الموضوع: تقرير 2x1 على السريع استابلايزر واستهلاك الصنى للبنزين

يا اعزائى الصقور ...

إليكم اخر الأنباء . انا اتوكلت على الله و روحت السبع النهارده و ركبت الميزان أخيرا الحمد لله. كان عندهم زحمه مش طبيعيه احتمال علشان اول الاسبوع و مع انى كنت حاجز الساعه ٩ مشيت من هناك الساعه ٤ تقريبا و لسه سايب ناس كتير هناك :)

الشىء الجديد بقى ان المهندس لما قلت له انى عايز اركبه و العربيه ex قاللى هو فيه ايه؟ انت رابع واحد يجيلى و عايز يركبه اتنين ركبوه الاسبوع اللى فات و انا النهارده و كان فى معايا واحد تانى بي ما عرفتش هو مين.

المهم هو قاللى ان الميزان نفسه خلص من عندهم فقلتله ما انا عارف و كنت مشتريه و جايبه معايا و قاللى انه معندوش التيش بس هو هيبعت يجيبه من المخازن بتاعتهم فى المعراج و فعلا بعت جابه و ده اخرنا فعلا . المهم انا كنت سألت عن المصنعيه بالتليفون عندهم للتركيب من كام يوم و كمان فى اوتو ايجيبت و السعر كان ٢٢٥ جنيه بس لما سألته كام راح قايللى ٤٠٠ جنيه فقلت له الرقم ده مش مضبوك فقالا انه مركبه للى قبلى بالسعر ده و دخلنا فى مجادله سريعه انتهت لصالحى فى الاخر الحمد لله (بس الحركه دى ضايقتنى منهم لانى حسيت فيها بنوع من الاستغلال ) و استلموا العربيه و قعدت زى ما قلت لكم الى الساعه ٤ مستنى و فى الاخر استلمت العربيه و تكلفه قطع الغيار بالضريبه و المصنعيه كانت 624.8 جنيه ( 225 جنيه مصنعيه + 400 جنيه قطع غيار ) و الكلام ده طبعا بدون ثمن الميزان نفسه لكن شامل الضريبه

بالنسبه للانطباع المبدأى بعد التركيب فمن خلال التجربه - مع العلم بانى كنت جعان جداً و خللت من القعده جوه التوكيل شويه فى الجنينه اللى بره و شويه فى الدور الاول و التانى - الا انى حسيت ان العربيه كأنى ركبتلها لجام ، يعنى التحكم فيها بقى عامل زى السوبر صالون اللى جربتها فعلا و بطلت الرعونه فى الملفات الجامده اللى كانت بتعملها و الدركسيون بقى احسن فى دقه التوجيه و بيلف على مراحل و العربيه ما بقتش بتميل قوى و انا بلف ملف جامد و على سرعه زى الاول و كمان لاحظت ان العربيه عليت حاجه بسيطه من قدام ( مش عارف sonasteel و aboamr عندهم نفس الانطباع و لا ايه)

المهم الحمد لله الموضوع عدى على خير و العربيه تحت التجربه دلوقتى و انا عارف ان فى بعض الصقور قالتلى ممكن اشترى قطع الغيار و اروح لحد يركبهم بره بس انا فضلت بصراحه التوكيل فى النهايه و حبيت انقل لكم التجربه و عندى فضول اعرف مين الناس التانيه اللى ركبته دى. و عقبال عندكم جميعا و السلام عليكم

نداء الى اخويا powert : سامحنى من فضلك العربيه كانت دخلت لما قرأت رساله حضرتك بس انا تحت أمرك فى اى وقت