انا هبقى محتاج القوه الزياده ده فعلا لان العربيه محمله ناس و توقفها طبيعى اصعب......الصمام العادى ملوش دعوه بالظروف ده و هتفضل فرامل ورا ضعيفه رغم انى محتاجلها انما الebd هيحسب الوزن على كل عجله و يعرف ايه أقصى قوه فرمله مناسبه لكل عجله و تكون بأمان.

رابعا: مربط الفرس
الكمبيوتر بتاع ال Ebd محتاج معلومات عن الوزن على كل عجله زى ما قولنا
و للاسف مفيش ميزان على كل عجله عشان سياده الكمبيوتر يعرف ايه ظروف الفرمله بالظبط فبيتعمد يعمل نسبه زحلقه بين فرامل ورا و قدام عشان يقدر يقيسها عن طريق حساسات الabs اللى فى كل عجله وبيعمل على ان نسبه الزحلقه ده متزدش عن حد معين فكل ما يلاقيها زادت يزود فرامل وره شويه لحد ما تقل الزحلقه تانى و هكذا وده عن طريق صمام الebd المتغير الكترونيا المدمج داخل جهاز الabs و حتى لو لاحظت فى عربيتك اللى فيها Ebd انك بتسمع صوت الزحلقه ده بس ما بتزدش قوى لو فرملت اكتر و هتلاقى العربيه بردو بتلم كويس و لو العربيه محمله هتلاقى فراملها احسن من العربيه اللى ما فيهاش Ebd


خامسا و أخيرا (رأيى فى فرامل الانسر ان فيها مشكله):
احنا قولنا ان طبيعى يكون مع عمل ال Ebd يكون فيه صوت زحلقه بس فى الانسر زياده بغباء و بيحصل حتى و العربيه فاضيه يعنى مش محمله و مندفعه جامد!!!
وحل المشكله ده فى رايى ان النسبه المبدئيه بين فرامل ورا لفرامل قدام لازم تزيد شويه و الebd يشتغل و يزود فرامل ورا اكتر و اكتر لما تبقى الفرمله قويه جدا و فيه نسبه زحلقه تستاهل انه يشتغل.
طبعا ال Ebd ليه صمام بيعمل الموضوع ده وبيتحكم في درجه قفله و فتحه على فرامل ورا الكمبيوتر.

أنا بقى نفسى الاقى مسمار ولا اى حاجه فى جهاز الabs أقدر افتح منه الصمام ده شويه بحيث انه لما يكون فى اقصى حالات قفله تكون الفرامل فى الظروف العاديه كويسه بردو و تتحل المشكله ده
وعلى فكره انا ليه ملاحظه مهمه انه ساعات الصمام ده بيبقه مظبوط من نفسه كده و بتبقه فرامل العربيه جمييييييييله قوى و قويه قوى و ماسكه فى الارض و مفيش اى زحلقه و بيكون بدال الفرامل طرى شويه و ده معناه ان خط الباكم الخلفى بيقه مفتوح كويس و الفرامل بجد بتبقى روعه و بتمنى ساعتها ان الكمبيوتر ما يستغباش ويغير الظبطه ده بس للاسف ممكن يقعد كده يوم ولا اتنين بالكتير و جهاز الcheck بتاعه يكتشف انه لا سمح الله غلطان و يرجع يقفل على فرامل ورا تانى شويه و ترجع الفرامل زباله زى ما كل الناس بتشتكى.
طبعا ده عيب واضح و تذبذب فى اداء العربيه!
ياريت بقى لو حد متخصص او اى حد عنده معلومه الصمام ده ضبطه منين وهل ضبطه Hard Ware ولا Soft Ware يقوللى الحل؟