الموضوع: تقرير وصور مقابلة راس سدر

المشاركة الأصلية كتبت بواسطة Karim_Monir

السلام عليكم ورحمه الله
يا رب دايما متجمعين على خير وفي الخير ودايما مبسوطين وسبحان الله مقابلة ورا مقابلة وما بنزهقش من بعض
لان في محبه في الله ربنا يديمها
اليوم كان اكثر من رائع واكثر من مرهق لان تفاصيله كتير وميعرفش يعني اي تفاصيل الا اللي يمسك كواليس يوم زي ده :-)
طبعا الشكر كل الشكر لاستاذ محمد عبد الجليل وترتيبات الحجز للاوتيل الجميل وتعبك في الموضوع
وطبعا السلبيات زي اي مكان بيتمتع بادارة مصريه مش عارف ليه كدة
وطبعا عشان كنت مسئول بالكامل عن التسكين لغرف المبيت والاشراف عليها وكمان مسئول عن تسكين غرفة الداي يوز وغرفة الحريم كان الموضوع فعلا مرهق لدرجة اني مدخلتش اوضتي غير عشان الحق اتوضي والحق الجمعة وملحقتهاش بس الحمد لله ان ليا رخصة المسافر مالوش جمعة
اليوم عدي بسرعة جدا وكل احداثة سريعة وتبقي عايز توقف عقارب الساعة من استمتاعك بكل التفاصيل وبعد ما طلعنا من المية وكنت طلبت تاخير ميعاد الغداء عشان يبدء 4 العصر الكل كان مات من الجوع
وكميات الاكل كانت مناسبة وبرضه مقعدتش اكل غير لما اطمنت ان اخر واحد دخل المطعم ملي طبقة عشان اعرف اركز في الاكل بقي وشنوري يكون خلص اكل ويتسلي عليا كالعادة تصوير :-)

بعد الاكل كان لينا جوله مع الجيت سكي سريعة عشان كان فاضل نص ساعة بس قبل حرس الحدود يمنعو نزول الجيت وخمسنا كلنا في نص ساعة بس كانت جميلة جدا والجيت كان يامها 700 سي سي لسه متعمر ومكنتة فايقة قوي
وكنت عايز اركب تاني يوم بس الجزر منعني انزل عشان الرمل كانت هاتدخل في الموتور يلا تتعوض


حابب اشكر مهندس سمير الشهاوي مهندس الطريق لانه ما شاء الله ماينفعش تكلفه بعمل ويتاخر عنه ابدا
معلش المسئولية كانت تقيلة بس انا مش قادر اقولك من بعد ما مشيتو لغاية الساعة 11
كنت مشغول بتفاصيل اليوم وتسوية الحسابات الخ الخ فمكنتش هاعرف اركز مع الاعضاء على الطريق

حابب اشكر فوج اسكندرية لان فعلا المشوار طويل عليهم هما وفوج دمياط بس فادي بات لكن اسكندرية صد رد الله يعينهم وفوج دهب اللى باتوا برضه
شكرا اسامة على كروت الين تاج اللى عملتها لكل الاعضاء
شكرا مدام سما لكل المساعدة في تنظيم اليوم في الكواليس

اتعرفت على ناس اول مرة اشوفهم وشفت ناس كتير كانوا واحشني واضح ان المقابلات ادمان
ووعدتكم ان شاء الله بترتيب مقابلة تانية على شهر 12 او 1 في اجازة راس السنة وغالبا تكون الفيوم عشان مشتي
وطبعا لازم تراعوني في الوقت عشان اعرف انظملكم يوم حلو تاني زي ده لان الموضوع مرهق بشدة
الحاج احمد مشعل نورنا واسرته المقابلة وكان مبسوط زي ماحنا اتبسطنا بوجوده ووعدنا انه هايكون معانا في كل مقابلاتنا مكنش متخيل انها هاتكون بالروح الحلوة دي

وانا راجع دخلت انا والعيال النقطة الحصينة شوفنا مدافع ابو جاموس وتحية للكل ابطالنا من الشهداء
الناس دي ضحوا بارواحهم وهي اغلي ما عند الانسان عشان انا وانت نعيش مرفوعين الراس بكرامة
حقيقي كل جسمي كان مقشعر وانا بمشي في نفس المكان اللي دماهم سالت فيه
وتحية تانية لاهل السويس اللي كل ماتخيل دانة المدفع الكبير وهي نازلة تدق المدينة يملاني شعور بالفخر والكرامة ان دول اهل بلدي


يوم كان رائع وان شاء الله يتكرر قريب ولا انسي فيه ابدا الحاضرين الغائبين اللي الظروف منعتهم قهر من الحضور
صديقي العزيز احمد مصطفي لجراحة لخالته شفاها الله وعفاها نسالكم الدعاء لها
ومرض والده نسالكم الدعاء له ايضا
واخونا العزيز بسام حافظ اللي تعب ابنه ودخولة المستشفي لنزله شعابية منعه ايضا من الحضور كرها

واخي الاصغر حسين سونا اللي ظروف منعته من الحضور
وبيشوي اللي كنا مفتقدينك بشدة وضحكتك البشوشة

فعلا المقابلة كانت نقصاكم لكن تتعوض قريبا بالافضل

فخور بشدة بترابطنا في الله ونشوفكم دايما بخير

اخوكم في الله
كريم منير

بعد كل ده وبتقول الفيوم برضه
حتى انت :-)
انا بعلن انسحابى وعدم حضورى من اليوم لو اتعملت فى اى مكان برة اسكندرية