الموضوع: ليه لالمانى القديم بيسخن واليابانى لا؟

المشاركة الأصلية كتبت بواسطة kamaro

السلام عليكم ورحمة الله وبركاته

ليه الالمانى القديم زى الفليشيا بيسخن بطريقة فظيعة وخصوصا فى الحر والعرييات اليابانى مش بتسخن هى مسالة تصميم دورة التبريد داخل الموتور ولا نوع الخامة المصنع منها الموتور هى اللى بتفرق؟ ولو فى تعديل فى دورة التبريد خلاف تغيير الريداتير بنوع افضل ومروحة التبريد يكون حل جذرى لموضوع ارتفاع الحرارة

كل اللى حضرتك قلته
1/تصميم دوره التبريد فى اليابانى ابسط و مفتاح تشغيل المروحه جوه الكوعه بتاعه الثرموستات او بالبلك فبالتالى بتشتغل اول لما الحراره تعلى وده بخلاف الالمانى اللى مفتاح تشغيل المروحه بعد خروج الميه البارده من الرادياتير - اغلب الموديلات -
2/الخامه المصنع منها البلوك بتختلف الالمانى ثقيل و ده بيحتاج درجه حراره تشغيل اعلى - الفيكترا مثلا المروحه تفتح عند 93 الى 95 و اليابانى عند 88 و تقفل عند92
3/الرادياتير ايابانى معظمه متصمم على وش العربيه اى مقطع التبريد اكبر بكثير و الخامه اخف
4/معظم نظام التبريد اليابانى بيعتمد على مروحتين امام السياره للتكييف و خلف الرادياتير للرادياتير فى حين معظم و ليس كل الالمانى بيعتمد علة مروحه خلف الرادياتير 2 سرعه و مروحه صغير ه امام السياره للتبريد

الخلاصه
العنصر الفعال فى موضوع التبريد و الاهم من وجهه نظرى - سائل التبريد - اللى هو بيغلى عند 136 متوسط و التركيز بنسبه 50 %
يعنى فى الالمانى لما توصل الحراره 95 و تفتح المروحه منقلقش لان الموتور موصلش لدرجه الغليان او السخونه العاليه .
تحياتى..

خامه البلوك هى الاساس
المازدا ال 323 تمانينات خامته عجيبه قوى الموتور مابيسخنش خالص

وحتي لو العربية سخنت لدرجة 1000 درجة مئوية (طبعا مستحيل توصل للدرجة دي والا هتلاقي الموتور بقي سائل)
بس حتي لو !! انت ايه مشكلتك ؟؟؟
كل عربية وليها درجة حرارة تشغيل معينة صممها عليها الخواجة الي صنعها واي تغيير او لعب في التصميم الأصلي هيتعبك وهيبوظ العربية علي المدي الطويل

ودرجة حرارة التشغيل بتختلف من عربية لعربية حسب عوامل كثيرة جدا (طبعاً مش منها درجة حرارة بلد المنشأ زي ما اغلب الصنايعية الفتايين بيقولوا) ومن هذه العوامل كما ذكر اخي محمد عبدالجليل هي خامات البلوك وطول وقصر دورة التبريد وتصميمها ولكن الأهم في كل دوول هو البلوك واللي بناء عليه بيحدد لك انسب نوعية زيت محرك وهل هو متعدد الدرجات ولا احادي الدرجة وانسب لزوجة واي تغيير في تصميم دورة التبريد هيخلي الزيت مايشتغلش كما هو مصمم له

انت اقصي شكوي ممكن تشتكيها بسبب ارتفاع درجة الحرارة هو تقليل كفاءة التكييف في التبريد وتأخر تبريده

لكن بخلاف ذلك مالناش اي دعوة بدرجة حرارة المحرك طالما لم تتخطي الأحمر

وعلي سبيل المثال
الشيروكي ومعظم الأمريكاني (ماتقوليش درجة حرارة بلد المنشأ - امريكا فيها حتت مناخها اسوء من مصر)
الشيروكي ماتقدرش تلمس الكبوت بتاعها - مش هقولك تفتحه

لذلك كبر دماغك وحاول ترجع عربيتك علي أصولها زي الخواجة ما صممها ودة هيبقي افضل الحلول لكل مشاكلك ان شاء الله

تحياتي