الموضوع: .... نصائح قبل متشتري كيا او اى عربية و مشاكل السيراتو المتوقعة عن تجربة ....

المشاركة الأصلية كتبت بواسطة hmotors

مشاكل السيراتو المتوقعة عن تجربة:

1- صوت خشونة او ورة بس مع تشغيل التكييف وتدوس بنزين على السرعات المنخفضة المشكلة دى مش ظاهرة علطول

عندي نفس المشكلة ومع انها مستفزة بس مش بتظهر على طول

2- الموتور بيسقف وصوته عالى ، ضرورى نتأكد البنزين نضيف مش مخلوط ب 80 او فى نسبة مياه وشوائب نتيجة إهمال من المحطه وخزانات متهالكة وكمان البوجيهات وفلتر الهوا و البنزين و الزيت حالتهم كويسة.

معرفش يعنى اية الموتور بيسقف بس في الغالب انا بحط بنزين 91 ومفيش مشاكل

3- تعليقة دراع النور وساعات مع العالى والفوجات

علق معايا الدراع وغيرته على الضمان الحمد لله وبوظولي الدركسيون بقى معووج زي جادون العجلة

4- العربية ناشفة فى المطبات والترزيع نسبها بتختلف من طريقة قيادة كل واحد وحالة العربية والشوارع الى بتمشي فيها ونوعية العجل الى فى العربية kumho solus مش ممتازة خصوصا مع 17 لأنها مستوى متوسط

ايوة ياباشا اهم حاجة تفيدني عايز اغير نوع كوتشات مريح شوية لان الكومهو دي فعلا مراجيح وخصوصا الجنط ال 17 .. تنصحني بإيه ياكبير وخصوصا اني ماشي عليهم الوقتي 20 الف وبقالهم سنتين .. اغير الوقتي ولا استنى شوية ؟

5- الفرامل ضعف شديد فى الأداء بيظهر اذا فى abs او مفيش وده بيحصل مع القيادة الرياضية والعنيفة يعنى تعلق رجلك على الفرامل لتهدية العربية من سرعات عالية بشكل مستمر وده بيخلى حرارة اجزاء الفرامل تكون مرتفعع جدا. هيحصل ايه بعد كده العربية ممكن تزحف مسافة كبيرة او مع ال abs هتسمع صوت التخبيط الى بيحصل قدام ده والعربية ممكن تخزلك مع غير المتمكنين من العربية او خبرتهم ضعيفة فى القيادة او مش متوقع الفرامل يتغير ادائها فجأه. ( المشكلة دى ممكن تظهر فى نسبة كبيرة من العربيات مش كيا بس )

معايا abs وبصراحة الفرامل ممتازة ما شاء الله ... بس كام مرة حسيت بتغيير في اداءها وده خلاني مديهاش ثقة كاملة والحمد لله

6- الجنط ال 17 بالالين فى العجل من المطبات والحفر وحك العجل فى الرصيف وده محتاج حرص شديد ومش هينفع اذا حد ساكن فى منطقة فيها مدقات او شوارع مش متسفلته.

انا طلعلي بالونة بعد ما ماشيت 500 كيلو عليها ورميت الكاوتش مكان الاستبن ... بس الحمد لله لحد الوقتي 20 الف مطلعش حاجة تانية مع اني باكل حفر بالعبيط

7- إستهلاك البنزين طبعا اذا العربية واقفة و دايرة مده كبيرة او فى زحمه خانقة هيظهر نسب إستهلاك عالية جدا ومش طبيعية ولما تمشى على سرعات عالية فوق ال 140 برضه الإستهلاك مرعب ( المشكلة دى ممكن تظهر فى نسبة كبيرة من العربيات مش كيا بس )

استهلاك البنزين عندي معقول ديما بيترواح من 9 لتر -10 لتر / 100 كيلو والتنك بيعمل معايا 450 كيلو تزيد او تنقص 20 كيلو .. معرفش ده كويس ولا وحش

8- قربة مياه المساحات اذا كانت فاضية مده كبيرة ممكن بعد متملاها موتور دفع مياه المسحات يعلق وميشتغلش ويظهر صوته على الفاضى علشان كده دايما اتأكد انها مليانه ومتشغلش المساحات خالص والقربة فاضية

9- طقطقة ابواب العربية والتزييق كله ده من حرارة الشمس المباشرة بنسة كبيرة او المشى المستمر فى شوارع غير ممهدة والمطبات والحفر وغسيل العربية بضغط ماء مباشر وشديد وصابون بيضيع كل التشحيم وده مش العفشة بس فى شحم لأدرعة الأبواب والمفصلات وحاجات كتير.

الاربع ابواب والشنطة بيطلعو مزيكا حسب الله الوقتي .. ومش عارف اعمل بصراحة غير اني اكبر دماغي

10- ظهور تشققات على الفوانيس الأمامية، متغسلش العربية بجاز او بنزين او بعد مشوار طويل فى الشمس والحرارة العالية برضه اذا كنت ماشي و النور العالى شغال فترة طويلة

الفوانيس فعلا مشققة جدا مع اني لا بغسل بجاز او بنزين بس بشغل النور العالي كتير عشان طريق شغلي معظمة صحرا .. هل في علاج ولا مفيش ؟

11- السيراتو محتاجة تعمل كل الصيانات فى معادها والعناية المستمرة و التعديل فى كهربت العربية وتركيب إجهزة إضافية وأنوار قدرتها عليا من غير وجود فنى محترف بيبهدل العربية وبيظهر عيوب اكتر


12- مشاكل الدفع الأمامى المعروفة والمنتشرة مع عدم الدراية بها والحرص (التعويم على السرعات العاليا والملفات المفاجأة وخصوصا مع وجود حفر بسيطة فى الطريق، الأحساس القوى بتعويم او عدم ثبات الدركسيون مع مطبات الهوا لما الطريق يكون فيه مرتفعات ومنخفضات حادة)

مظبووووووط مية في المية وحصل مرة واحدة وعامت مني بس الحمد لله ربنا ستر

تحياتى للجميع،

.

في النهاية ياباشا احب اشكرك على الموضوع واقولك انك فعلا راجل برنس ريحتني كنت مفكر ان العيوب دي عندي وبس .. واتمنى ان حضرتك تفيدني في الاستفسارات اللي كتبتها ومكنش متقل عليك .. والله ولي التوفيق

المشاركة الأصلية كتبت بواسطة D/FARID CERATO

الجبر دول يا باشا نظامهم معاك في الصيانات بيفهمو ولا ضايعيين لحسن انا ليا معاهم قصص ؟؟؟؟؟؟؟؟؟؟؟هي عربةيتك موديل كام ؟؟انهي فئة؟

بص ياباشا ولا مؤاخذة في اللفظ .. الجبر ده أوسخ وكيل هتقابلة في حياتك .. الشغل كله كروتة وعك × عك .. ياراجل انا رحت اغير دراع النور خرجت بدركسيون معووج وحاطط موضوع في المنتدى عن الحكاية دي ومازلت لحد الوقتي ماشي بيه معووج بس تأقلمت عليه

واستقبال سىء واسعار غالية ومفيش اي اهتمام بالعربية .. حتى التشييك اللي بيقولو عليه بيمشي يبص بعنيه كده ويقولك كله تمام .. بصراحة امنية حياتي يسحبو منه الوكاله ويدوها لعبد اللطيف جميل صاحب افضل خدمة بعد البيع ..

خليني ساكت ياراجل دة حتى المكان اللي بيستقبلو فيه العربيات مكان زي وشهم مفيش فيه كوباية مية

عربيتي موديل 2011 الفئة النص فل والعربية الحمد لله عيوبها معقولة واتعودت عليها والعيب الخنيق هو الحدفة نحية الشمال .. وراحت لما ظبطت زوايا ولبست كام حفرة فرجعت تاني

والحمد لله على كل شىء