محتار بين البيجو 508 والمرسيدس c180 ,, ال 2013

**abou-yahia** · 19-09-2012 03:02 PM

بص حضرتك

انا معايا بيجو 406

العربيه ديه لما نزلت نقدر نقول انها تساوي دلوقتي ال 508

ده رااي

طيب

البيجو لما نزلت موديل 2004 مثلا نقارنها ب c180 موديل نفس السنه حنلاقي ايه

كانت ال 406 من 240الف الي 280 الف علي ذاكرتي وسعرها دلوقتي يتراوح حول 80 الف حسب الحاله طبعا .

تعالي بقه لل c180 تعمل حوالي 150 الف

كمل انت الباقي

المرسيدس في مصر ليها كلام تاني خالص

ميزه البيجو انها بتديك ركوبه محترمه جدا لفتره زمنيه كويسه بتكلفه كويسه

وبلتوفيق في الاختيار

**asadx100** · 21-09-2012 10:42 AM

السلام عليكم ورحمة الله وبركاته

جمعه مباركة عليكم جميعا

مازلت أنتظر رؤياكم ووجهات نظركم في السيارتبن

جعلكم الله سبب استفادة لي

**asadx100** · 21-09-2012 10:44 AM

مين اشترى البيجو 508

ورأيه فيها ايه ؟

عايز حد يقولي أخبارها معاه ايه بالتفصيل

**Ahmed Selim** · 21-09-2012 11:21 AM

هى مقارنة غريبة شوية.........دى فئة و دي فئة...........و هو ده سبب الحيرة.

يعني أنت لو بتقارن ال 508 بال e مش هتكون فى نفس الحيرة دي.

بص يا سيدى الفاضل.....

أنت أهم حاجة عندك فى العربية على حسب كلامك..........أنها تكون عائلية.....إستجابة موتور كويسة و كمالياتها عالية..............كل ده هتاخده فى البيجو............عدا الإعتمادية اللى ممكن تكون أقل من المرسيدس شوية ( مش معنى كده أنها وحشة )

مصاريف الصيانة للمرسيدس هتكون أعلى.

سعر إعادة البيع للمرسيدس أعلى...........بس سعر الشراء برضه أعلى بفرق كويس.

فيه حاجات المرسيدس هتكون متفوقة فيهم على الأغلب........زى الثبات.....و ممكن التسارع........ده غير الأحساس أنك راكب مرسيدس..........النجمة الفضية.

الحل عندك............أنت تقدر تستغنى عن أيه مقابل أيه.

أنا عن نفسي لو مكانك و جبت ال 508 هفضل افكر فى ال C و أقول مش كنت جبتها أحسن
و لو جبت ال C كل ما ألاقي حاجة مش موجودة فيها و موجودة فى ال 508 هفضل أقول مش كنت جبت ال 508 أحسن
هههههههههههه الإنسان ميملاش عينه إلا التراب صحيح :)
بس بصراحة لو جبت ال C إحساسي بتأنيب الضمير هيقل :)

على فكرة أعرف واحد معايا فى الإمارات لسه جايب 508 و كان راكب قبلها أرمادا.........ركبتها معاه و عجبتني مش هقولك لأ.........و بسأله عليها قالي أنها حلوة و انه مش حاسس أنها 1600 خالص و أستهلاك البنزين كويس جداً............إجمالاً هو بيشكر فيها..........العربية معاه من شهرين أو 3 و مفيش مشاكل قابلته.

و هو برضه جايبها علشان ينزلها مصر.

**Ahmed.Fahmy** · 22-09-2012 06:12 AM

شوف يا باشا انا هجيبلك من الاخر... اعمل استخارة.... دا اول شئ

انا هحاول اوصللك وجهة نظرى

بالنسبالى العربيات تتقارن كدا

1- مواصفات الموتور
2- الوسع الداخلى
3- مواصفات داخلية وخامات وتقفيل داخلى
4- مواصفات خارجية وشكل خارجى
5- متانة الجسم
6- الوزن
7- الكماليات
8- الثبات
9- الفرامل
10- التسارع
11- عوامل الامان
12- الصيانات
13- الساوند سيستم
14- الاضائة
15- السعر
16- اعتبارات اخرى
17- التقفيل

1- الموتور
البيجو 156 حصان بعزم 240 نيوتن/متر تقريبا نفس الOutput بتاع ال BMW 320i وال مرسيدس C180 بس خد بالك ان دا اقوى موتور للبيجو (فى الشرق الاوسط) هو اول موتور فى المرسيدس يعنى الموتور اللى بينزل فى اعلى البيجو هو الموتور اللى بينزل فى اول المرسيدس

2- الوسع الداخلى
فى كل العالم الوسع دا حاجة مهمة جدا للعائلات فاكيد الحجم باين

3- مواصفات داخلية وخامات وتقفيل داخلى
اعتقد الاتنبن فى نفس المستوى مع استخدام خامات اعلى فى البيجو لانها الLuxury car بتاعة البيجو اما المرسيدس فالـ C هى البداية

4- مواصفات خارجية وشكل خارجى
اعتقد الاتنين بردو جامدين جدا فى الشكل الخارجى والتفيل ودى اذواق (المرسيدس شكلها شبه اللى من 3 سنين اما الـ 508 اول ظهور)

5- متانة الجسم
البيجو صاجها اضعف ويستخدم الفايبر فى اجزاء كتير فيها

6- الوزن
بردو الوزن تقريبا واحد بفرق اقل من 100 كجم

7- الكماليات
اكيد فى صالح البيجو لانها الLuxury car يعنى فيها كل الاختراعات الAvailable بعكس الC اللى بتطلب اوبشن وتدفع تمنه

8- الثبات
الثبات لصالح المرسيدس مقارنة بالبيجو

9- الفرامل
الله اعلم بالمرسيدس بس البيجو فراملها ممتازة بعد ما تطبع (بعد 1000-1500 كم)

10- التسارع
بردو التسارع هيكون قريب جدا من بعض والفرق بينهم يبكون بسبب اختلاف الوزن وتكنولوجيا الفتيس وليس الموتور وكذلك الTop speed

11- عوامل الامان
بردو الاتنين قريبين من بعض مع وجود بعض التكنولوجيا الزائدة فى المرسيدس ولكن الموجوده فى البيجو كافية جدا

12- الصيانات
صيانات وقطع غيار البيجو ارخص خصوصا ان التوكيل الجديد بيحاول ان يستعيد ثقة الناس.... طبعا كمان فى مصنع فى الصين لبيجو يعنى قطع غيار Original وببلاش (اقضد الفوانيس والاكسدامات وهكذا)

13- الساوند سيستم
واحد فى الاتنين من حيث توزيع الصوت (الSurrounding وعدد السماعات)

14- الاضائة
الاتنين واحد بس فى حالة الزينون فى المرسيدس ولكن فى الحالة العادية البيجو افضل بسبب الDynamic lighting

15- السعر
البيجو ارخص بفارق ممتاز نسبة الى القيمة

16- اعتبارات اخرى
اعتقد المرسيدس فى مصر برستيج اجمد لكن لو ال508 ما انتشرتش زى الباسات كدا هتفضل قيمتها عالية بردو لان كل الناس مش عارفه ايه العربية وبتلفت نظرهم اكتر من المرسيدس اللى اتحفظت فى مصر.... بس بردو فى الفكرة المشهورة فى نفس كل الناس (منهم انا) المرسيدس مرسيدس بردو

17- التقفيل
ودا حاجة مهمة جدا، المرسيدس مصرى وال508 تحديدا فرنسى 100%

شوف انا لو كنت لسه ما عنديش اسرة واولاد كنت اكيد هجيب المرسيدس او ال320 عشان "النفس" لكن حكم احتياجى الى الوسع وبردو الاوبشن والدلع خلانى اخترت ال508 بردو بسبب الاستخارة.

والله الموفق

**Ahmed.Fahmy** · 22-09-2012 02:54 PM

عينى يا افندم

عامة العربية عالية عن الارض ولا تفرق معايا مطبات

امبارح سافرت من القاهرة الى الساحل الشمالى مع زوجتى ووالدتى واختى والاولاد والشنطة Fully loaded ومافيهاش سسنتى فاضى وتقريبا لم يتأثر السحب مع التكييف وكنت بشد مع 320 طول الطريق تقريبا وهو لوحده وبجيبه واعديه بسهولة، لكن العريبة نزلت الى حد ما من ورا لكن ما حكتش فى المطبات الا العالية لما اخدتها بسرعة نسبيا (اللى فى مدينة الحمام) بس فى الطبيعى من غير كل الحمل دا ولا الهوا على نفس المطبات..... بس الاستخارة اهم حاجة فعلا.....

اصل الC180 وهم :))

بالمناسبة كان فى C180 كمان على الطريق ..... وهمية الصراحة..... مع انها كان فيها اب وام واطفال راكبين على كتف بعض... هههههههههه بس بردو وهمية