الموضوع: أتعقدت من العربية واقتراحات الصنايعية (الفتي المصري عندنا حصري)

المشاركة الأصلية كتبت بواسطة semsem kane

معلش ياباشا سيبك من فتى الصنايعية وحل مشكلتك فى الاتى :

اولا بالنسبة ل maf sensor دة لو فية مشكلة هتلاقى الاتى :

1- دخان اسود من الشكمان

2- العربية هتبقى مخنوقة

3- لازم لمبة الcheck engine تنور لو فية اى مشكلة بسيطة

نيجى بقى للمشكلة اللى عندك : المشكلة اللى عندك دية من بلف الايدل ( iacv ) لان هو اللى بيهبب البوجيهات وهو اللى بيخلى الاربى ام يلعب ويفضل طالع نازل , وبيخلى العربية تبطل
لكن الماب يخنق العربية فقط ويزود استهلاك البنزين

* مشكلة المحرك بقى والصوت اللى انا سامعة :

شوف ياباشا اللى عندك دة حاجة اسمها ( ترزيعة سبيكة ) ودية حلها معقد شوية لانها بتتطلب الاتى وركز معايا عشان ليها حلاين

الاول : انك تغير السبيكة فقط بدون فك المكنة ودة بيتم عن طريق الاتى :

* انة يفك الكارتيرة من تحت وينزل المصفة وينزل الشبكة هيلاقى الكرنك وكراسى الكرنك قدامة قبل مايفك حاجة يمسك كل كرسى ويهزة شمال ويمين وفوق وتحت اى واحد يعمل صوت تخبيط يتفك ويتشاف الكرنك جوة هل لاسع او فية تمويج لو لاقة

لاسع : ممكن بيتسنفر وبيتم تغير السبيكة وتجيب سبيكة standard طالما انت ماشيلتش الكرنك

لكن لو لقيت الكرنك مموج كدة شكرا لازم الكرنك دة يطلع برة وعشان يطلع الكرنك لازم يحصل الاتى :

* فك المحرك كامل , وهيخرج الكرنك ويتخرط على حسب اللى هيتشال منة وغالبا هيتخرط 0.10 ودية اول خرطة للكرنك وليك 6 خرطاط ودة كلام المصنع

بس فية مشكلة بقى انك طالما طلعت الكرنك برة يبقى لازم تعمل عمرة كاملة للمحرك وهية كالاتى :

ملحوظة : يفضل اذا الكرنك هيتخرط انك تجيب واحد استيراد standard حالة نظيفة جداااااااا

( تغير شنابر - عمل شميز - جوانات - طقم سبيكة - طقم كاوتش صمام )

وطبعا العملية بتكلف ولازم واحد شاطر جداااااااااااااا , هو اللى يعمل كدة

عشان كدة اريحلك واوفرك short block استيراد نظيفة ماتفتحتش قبل كدة وتسقطها فى ماتورك وكل اللى هتجيبة جوان وش سلندر - زيوتك وشكرا ودة افضلك بكتييييييييييييييييييييير

معلش اذا كانت الافكار مش مترتبة بس لو حاولت تسأل على حاجة قولى وانا اشرحها تانى

خلى بالك عشان اللعب فى الحاجات دية كتير ولو روحت لواحد تعبان والعربية ماطلعتش مظبوطة هيتعبك جدااااااااااااا , وفى الاخر هتجيب شورت بلوك استيراد ويبقى صرفت مرتين

يا باشا ألف شكر على ردك المفصل، هو بالفعل كان في دخنة سودا والماكينة كانت مكتومة ولمبة التشيك كانت بتنور وبمجرد تغيير البوجيهات (ببوجيهات قديمة من عند الميكانيكي) الدخنة السودا اختفت والصوت أصبح أقل والبرجلة أقل بس ما زالت الماكينة مش مظبوطة.

الشيء المحزن إن العربية عاملة عمرة من أقل من شهرين أو بمعنى أصح (نص عمرة للنص التحتاني مع تغيير السبيكة) ولما أخدت الماكينة كانت مش مظبوطة ورحت لميكانيكي تاني علشان يظبط النص الفوقاني (أنا بصراحة اتبهدلت ودفعت كتير وحاسس اني صيدة للنصابين والحرامية معدومي الضمير والأخلاق لأني مش بافهم في الميكانيكا. من اسبوعين رحت لميكانيكي بص وقالي المشكلة في حساس الشكمان، رحت نفضت له ومشيت لأني عرفت انه كفتجي علشان حسب معرفتي أن حساس الشكمان مش بيأثر على أداء الماكينة وإنه وظيفته يوضح إذا كانت الماكينة مفوتة أو البنزين مش نضيف ده حسب ما قرأته هنا في المنتدى.
بالنسبة لـ short block ده بتطلب ورق ومشاوير للمرور علشان إثباته على الرخصة حسب ما أنا فهم، صح كده؟

وآسف للإطالة.

السلام عليكم

صحيت الصبح وفتحت الكبوت علشان افاجئ بالماكينة غرقانة زيت، طبعا فهمت إن المشكلة حصلت لما الصنايعي فتح وش التاكيهات وما ربطش كويس، كان ممكن اروح له بس بصراحة كان دمي محروق بسبب انعدام الأمانة وعدم الحرص على تقفيل حاجة بسيطة زي دي.

رحت لميكانيكي تاني، قولت له بص لي على عمود الكامات فتح الوش بعد ما الماكينة بقت باردة علشان الوش ألومنيوم وممكن يقفع ويجيب زيت (طبعا الميكانيكي التاني فتحه والماكينة سخنة) فتح لقينا الجوان مقطوع وقال لي ده سبب وجود الزيت، قلت له يعني كان المفروض اللي فتح كان يشوف وينبهني إنه يتغير.

ما علينا بص على عمود الكامات وقالي فعلا في كامتين مش مظبوطين وهما دول سبب الصوت اللي طالع من الماكينة، سألت طب ده ممكن يأثر على شغل الماكينة أو يتقطم وأنا ماشي أو لا قدر الله يجيب وش السلندر، قال لي كل ما فيها ان الصوت ده هيفضل مستمر معاك لحد ما تغيره بواحد سليم.

اشتريت جوان للوش بـ 10 جنيه وبالمرة جبت جوان للشكمان علشان كان في تنفيس.

مشكلتنا اننا بنسيب الصنايعيه الجاهله تشتغلنا
قال ضفيره ب 1000 وقال ماف 250 = 1250
لكن الماف الاصلي = 800
الفرق كام = 450
دا غير فرق المصنعيه
هل مصنعية تغيير ماف = مصنعية تغيير ماف + ضفير + البهاريز اللي في السكه ؟؟؟

للاسف ياباشا المشكله عندنا ( احنا بنحب نروح عند الغالي المشهور او التنك او اللي بيتقال عنه انه متخصص ماركه وقدامه صفين عربيات ......... للاسف دا جزأ مننا
والجزأ التاني بيسترخص وعايز اقل المصاريف وابو 100 يقلك عليه ب 10
وفي ناس مش فاهمه مننا ومشغولين فدول بيريحوا نفسهم ويروحوا التوكيل او مركز خدمه معروف شغله انه عالي )
لكن ماحدش فكر يروح لحد فاهم ومعروف ومتجرب ف ينفس الشغلانه ونفس الموديل والعربيه ( الحاجه ام الاختراع صاحب الشيء هو الوحيد اللي قدر يدور على حاجته مش حد تاني )
المهم ياباشا ركبلها موتور يابماني جاي من طورلين
اللي هايفيدك في الموضوع دا استاذ هاني ومستر طناني وطبعا semsem kane ياريت بجد تساعدوا الراجل دا ياجماعه بجد