الموضوع: أتعامل مع القاشقاى ازاااااااااى !! ؟

المشاركة الأصلية كتبت بواسطة محمد سعد عبده

السلام عليكم ورحمة الله

خلاص كلها أيام ان شاء الله وهيكون عندنا القاشقاى 2013
وتوكيل السبع قالى الفروقات بينها وبين 2012 بسيطة أو ممكن يكونو واحد -يعنى مفيش فرق

وعليكم السلام ورحمة الله وبركاته ..
ليك وحشة والله يا استاذ محمد وشوفت الوقت عدا ازاى بسرعة
وتستلم على خير ان شاء الله
ومنتظرين تقاريرك الدورية
بشرط تكون فى قسم نيسان مش هنا ..
عشان نقدر نوجب معاك صح ..

المشاركة الأصلية كتبت بواسطة محمد سعد عبده

المهم احنا سيارتنا الحالية بيجو 504 موديل 78 يعنى بقالها حوالى 34 ماشية على الأرض هههههههههههههه
المهم نظرا لهذه النقلة التاريخية فى حياتنا
حبيت بس أستوضح بعض الأمور

بداية أنا مش عارف هتعامل ازاى مع السيارة يعنى بالنسبةللطلعة لو شديت علي السيارة يبقى غلط على آلات الجر وكده ولا ايه النظام مع الأوتوماتيك ؟؟
ولا عادى بالنسبة لفتيس CVT
دا غير ان أنا أصلا مش عارف هنقل ازاى -مش بعرف أشتغل على الأوتوماتيك !!؟

من ناحية النقلة .. فهى نقلة تاريخية فعلااااااااااا
وبصراحة نصيحة شخصية حاول تبطل تسوق ال504 شوية حلوين كده قبل ما تستلم على خير باذن الله عشان الاعراض الانسحابية بس للبيجو
وكمان ياريت تحاول تسيطر على نفسك انك ما تعملش مقارنات فى اى جانب من الجوانب عشان ما تتعبش بس وتتحسر على الايام اللى ضاعت هباء
بالنسبة للقاشقاى بقى وسواقتها .. سواقة الاتوماتيك اسهل بكتير للمانيوال
واللى يعرف يسوق مانيوال يسوق اتوماتيك عادى جدااا انما العكس طبعا لأ
مبدئيا الاتوماتيك كله عبارة عن فتيس بنقلات ورموز
P البارك ويستخدم فقط عند التوقف التام بالعربية يعنى عن ركن العربية وقبل اطفاء المحرك وللتنقل بينها وبين باقى النقلات لازم تدوس على الزر على جانب عصا الفتيس مع الضغط على دواسة الفرامل
R المارشدير وتستخدم عند الرجوع الى الخلف
N المور وهو فصل التروس ويستخدم فقط عند الوقوف فى الاشارات مع او بدون الضغط على دواسة الفرامل حسب سطح الطريق وميله ومعها يمكن شد فرامل اليد اذا كان السطح مائل بشدة
D الدرايف او التحرك بالسيارة واول ما تحط الفتيس عليها هاتحس ان العربية طالعة للامام ولما تشيل رجلك من على البنزين هتلاقيها مشيت بسرعة بسيطة ومن ثم تدوس بنزين
وطول ما انت بتتحرك بالعربية هاتفضل حاطط النقلة D ومالكش دعوة بأى حاجة هو بنزين وفرامل (فعلا زى عربية الملاهى)
وده افضل طبعا من النقل كل شوية زى المانيوال والدبرياج وغيرها بحيث تكون مركز فى ابعاد العربية والطريق لأن العربية جديدة عليك وابعادها مختلفة تماما عن البيجو
بالنسبة لفتيس القاشقاى CVT .. هو هو زى الاتوماتيك العادى فى التحكم وعصا الفتيس ورموز النقلات كما ذكرت بالسابق
لكن التكوين الداخلى هو المختلف بحيث انه مكون من بكرتين بينهم سير جنزير بيفتح ويقفل (اى يبعد ويقرب البكرتين من بعض) حسب السرعة وضغطك على البنزين واهم ميزاته انك مش هاتحس بنتشة الفتيس بين النقلات زى الاتوماتيك المعتاد المكون من 4 سرعات فى اغلب الانواع
بالنسبة للشد والقرص ع العربية من اول يوم .. طبعا لا يُنصح بتاتا لأن الاستخدام السيىء لأى حاجة مش العربية الجديدة بس بيقصف عمرها الافتراضى ومع الوقت بتتبهدل وتفقد زهوتها
وطبيعى انك مش هاتطلع امريكانى ولا تحرق على الموتور وتكبس بنزين للاخر ولا تتجاوز سرعة 90-120 كم/ س فى اول 1000 كم وينصح بعدم تشغيل التكييف برضه فى الاول وفى ناس بتشغله عادى جداااااااااا بدون اى مشاكل واكيد الاحمال تكون خفيفة يعنى دى ملاكى مش عربية نقل بضاعة تحملها وتكربسها وتقرص بيها وغيرها ... الخ
ملحوظة هامة: الافضل التعامل مع الدواسات البنزين والفرامل برفق وعدم الضغط بقوة وترك الموتور مع الفتيس للتسارع بسلاسة لأن الفتيس الCVT نظامه فى السواقة تلاقيه مع كبس البنزين الRPM او عداد لفات الموتور نط لل5.5-6 مرة واحدة والعربية بتزيد سرعتها مع الطريق وصعب انك تظبط رجلك من اول يوم فى انك ما تزودش عن 2.5-3 RPM خاصة فى اول الف كم وبالتالى الحل سيبك من كل ده وركز انك ما تضغطش جامد على البنزين ..

المشاركة الأصلية كتبت بواسطة محمد سعد عبده

حاجة تانية برضه : أنا مش عارف هتعامل ازاى مع المكيف !!؟

المكيف عادى جداااااااا والميزة انه الكترونى
كل ما عليك انك تظبط درجة الحرارة (مش اقل من 20 ومش اكثر من 26.. ده المعدل الطبيعى اللى بيحقق البرودة المطلوبة) وسرعة المروحة من 1 الى 4 (وفى النيسان تحديدا مش هاتزود عن 2 فى كل الاحوال) وهو عليه الباقى
وطبعا زرار اتجاهات الهواء .. وخليك دائما على زرار السهم المشير لوجه الركاب (افضل وضعية تبريد) مع تفعيل زر تدوير الهواء من الداخل RECYCLING وهتلاقى عليه سهم دائرى لتقليل الحمل على كومبريسور التكييف طول ما انت ماشى
فى حين تقفل الزرار ده وانت راكن العربية فى الشمس عشان تمدد هواء الكابينة بفعل الحرارة ما يضغطش على الزجاج ويسبب سرطان او شروخ على المدى الطويل (وقاية مش أكتر) ..

المشاركة الأصلية كتبت بواسطة محمد سعد عبده

حاجة تالتة : ياريت لو فيه خبايا فى السيارة حد يقولى عليها .
حكاية الكاميرا والبلوتوث والكلام ده برضه .
الأذرع برضه ( يعنى ذراع النور وذراع المساحات )
وهل السيارة فيها مثبت سرعة ولا لا ؟

القاشقاى بتنزل بدون مثبت سرعة (انا شايف انه مالوش لازمة فى مصر اساسا لأن مفيش طرق مفتوحة حرة بالمفهوم العالمى يعنى هنا فى السعودية تلاقى الطريق 800 كم مفتوح ومتأمن من الجوانب بسلك شائك لمنع عبور الجمال وللدوران للخلف يوجد مخارج جانبية قبل الملف اللى بيكون اما كوبرى او نفق)..
البلوتوث والكاميرا الخلفية وسنسور الركن الخلفى يمكن تركيبهم من التوكيل بعد الشراء ان شاء الله وهدفهم ركن السيارة بدون متاعب ويكفى السنسور فقط فى المقام الاول وبعد كده ممكن تركب كاميرا وشاشة عرض مع GPS زى اللى فى الصورة..
بالنسبة لأذرع الدركسيون .. هتلاقى ذراع المساحات ع اليمين وفيه تحكم متقطع مع ضبط التقطع كل كام ثانية (4 مستويات تقريبا) ومتواصل سرعتين وضغطه لرذاذ ماء المساحات
أما الانوار كلها فى الذراع ع الشمال وفيه انوار التابلوه والواطى والعالى والشبورة والرعاش والاشارات ..
بالنسبة للخبايا فى العربية .. دى هاتكتشفها بنفسك لما تستلم على خير وتقولنا عليها عشان نجاوبك ..

المشاركة الأصلية كتبت بواسطة محمد سعد عبده

يعنى مثلا أنا مؤخرا عرفت ان التحكم فى المصابيح يكون يدويا عن طريق زرار داخل السيارة ب 3 مستويات
الأول بيكون النور واطى أو ضارب فى الأرض والثانى والثال أعلى . شفت الكلام ده فى هوندا سيفيك 2012 .
فهل القاشقاى نفس النظام ولا ليها نظام تانى ؟

ده اسمه ياباشا .. تحكم فى ارتفاع الانوار الامامية وده زرار بتلاقيه على شمال الدركسيون فى التابلوه
وغالبا بيكون 3 مستويات (0 - 1 - 2)
0 الاستنادارد ويستخدم فى كل الاوقات مع حمولة السائق بمفرده او مع راكب امامى أو مع امتعة خفيفة فى الشنطة
1 وتستخدم مع ركاب اضافيين فى الكنبة الخلفية مع ما سبق
2 وتستخدم مع كامل حمولة الشنطة وما سبق
وفكرة عملها ووظيفتها.. هى الحفاظ على مستوى الانارة الامامية بغض النظر عن حجم حمولة العربية لأنه من الطبيعى لما تملى العربية شنط وركاب بتوطى من الخلف شوية وتلاقى المقدمة عليت شوية وبالتالى النور هايضرب فوق شوية وممكن يضايق السائق فى حجم انارة الطريق او السيارات المقابلة وهذا الزرار بيعوض اللى حصل ده للرجوع الى المستوى الاستاندارد تانى ..

المشاركة الأصلية كتبت بواسطة محمد سعد عبده

برضه مش عارف السيارات دى بيتغيرلها زيت كل قد ايه -وايه اللى ينصح بيه-
وهل بزودلها مية زى البيجو ولا لا !!؟

كل النيسان بتنزل بزيت يتم تغييره فى اول صيانة المجانية المصنعية بعد 1000 كم ويتم تفعيل الضمان بها
وبعدها يتم تغيير الزيت كل 10.000 كم حتى انتهاء الضمان عند 100 الف كم
وعندك انواع كتير جديدة زى ليكوى مولى - فالفولين - كاسترول
او قديمة زى موبيل وان وشيل وتوتال
وبعدها ينصح بالانتقال لزيوت ال5000 كم
كل العربيات الجديدة الزيرو بتنزل بمياه تبريد ملونة (اخضر او احمر) وتختلف فى خواصها عن المياه العادية وطبعا مفيش عيوبها زى الصدأ وغيره
عن تجربة فى عربيتى الصنى ما باحتاجش ازود مياه الراديتير من القربة بين الصيانات الدورية اللى بتتم كل 10 الاف كم
ولو نقصت عن علامة الmin لازم تزودها بنفس مواصفات المياه المستخدمة وليس مياه عادية من الحنفية

المشاركة الأصلية كتبت بواسطة محمد سعد عبده

يعنى اللى عنده معلومة بالنسبة للسيارة من الداخل ياريت ميبخلش بيها عنى -أخوكم محتاج هههههههه-

ولكم جزيل الشكر ...,

تحت امرك .. اسأل بس واحنا نجاوبك على طول ..