السلام عليكم و رحمه الله و بركاته
كل عام و حضراتكم بخير ربنا يتقبل منا و المسلمين جميعا الصيام و القيام و صالح الاعمال
انا فتحت الموضوع الجديد دة كما هو واضح من العنوان لإضافة الاخت الصغيرة الهاتشباك الميجان 3 للرابطة و بألاصالة عن نفسي و بالنيابة عن جميع حائزى الفلوينس السيدان برحب بإخواتنا حائزى الميجان 3 و اتمنى من ربنا يقدرنا و نكون جميعا (و انا بتكلم بصيغة الجمع بالنيابة عن جميع اعضاء الرابطة) خير عون لكل من يمتلك اي من العربيتين او حتى للى بيفكر فى امتلاك احدهما و عايز يعرف اى معلومة عن العربيتين او حتى بيشتكى من اى عيب و عايز مساعدة او معلومة تطمنة و تعرفة كيفية التعامل مع العيب دة
و دة رابط الموضوع القديم رابطة حائزى الفلوينس علشان ما نخسرش المجهود المبذول و المعلومات القيمة فى المشاركات السابقة
http://www.nilemotors.net/Nile/14708...post3873702947
بالتوفيق للجميع ان شاء الله
.................................................. ..................................*


السلام عليكم و رحمه الله و بركاتة
تمت بحمد الله صيانة ال 20,000 و التكلفة بالكامل في صورة الفاتورة المرفقة


طبعا حتلاحظوا ان الفاتورة فيها تكلفة زيادة خاصة بتغيير تيل الفرامل و فلتر التكييف
انا قبل ما اروح كنت بشتكى من حاجتين مؤشر البنزين ما كانش بيدى قراية مظبوطة لما بفول و كمان كنت بسمع صوت شخلله خفيف فى الشوارع اللى فيها مطبات كتيرة
تم علاج مؤشر البنزين بإعادة برمجة الكومبيوتر و تنظيف حاجة بصراحة مش فاكر اسمها اية و عن اسبابة قالولى البنزين فى مصر بيكون فية نسبة رصاص عالية و دة السبب فى عدم القراءة بدقة و الله اعلم اذا كان دة فعلا السبب لكن الحمد الله ظبط معايا دلوقتى
اما الصوت فكان على حسب قولهم بسبب صاجة قدام تحت الاكصدام محتاجة تتربط و الحمد الله مابقاش فية اى اصوات
بالنسبة للتيل انا الحمد الله ما كنتش بشتكى من الفرامل خالص لكن لما سألت على معدل تغيير التيل قالولى كل 20,000 بزيادة او بناقص 5000 على حسب استعمال كل واحد بالنسبة ليا التيل كان ممكن يستخدم كمان 3000 او 4000 كيلو لكن علشان الامان و كمان انا ماكنتش حروح الصيانة غير بعد 5000 كيلو على الاقل فوافقت على تغييرة
اما فلتر التكييف فبرضة ما كنتش بشتكى من التكييف فى حاجة بس لقيت علية تخفيض 20% و الصيف داخل فقلت اغيرة بالمرة
و طبعا ما نسيتش اسأل على السوفتوير الجديد الخاص بالفلوينس و الاجابة بالفعل فى سوفتوير جديد لكن مش لكل العربيات هما بيعملوا كشف على سيريال العربية و يشوفوا اذا كانت محتاجة للتحديث و لا مش محتاجة
المهم انا عربيتى طلعت من العربيات اللى محتاجة للتحديث
السؤال بقى التحديث دة خاص بأية
الاجابة انة تحديث خاص بالايرباجز و توقيت عملها فى لا قدر الله الصدمات الامامية و كمان معدل انتفاخ الهواء فى الايرباج
حقولكم على معلومة للى مايعرفهاش الايرباج الخاص بالفلوينس نوع متطور مش مجرد ايرباج بيتنفخ فى حالة الصدمة و خلاص لكن كمان قوة انتفاخة مرتبطة بقوة الصدمة و دة اللى بيقيسة كومبيوتر العربية ربنا يكفينا كلنا شر الحوادث
اتمنى انى اكون افدتكم و اللى عندة اى استفسار انا تحت امره
بالمناسبة حصل فعلا تغيير فى اسعار الصيانة و قطع الغيار حقول لكم على تفاصيلة فى الموضوع المثبت الخاص بأسعار قطع غيار و الصيانة الخاص بالفلوينس
بالتوفيق ان شاء الله