الموضوع: دواسة الدبرياج بتزييق

الزملاء zemoss و Proper1981
هل معنى كده ان سبب التزييق حاجة جوه الدبرياج نفسه؟ ممكن يكون ايه؟

طيب ايه التفسير ان العربية بتطلع من التوكيل بعد الاصلاح بدون تزييق ، ثم يعود التزييق بعد عدة ساعات؟

خدوا عندكم النكتة دى ..

النكتة دى .... جديدة ..

• ضمان الدبرياج 3 شهور

بام بارا بارام ... بام .. بام

وكمان دى :

• طقم الدبرياج بـ 1900 جنيه

بام بارا بارام ... بام .. بام

ودى كمان :

• مهندس فى التوكيل: الدواسة بتزيق ، اديها تزييت ، رجعت تزيق ، اديها كمان تزييت ، وعيش يا معلم .. عايز تخلص غير طقم الدبرياج.

محدثكم من توكيل العبور : Egyzizo

شوفوا .. أنا كنت فى التوكيل من 5 ايام باغير البوابة ، وقلتلهم على تزييق الدبرياج وعملوه .. ورجع تانى ..

وكنت هناك النهارده باغير الطنبورة ، فقلت لهم على التزييق تانى ، ولحسن حظى انهم نسيوه.

فلما استلمت العربية ، ولقيته لسه ما اتعملش ، قلت للاستقبال ، فبعت لى ميكانيكى من جوه يعمله للعربية وهى واقفة بره.

الميكانيكى جه ، وجاب معاه wd40 + برطمان شحم أبيض.

وما اشتغلش غير فى حتة واحدة ، وهى اللى فى الحوض اللى كان قال عليها د. أحمد عبد الرحمن وهى دى مربط الفرس بعيد عن الدواسة نفسها.

الميكانيكى شال جلدة سمرا ، ورش wd40 بغزارة ، وبعدين أخد الشحم الأبيض وقام بتشحيم البيضة كويس، هو قال اسمها كده.

والنتيجة ان التزييقة راحت تماماً
أنا عارف انها هترجع سريعاً
بس الفكرة انى اطمئنيت ان اللعب كله من بره ومافيش مشاكل جوه الدبرياج نفسه.

أنا تفسيرى للموضوع كالتالى :
المنطقة دى فيها احتكاك وشد ، ولازم تكون متشحمة باستمرار
وكان لازم يدخلوها فى الصيانات الدورية بأنهم ينضفوها من التراب ويعاد تشحيمها بشحم نظيف كل 10 آلاف كيلو مثلاً ، وده مابيحصلش للأسف.
والنتيجة ان كتير مننا نتيجة الاحتكاك بدون تشحيم مثالى لأن شحم الفابريكة اتطين ونشف مع الزمن ، حصل خشونة عندهم فى منطقة الاحتكاك دى (فى البيضة اللى الميكانيكى قال عليها) ، وعشان كده أسطح الاحتكاك أصبحت غير مثالية للعمل والتشحيم مابقاش يخليها تعمل بكفاءة لفترة طويلة.

أما الناس اللى غيرت طقم الدبرياش أو تم نصحهم بذلك للتخلص من التزييق (وأنا منهم) ، فدول التوكيل بيريح دماغه معاهم ، بأنه يستبدل البيضة المتآكلة دى ، بواحدة جديدة ، ولأنها متصلة بمجموعة الدبرياج من الداخل فلابد من تغيير المجموعة كاملة ، وبكده تتحل المشكلة.

فأنا شايف ان الموضوع بسيط ومش مستاهل تغيير طقم الدبرياج ، وأدينا عرفنا السكة وممكن نشحمها بنفسنا كل أسبوعين تلاتة ، أو كلما زاد التزييق ، ومين عارف ممكن نلاقى نوع شحم Heavy Duty ذو كفاءة عالية يستمر لفترات أطول (موضوع الشحوم ده علم لوحده على فكرة).

............