الموضوع: سبب ارتفاع اسعار هيونداي

المشاركة الأصلية كتبت بواسطة se_coralsea

ههههههههههههههه

موضوع فرامل الفيرنا و اللانوس قتل بحثا في المنتدي قبل كده
و انا كان معايا لانوس 2006 و بصراحة عمري ما أشتيكيت من الفرامل لكن أعتقد أنها بتعتمد علي أسلوب القيادة

يعني ..
- أنا مثلا من النوع اللي سواقته هادية و قبل المطب أو الخطر بأشيل رجلي من علي دواسة البنزين و ابدأ أضغط فرامل بالراحة وواحدة واحدة لحد ما أقف قبل المطب أو العربية اللي قدامي بمسافة كافية

- لكن فيه ناس بتفضل تجري بالرغم من أنه شايف المطب أو الطريق واقف لحد مايدخل و يفرمل مرة واحدة و يا يقف يا يلبس و النوعية دي من الناس يرجع يشتكي و يقولك أصل الفرامل وحشة و التيل بيخلص بسرعة

أظن العيب مش عيب عربيات و لا فرامل بقدر ماهو عيب من الناس اللي مش عارفة تستخدم العربيات دي صح


انا طبعا بأعتذر لصاحب الموضوع اننا خرجنا عن السياق الأصلي لموضوعه لكن بأوعده أن يتم فصل تلك المشاركات عن الفرامل و النواحي الفنية للسيارات في موضوع منفصل أذا هو وافق طبعا

معلش يابشمهندس عنك فى الحتة دى ولو انى مبحبش ادخل فى المواضيع الجدلية اللى ملهاش لزمة بس بصراحة مقدرتش امسك نفسى يمكن علشان معايا لانوس وحافظها وياما اتلسعت من فراملها :)

مينفعش فى ظروف السواقة العادية اللى هوا انا ماشى فى شارع فاضى وداخل على مطب او طريق واقف اودامى وشايل رجلى من على البنزين قبلها ب 2 كم وبهدى قبلها بكيلو واقول انا بالنسبالى شايف الفرامل كويسة ومشتكتش منها !!!! دة لو بتوكتوك مش هيبقى عندة مشكلة فى الفرامل فى الحالة دى

اختبار الفرامل فى المواقف الصعبة , لما حد يقف اودامك فجأة , واحد يكسر عليك تفادية تلاقى عربية جاية فى وشك , ........ هى دى المواقف اللى تقيم الفرامل عليها ومش محتاج انك تبقى لابس خوذة وداخل سباق علشان تتعرض للمواقف دى لأن كلنا بنشوفها كل يوم , واللانوس فى النقطة دى ضايعة لأسباب كتير فى غنى عن ذكرها وعارف انى لما بنزل من الفكترا او الفوكاس واركبها بحس انى راكب مرجيحة بس بالنسبة لسعرها انا مش مستنى منها اكتر من اللى بتقدمة
وانا شخصيا عملت حوادث وكنت هعمل بيها حوادث اشد بسبب فراملها لولا ستر ربنا ولولا ان فى مواقف كان فيها مجال للتصرف ( حتى لو بالـ هاند بريك ) - على فكرة العربية لسة موجودة علشان متقولش انى بعد ما بعتها بسب فيها

عارف اسلوب المقارنة اللى حضرتك بتقولة عامل زى واحد راكب عربية ايا كانت وماشى فى خط مستقيم وقفل عدادة لمدة دقيقتين وعمال بيقول شعر فى الثبات " وما اكثرهم "

او واحد تانى عمال يمجد فى تكييف عربية معينة وانة ديب فريزر علشان شغل التكييف فى الشتا الساعة 2 بليل ومستحملش التكييف من السقعة فا طفاة

واحد صاحبى معاة النترا 2011 بيسب ويلعن فى فراملها وطلع بيها مرة فوق الرصيف راح بعدها غير الجنوط والكاوتش لمقاس اكبر علشان " يحاول " يحسن من الفرامل وانا شخصيا جربتها وجربت الـ 2008 , جرى اة ثبات وفرامل لأ

والامثلة كتير على الحوارات دى

وياريت نسيبنا من جو قطع الغيار ونار ومش موجودة والكلام دة لأن راحت علية , ياريت ننزل على ارض الواقع ونقارن اسعار قطع الغيار ( توكيلات مع بعض ) مع فارق العربيات والجودة ونشوف الفرق
كمثال انا عايشة وبسمعة كل يوم وبقعد اضحك , الناس بتقشعر لما بتسمع اسم فورد حيث قطع الغيار اللى مش موجودة ونار ومش عارف اية كمان ..... نفس الناس دى اللى عمرها ماركبت عربية فورد ولا تعرف عنها حاجة لما بتسمع امثلة لأسعار قطع الغيار " من التوكيل " اللى فى منها ارخص من عربيات يابانى وكورى وفئات اقل كمان بيتصدموا !!



حاجة على جنب مش عارف لية بحس دايما وانا داخل قسم نيسان او هيونداى ان فى حالة غريبة , معظم الاعضاء بتاخد اى نقطة سلبية على العربية على صدرهم اوى وكأنهم شركاء فى الماركة او العربية دى حد من قرايبهم مثلا
دايما فى مقارناتهم بحس ان نيسان وهيونداى بيعملوا عربيات مفيهاش غلطة