الموضوع: ايه رايكوا فى ميجان فوق 2005

بص يا باشا

معظم اللى بتواجههم مشاكل مع ال 2005 هتلاقيهم شارينها مستعملة و غالباً مش متحافظ عليها.......دى وجهة نظرى فى الموضوع.

أنا واحد من الناس كان معايا فى مصر 2005 جايبها زيرو.........معظم المشاكل اللى قابلتنى أنا شايفها مشاكل عادية..........و هنا معايا 2007 جايبها مستعملة.....تعبتنى أكتر من ال 2005
هو المقياس و أنت بتشترى يكون نضافة العربية أكتر من موديل كام.

و برضه مش هنكر أن فيه فى موديل 2005 بعض القطع اللى كانت نازلة فيها و كانت بتبوظ بسرعة أكبر من المتوقع...........بس كلها حاجات أستهلاكية هتلاقيها أتغيرت لأن العربية عدى عليها 7 سنين دلوقتى.

يعنى على سبيل المثال الكويلات............هاتلى عربية موديل 2005 تكون ماشية لحد دلوقتى و مغيرتش كويلات.

الكويلات دى هى نفس وظيفة البوبينة بس فى حالة الميجان عندك على كل بوجيه واحدة.....و ده بيخلي لو فيه كويل باظ العربية تمشى عادى بس تقطع شوية...........عكس لو فيه بوبينة واحدة بتدى للأربع بوجيهات و باظت يبقى أنت كده عطلت.

قطع الغيار رخيصة مش غالية فى الإجمالى.......بس برة التوكيل
يعنى على نفس المثال بتاع الكويلات
برة التوكيل موجود ماركات و صناعات كتير..........صينى و تركى و غيره أسعارهم تبدأ من 150 أو 130 لحد 400 تقريباً و حسب معرفتى دى بيبقى زى اللى فى التوكيل بالظبط.

فى التوكيل كان أخر سعر أعرفه 525 جم ( الكلام ده يجى من 4 سنين ) و مش فاكر كان بالتركيب و الضرايب ولا لأنى مغيرتش غير كويل واحد مرة واحدة على حسابى.......الباقى كان متغير فى الضمان.........و منهم 2 متغيرين بعد ما الضمان خلص كمان علشان أنا كنت مواظب على الصيانات معاهم.