الموضوع: سؤال عن منظف الرشاشات

المشاركة الأصلية كتبت بواسطة mmamdouh

معلش دا شغل عك

التنظيف الصح لو الدنيا متوسخة على الاخر بيكون عن طريق:

فك البوابة من على المانفول و فك الايدل و الtps من عليها ثم استخدام الwd40 مع فورشة اسنان و دعك كل ممرات الهوا فى البوابة جيدا... بعد كدة تزال اثار الاوساخ و الwd40 باستخدام الcard cleaner او intake manifold cleaner على حد سواء

تنظيف الايدل كونترولر بالwd40 جيدا و مسح راس الكونترولر بمنديل نظيف و يفضل وضع نقاط قليلة من زيت الباور داخل الكونترولر لضمان تزييت الموتورو التروس بتاعتة

لتنظيف المانفولد نفسة يتم فصل سوكيت البوبينة و ازالة البوجيهات الاربعة و كتاوت طلمبة البنزين كبداية... بعد كدة بيتم رش الcard cleaner او intake manifold cleaner لتنظيف المنافولد من جوة كويس اوى مع مراعاة الرش فى الاربع مواسير اللى رايحين لوش السلندر

بعد عملية التنظيف دى هيكون المنافولد نظيف تماما بس كل الوساخة نزلت على البساتم.... عشان تطرد الوساخة دى هتدور المارش بتاع العربية لمدة عشر ثوانى 4 او 5 مرات متتالية لحد ما البساتم تطرد كل الوساخة اللى نزلت عليها من المانفولد... يفضل تسيب العربية على الوضع دة نص ساعة ولا حاجة و بعد كدة تدور مرتين تلاتة كمان

طبعا لازم يبقى سوكيت البوبينة مفصول و الا السلوك هتطلع شرارة و تولع فى السوائل اللى خارجة من فتحة البوجية و تعمل حريقة (انا مش مسئول لو حد ولع فى نفسة) و طبعا محدش يبقى واقف حدام الموتور ولا فية عربيات قدام عربيتك بمسافة 3 الى 4 متر عشان البلاوى اللى هتنطرد هتنتشر فى كل حتة

بعد كدة تقفل البوابة مكانها و تركب الحساسات و تركب البوجيهات و السوكيت و كتاوت البوبينة و تدور و تسيب المكنة تشتغل شويتين عشان تحرق اى اثار للمنظفات

mmamdouh

طيب لو تكرمت يا بشمهندس هو فين سوكيت الموبينة دا عشان أفصله؟

وكويس والله انك ذكرت الحتة دي انا هفك البوابة كلها وهعمل الحوار دا كمان يومين كدا ومخدتش بالي من نقطة السوكيت دا يعني الدنيا كانت ممكن تولع عندي لاقدر الله.

وجزاك الله خيرا.