الموضوع: فك وتنظيف حساس الماب (الأير-ماس) خطوة خطوة - بالصور

السلام عليكم ورحمة الله وبركاته

النهاردة ان شاء الله هنشوف ازاي نفك وننظف حساس الماب MAP (الأير-ماس)
وقبل ما نشتغل كنا عايزين نعرف شوية معلومات حول هذا الحساس ودوره في منظومة تغذية المحرك بالوقود اللازم.

حساس الماب MAP دة اختصار للمصطلح Manifold Absolute Pressure ومعناها مقدار الضغط داخل الmanifold واسمه الصح المذكور في الكتالوج هو inlet manifold pressure/inlet air temperature sensor.
والحساس دة واحد من ضمن حساسات كتير موجودة في المحرك الذي يعمل بنظام التحكم الألكتروني ودوره هو امداد الكنترول ECU بمعلومات لحظة بلحظة عن ضغط ودرجة حرارة الهواء داخل المانفولد وبعد كدة المعلومات دي يستخدمها الكنترول في حساب كثافة الهواء وتحديد معدل سريان كتلة الهواء الداخلة للمحرك ودة طبعا هيخليه يحسب كمية الوقود بالضبط اللازمة للأحتراق الأمثل.

طب وامتي هحتاج اغيره او علي الأقل انظفه ؟؟
1- لما تحس بعدم انتظام في المحرك او بمعني ادق لما الأر بي ام يبقي مش مظبوط وبيطلع وبينزل
2- لما تحس ان العربية بتكتم معاك في السحب او تحس ان في فقد لما بتدوس بنزين علي سرعات

الأدوات المطلوبة

بيبة 10
مفك صليبة
مفتاح نجمة سداسية مقاس 120 (ثالث مقاس في الطقم الصغير)
سبراي تنظيف بوابة ماركة جانك

الخطوات

1- هنفك غطاء المحرك الأسود بالبيبة ال10 من المسامير الثلاثة بتوعه



2- هنفك العمة من المسامير ال4 الخاصة بفك العمة من المنافولد ونفك منها خرطوم فايظ الزيت من اسفلها



3- هتلاقي الحساس علي شمال المنافولد كما هو موضح في الصورة



هنفك المسمارين بتوعه بالمفتاح النجمة



4- بعد فك المسامير هتشد الحساس من اجنابه وليس من الزور بتاع الفيشة لأنه ضعيف من الجزء دة - وطبيعي هتلاقي سنة مقوامة نظراً لوجود جوان حول مدخل الحساس في المنافولد لمنع تسريب اي ضغط هواء بداخل المنافولد.



5- هتفك الفيشة بتاعته من اللسان الموجود بالأعلي ولو اللسان مكسور زي عندي هنستخدم مفك عادة وننطر الريشة من اللوك بتاعها ونفك الفيشة.



6- هنرش الحساس بالأسبراي وننتظر من 3 دقايق لحد 5 دقايق عشان نتأكد من تطاير الأسبراي ونتأكد من جفاف الحساس تماماً من أثار اي مواد منظفة (علي فكرة ممكن تنظيفه بالبنزين او ب wd-40)



التركيب

هنركب الفيشة ونركب الحساس (الفيشة لأعلي) ونربط المسامير (مش لازم تقرط عليها اوي لأنك بتربط في بلاستيك جسم المنافولد)

ودي شوية صور للموضوع








أتمني يكون الموضوع عجبكم
وأشوفكم علي خير ان شاء الله في تجربة جديدة وصيانة جديدة بأذن الله

والله المستعان
،
،