السلام عليكم يا نيسانوية ...
اخباركم ايه .. ان شاء الله تكونو باحسن حال ...
دا كدا تقرير عن صيانة 40000 الذي تلاه مشوار للغردقة و فيه تم اكتشاف مشكلة التكييف اللي هنتكلم عليها لاحقا في هذا الموضوع ....
أولا : صيانة 40000
تم حجز الصيانة مسبقا في مودرن موتورز الهايكستب ... و في المعاد كنت موجود ... المهندس استلم مني العربية ... قالي هيتم تغيير ( بوجيهات - فلتر هواء - مياه ردياتير - سيور - و ......) قلت له بس ... هوا قال تغيير زيت فتيس ... قلت له لأ ولا زيت الموتور تغيره - و القصة دي هنتكلم فيها - ... قاللي طيب فيه حاجة تاني ... قلتله اه .. عندي التكييف ما بقاش زي الاول ... حاسس انه بعافية حبتين .. راح كاتب و الكشف على التكييف ... و كمان غسيل موتور العربية ... قالي كده تستلمها 3:30 .. و كانت الساعة وقتها 11:00... قلت ماشي ...
في الوقت دا نتسلى لحد ما العربية تخلص اكلمكم عن قصة الزيوت ..
كان يا ماكان اول ما اشتريت العربية .. كنت على طول بغير زيت موبيل من مودرن .. لحد خير اللهم اجعله خير في صيانة ال 30000 قلت ما بدهاش ... رحت عامل الصيانة من غير تغيير زيت .. و طلعت على مركز شيل و رحت شاري جركن 4 لتر ... و غيرت شل ... بامانة و الله .. حسيت بفرق السما من الارض ... مع زيت موبيل كان صوت الموتور عاااااااالي جدا .. و كانت الغيارات بحس اني راكب دبابة ... و الغيارات كانت بتتأخر و صوت الموتور بينعر .. لكن اقسم بالله اول ما غيرت شل القصة اتغيرت تماما ... قلت يا واد اهدى ما تحكمش على الزيت بدري بدري كده ... و انا دلوقتي و انا ماشي عليه حوالي 12000 نفس الاحساس بتاع اول ما غيرته - مع تغيير بسييييط -
الموضوع حاليا اني بفكر اغير لفافولين مع اني مرتاح مع شل جدا لاني بالمرة عاوز اغير زيت الفتيس لفالفولين برده .. انتو شايفين ايه ... اشتري 2 لتر شل و اغير المرة دي شل و المرة الجاية ان شاء الله اجيب فالفولين ولا اجيب فالفولين و لو حد عاوز اللتر اللي فاضل معايا اديهوله و خلاص ... مستني نصيحتكم ...
معلش استأذنكم اصل المهندس بينده عليا ...
المهندس قالي .. خلاص الصيانة خلصت و تم تغيير الحاجات اللي قلنا عليها و كمان كشفنا على التكييف و كله تمام ...
.
.
.
.
ها .. اتاخرت عليكم ... اقولكم الصيانة اتكلفت كام ...
مصنعية 300
غسيل محرك 40
سير تكييف 158
سير باور 105.82
فلتر هواء 134.39
بوجيه (4) 68
مياه ردياتير (4 لتر) 62
الاجمالي 868.21
ضريبة مبيعات 86.82
مصروفات اخرى 10
الاجمالي العام (965) جنيه
و دا طبعا لسه زيت الفتيس و الموتور كمان ...
ثانيا : مشوار الغردقة و قصة التكييف ..
كنت عاوز اغير جو انا وواحد صاحبي .. بعائلاتنا الصغيرة .. 4 افراد ...
خرجت الصبح و مشينا ساعة كده من غير تكييف وبعدين قبل السخنة بشوية الدنيا بقت حر .. رحت مشغل التكييف ... و مشينا شوية ... عند الزعفرانة كده .. لقيت التكييف بقا يدي هوا بس من غير ما يتكيف ؟؟؟؟ المهم قلت ممكن فصل بيريح شوية و هيشتغل .. استنى انه يشتغل ما اشتغلش .. لحد ما وقفت شوية في استراحة و بطلت العربية .. و بعدين لما اتحركنا شغلت التكييف اشتغل بس بتبريد بسيييط جدا برده .. واخره ربع ساعة و فصل ... مع العلم كان متوسط السرعة (130 كم)
من الاخر .. كان شكلي وحش جدا ... بسبب التكييف دا ...
و بعد ما قضينا 3 ايام بالغردقة .. و انا بتحرك .. قلت اكشف على العجل .. رحت توكيل بريدجستون بقوله .. عندك نيتروجين ... قالي اه .. قلت له اظبط لي اللي قدام 34 و اللي ورا 31 .. الراجل بيحط الخرطوم في الفردة الامامية و انا عيني على الشاشة الاقيها 43 شاف فردة تانية لقاها كده برده .. يالهوي .. ايه دا ... مع اني كنت ظابطها قبل يومين من مشوار الغردقة ( يعني قبل ما اروح الصيانة بالتوكيل بيوم ) جه في بالي بقا انهم في الصيانة بيزودو الفرد عشوائيا على اساس انه تبع الصيانة يعني .. ولا انا غلطان... المهم قلت له نزل نزل يا عم الحاج .. يعني انا بسأله على نيتروجين علشان ينزل من عندي انا :(.....
ثالثا : توكيل نيسان
بعد ما رجعت من الغردقة بيوم .. لقيت توكيل نيسان بيتصو بيا و يقولولي بنطمن من مستوى الخدمة في صيانك اللي فاتت يا فندم .. قلتلهم ... ما فيش عادية ,, غير ان التكييف اللي قلتلهم يكشفو عليه و قالو كشفنا و تمام .. مش شغاااااال ... قالولي هنكلم التوكيل و نرجع لك ...
و بالفعل خلال ربع ساعة واحد من مودرن اتصل بيا .. قالي احنا بنسال حضرتك عن شكوى التكييف .. قلتلهم اه مش شغال .. قالولي خلاص حضرتك تشرفنا في اي وقت .. قلتلهم ان شاء الله يوم السبت الجاي ان شاء الله ...
بالمناسبة .. انا زعلااان جدا بقالي يومين .. علشان كنت مسجل على الموبايل كل تفويلات البنزين و عداد الكيلو مترات بقالي شهرين .. لكن من يومين الموبايل بقا يهنج .. قلت اعمله ظبط مصنع .. جيت النهاردة بفول بنزيت و بفتح الموبايل لقيت كل حااااااجة ضاعت ,.... القرايات اللي حيلتي راااحت ...
لكن المتوسط بتاع استهلاكي اللي كنت حاسبه بيتراوح كل تفويلة من 240 الى 265 لتر بالصفيحة حسب نوع قيادتي كل فترة ... المعظم قيادة عادية متوسط سرعتها 90 الى 100 و التكييف 50% من الوقت و طرق مفتوحة ( طريق اسماعيلية الصحراوي)
بالنسبة بقا لاستهلاك مشوار الغردقة ... لو قلنا ان المسافة المقطوعة حوالي 450 كم و تم التفويل بعد ذلك 39.46 لتر ..بمتوسط سرعة 130 كم و تكييف ( المفروض انه شغال على 4 بس ما كانش بيبرد) .. يصبح الاستهلاك 228 لتر في الصفيحة
بس ... مستني اراءكم و نصايحكم و خاصة في موضوع الزييييييت ...
بس خلاص ..
المفضلات