الموضوع: ماذا تفعل لو خبطك شخص بسيارة وهرب ( وانت ماشي بدون سيارة )

المشاركة الأصلية كتبت بواسطة aif

طيب يا جماعة نيجي للشق التاني ...
افترض انه جري وهرب ... وقدرت انت توصل له ... يعني الناس جريو وراه ومسكوه ..... اخدت نمرة السيارة وجبته .......المهم انك وصلتله .... حتعمل معاه اييييييه ؟
حكلية مين الغلطان دي مسألة تقدير ... واكيد كل واحد بيبقى مقدر وقتنع انه مش غلطان في 95% من الأحوال ...الا لو اللي ماشي كان بيقرأ الجرنال في وسط الشارع مثلا ... او قاصد ينتحر ...
انا اقصد ان فيه نسبة خطأ على السائق في 90 % من الحالات .... لكنها نسبة متفاوتة .... من خطأ كلي الى خطأ جزئي
المهم انت مسكت الأخ اللي خبطك وهرب او حاول يهرب ويسبك مرمي في الشارع ....ح تعمل ايه ؟؟؟؟

معلش اختلف معاك بشدة يا استاذى

فى 99% من الحوادث اللى بالشكل دة بيبقى الغلط على المشاه مش سائق العربية

و الحكم فى الموضوع اسهل من السهولة لان ببساطة العربيات بتمشى على الاسفلت و البنى ادمين بيمشوا على الرصيف... و لو البنى ادمين حبوا يعدوا الشارع يبقى لازم:

العبور يبقى من مكان عبور المشاه سواء كان كوبرى او نفق

العبور من الاماكن المخصصة للعبور و المرسومة على الاسفلت لما تبقى اشارة المشاه خضراء و اشارة العربيات حمراء

اى حاجة تانية غير السطرين اللى فوق يبقى فيه غلط و سهل اوى تعرف الغلط على مين

يعنى لما واحد يعدى الطريق الدائرى او صلاح سالم او الاوتوستراد و يتخبط يبقى ملوش دية

يعنى لما واحد يعمل فهلوى و ينزل يجرى وسط العربيات فى شارع زى النزهة او الميرغنى يبقى بيستعبط

يعنى لما تبقى اشارة العربيات خضراء وواحد يستحمر و ينزل يمشى وسط العربيات يبقى يستاهل قطم رقبتة

او ماحد نط من الاوتوبيس و هو ماشى و فجاءة بقى فى نص الشارع يبقى يستاهل يتعمل بوستر على كبوت العربية

لما يبقى اربعة ماشيين بعرض الشارع وواكلين حارة من الطريق عشان يتمشوا فيها بدل ما يطلعوا على الرصيف يبقى بستاهلوا اللى يجرالهم

لما يجى واحد يعدى الشارع فى ملف و ميبقاش عارف العربية اللى جاية عليه حتلف من قدامة و لا من وراه و فجاءة تلاقية وقف قدام العربية يستاهل الحرق

او اتنين شباب قطاقيط بيعدوا و فجاءة تلاقى واحد اتسمر مكانة و تانى كمل مشى و بقوا الاتنين قدامك و عندك كسر من الثانية عشان تقرر تخش فى انهى واحد فيهم يبقوا الجوز يستاهلوا الدبح

اما لو واحد بعربية كسر اشارة و داس على واحد او كان سكران او محشش و طلع فوق الرصيق و خبط حد يبقى يستاهل قطع رقبتة

زى ما شوفت حالات عدم الالتزام بالقانون للمشاة اكتر بكتيييييييييير من حالات عدم الالتزام لقائد السيارة... عارف ليه؟

لان العربية محكومة بالاسفلت... العربية لا بتتجول على الارصفة و لا عندها القدرة عشان تمشى على حيط ولا اى العاب... هى على الاسفلت و بس

اما البنى ادمين (او المفروض انهم بنى ادمين) بيتجولوا على كل مكان فى الطريق بدون نظام... لاحظ كدة فى اى شارع حتلاقى السواد الاعظم من الناس ماشى على الاسفلت... و بيعدوا من اى حتة فى الشارع

يا راجل يا طيب دا الحكومة بقت تعمل اسوار على حرف الارصفة عشان تحبس المشاة على الرصيف و عملت لهم كوبرى مشاة و رغم من كدة بيعدوا وسط الشارع و بينطوا السور.... شوف سوق الموسكى

و عند سوق الجمعة على الاوتوستراد... كوبرى المشاة اكبر من الكوبرى اللى عملة الجيش فى 73 عشان يعدى القناه و رغم كدة تلاقى واحدة لابسة اسود فى اسود ووزنها طن و نص بتعدى فى وسط الطريق من اكتر حتة ضلمة و مديا ضهرها للطريق و ماشية بسرعة 1 سنتى فى السنة... تبقى دى عايزة ايه؟؟؟؟؟؟

معلش احنا لازم ننظر للقصة بشكل موضوعى... مش معنى ان واحد اتعور انه يبقى مظلوم... ما يمكن هو مهمل و اضر بنفسة... حد فيكم لما تكهرب رفع قضية على شركة الكهرباء؟؟ يبقى اشمعنى لما واحد بيرمى جتتة فى وسط الشارع بيعمل ميت لما عربية تاكلة؟؟

انا عند رائى... اذا اخترت انك تخالف القانون يبقى تتحمل تبعات قرارك زى الراجل و تستحمل اللى يجرالك و متلزقش خطاك فى حد... و لو واحد سرحان ولا نيمان ولا اى بتنجان و نزل على الاسففلت بشكل غير قانونى و جت عربية دهستة ميلومش الا نفسة

"ولا تلقوا بانفسكم فى التهلكة"

MMamdouh