و الالنترا 2010 كانت ورا التيدا علي طول و تقدر تسأل يوكو و محمود عفيفي اللي يومها طير مراية سيفيك
عرفت بقى انى معنديش ثقة فى كلام هيونداى عشان ماتور التيدا 118 حصان مقابل 121 حصان للالنترا , والمفروض ان العزم تقريبا اعلى حاجة بسيطة لصالح الالنترا وفى الاخر التيدا هية اللى عدت منها
عادي أنت حر تأخد او ما تاخدش أنا عن نفسي هأصدق شركة هيونداي اللي قدرت انها تعمل عربية تحقق كل المبيعات دي في أوروبا و أمريكا (اللي بيركبوا عربيات أمريكي و اوروبي وااااااو)
لأ معلش مهما بردة فى اوروبا مش بينزلهم العربية اللى عندنا دية هما بينزلهم عربية فيها مواصفات واوبشن اعلى بكتير من هنا عشان كدة راضيين عنها فى حدود السعر بتاعها خلى بالك من النقطة دية جدا , وبعدين معلش ياباشا هما مش بيضحك عليهم وبينزلهم عربية من غير وسائل امان , وبيمجدوا ويشكروا فيها , لأ هما اصلا لو اختبروا الالنترا اللى عندنا هنا على شوارعنا هنا هتاخد تقييم نجمة ونصف مش 3نجوم
ماحدش قال أنكوا مش بتفهموا في العربيات و لا بتعرفوا تسوقوا لكن أنتوا مش عايزين تصدقوا أو تقتنعوا ان العربيات الكوري طالعة للقمة و بسرعة و دي مشكلتكوا
ياباشا ماحنا كل مابنحاول نقتنع ونقول يمكن هما عندهم حق ونركب رأينا بيزداد اكتر وبنصر على موقفنا , والله مش عايز اقولك اكتر عربية فى حياتى بكون قلقان وانا سايقها او حتى راكب فيها ال rb و وبعديها الالنترا , عمرى فى حياتى ماقلقت من عربية كدة , والغريبة ان صاحبة مالك الهيونداى قرفان منها جداااااااااا وعارضها للبيع بعد اول 16000 الف كيلو وقالى كلمة يغور الهيونداى , لان هيتجة لاسكودا فانتازيا ان شاء الله او فورد فوكس , وانا قولتلة عين العقل يابنى لان هو دة الصح , مش دة بردة واحد من ملاك هيونداى وعايز يمشى منها ومعاة عربية من التكنولوجيا العصرية بتاعة هيونداى
فعلا دي حقيقة أومال لو عرفت أني عملت بيها 4.7 لتر / 100 كم هاتقول ايه ؟
لو انت زى مابتقول بتاخد بكلام الشركة , شركة هيونداى كاتبة ان اقل رقم تم الوصول الية فى استهلاك البنزين هو 7.8 لتر كل 100 كم بسرعة 90 كم داخل المدينة , وعلى الطريق السريع 5.5 لتر , ودة على البنزين بتاعهم حضرتك بقى كسرت القاعدة وجيبتها فى 4.7 لتر
مش عارف لية ياباشا حاسس انك شوية وهتعمل اختبار ببنزين 95 من التانك وهتقول معجزة الالنترا تتخطى ال200 كم بواحد لتر فقط لا غير
يعنى معنى كلامك ان 20 لتر من التانك بتاعك يمشوك 450 كيلو متر ماشاء الله يعنى 50 لتر يمشوك 1100 كيلو ( دة فين دة ياباشا ) ؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!
بتوصل لل 200 كم/س و تعديها لكن مش في لمح البصر و لا حاجة هيا ممكن تطلع من 140 لحد 180 فعلا بسرعة جدا لكن بتغيب بعد كده لحد ال 200
حضرتك عرفت منين انها بتعديها لحد دلوقتى انا ماشوفتش حد جاب بيها اكتر من 190 كم لو حد جاب يتفضل يقول
ثباتها معقول لكن مش خرافي و لحد 180 كم/س بعد كده بيكون فيه صعوبة في التحكم فيها
أما الغرز علي 200 مافيش حد قال كده أو عمل كده أو انا شخصيا ماشوفتش علي الطريق حد عمل كده
180 كم طيب كويس والله انا ماشوفتش حد يجرأ ياخد بيها غرزة مقفولة على 130 كم
اللي شوفته هوندا سيفيك أخد غرزة علي طريق الاسماعلية في رمضان اللي فات علي حوالي 140 و العربية طارت في الهوا و أتقلبت علي جنبها و أتكسرت و اكصطدامها طار و دخل كسر لي الكارتيرة البلاستيك
ههههههههههه ماشى بس مش هرد عشان دة مش موضوع سيفيك والنترا
عن تجربة و مقارنة بالكورولا .... أه و ده مش كلامي بس
ده كلام الخبير العالمي (م/ خالد عمر - سبعاوي) اللي ساق الالنترا
و كلام (تريبل درش) اللي كان معايا امبارح و أحنا في العجمي بمطباته
معلش ياباشا مع احترامى لرأى الناس دية على راسنا من فوق , بس الكورولا لا تقارن تماما بالالنترا كدة هية وسعت اوى الصراحة
هيا مش سوبر و لاتحفة و لاحاجة و لكنها عادية زيها زي باقي العربيات اللي نازلة حديثا انا ماشوفتش الخامات الواو اللي بيحكوا عنها في الاوكتافيا و لا حتي الهوندا و ماتنساش أنه كان معايا 2 كورولا و ياريس يعني عارف يعني أيه خامات و تقفيل
ياريت تبص على خامات الكورولا كويس سواء موديل 2007- 2012 وبالمرة عدى الفليوانس
الفرامل فعلا ممتازة و ده عن كذا تجربة و كذا موقف و برضه أمبارح جربتها علي الطريق و أنا علي 160 و العربية سرعتها نزلت بشكل سريع دون أن تفقد أتزانها و كان معايا مصطفي و قال أومال ايه اللي بيقولوه عن العربية ده
ههههههههه طيب كويس ربنا يستر طريقك ياباشا , ويستر طريقنا , هو حضرتك بتقيس قوة الفرامل ازاى ؟؟؟؟؟؟؟؟؟
بصراحة هيا دي كدبة مش لدرجة فيل لأ هيا تشيل 3 مش واحد بس
ههههههههههههههه
طيب كويس ان حضرتك قولت , عشان اللى بيركبها بيقول بحر وبيحسسنى انة راكب لاندكروزر
هانشوف بعد 40 سنة بس يديك و يدينا طولة العمر
يارب ياباشا
كان فيه موضوع فيه جدول بأسعار قطع الغيار و أنا نزلت مقارنة به اسعار قطع غيار الالنترا , مازالت ارخص بكثير بالرغم من أرتفاعها عن الموديلات السابقة , و ياريت تكلمنا عن اسعار قطع غيار الهوندا و عن توافرها
معلش غالية انا عارف كويس اسعار الالنترا وال rb صاحبى لسة ملدوع فى مبلغ وقدرة وطبعا دفعة لحد مالتأمين ردة قيمة الفاتورة وبيتشكى منها ومن غلاءها ومتابع تقاريركوا كويس مثال بسيط ( تيل الفرامل - المساعدين - سعر الفوانيس والاكصدام ) وياباشا مادخلش السيفيك لانى مش هدخلها القسم موجود وتنونا فى اى وقت
ايه رأيك في الاكسيل و الاكسنت و الالنترا موديل التسعينات اللي ماشية الي الان في الطرق المصرية
و ايه رأيك في عربيتين ألنترا عندي في الشغل بقالهم أكثر من 30 ألف كيلو ماغيروش زيت (شل ألترا) و لا فلتر و و لا ربطو عفشة و لا بيكشفو علي كاوتش و لا تيل فرامل و لا اي حاجة و العربيات ماشية زي الفل
معلش مال 128 ماشية من 42 سنة , والفولكس ماشية من 55 سنة عادى يعنى هية العربية دية مابيتغيرلهاش قطع غيار
30 الف كيلو حتة واحدة , ماشاء الله شركة شيل بتقول 10 الاف والزيت ماتغيرش لمدة 30 الف كيلو , طيب كويس ياجماعة اهوة المهندس سمير الشهاوى بيقول معلومة جديدة ( هيونداى تتحدى حط زيت شيل 10000 كيلو وامشى بية 30000 الف وهتلاقى الزيت زى الفل والعربية تحفة ولا كأن فيها حاجة , ولا كمان تغير الفلتر , ولو جرى حاجة للماتور اشتكوا المهندس / سمير
ياباشا انا الزيت عندى بيقعد ال8500 كيلو والعربية بتصعب عليا وصوت الماتور بيبتدى يعلى , واعتقد كل العربيات كدة مش انا لوحدى " ماعدا هيونداى طبعا "
عمار ياهيونداى
طيب لما نشوف هوندا و لا تويوتا و لا نيسان و لا فيات و لا لانسر واقفة يبقي ده ايه ؟
هيونداي متنكرة ؟
مايقفوا اية المشكلة , هو انا قولتلك مابيعطلوش , حضرتك اللى بتقول انها مابتعطلش واعتمادية فوق الوصف وممكن تعيش وتعيش وتعيش وتعيش وتعيش
فعلا فتيس ناعم و سلس و بيديك أحسن أداء للمحرك و أحسن أستهلاك للبنزين مش عارف منين أنت حكمت أنه متخلف و لو أنت مش عارف أنه اوتو و لا مانيوال أنصحك تدخل القسم التعليمي علشان تعرف الفرق أو تيجي مقابلة هيونداي تيم و أحنا نقولك يعني أيه فتيس ....
ناعم وسلس على السرعات الهادية معاك , لكن على الحرق والشد تعبان تعب السنين , ودة بقى مش هيعرفة غير واحد بيشد ويجرى بفتيس اتوماتيك !!!!!!!!
معلش ياباشا ادينى بتعلم
هو مش كان فيه هوندا أتسرقت برضه و كنتوا عاملين عليها محزنة و القسم كان مغلق للحداد عليها و لا أنا مش فاكر
ياساتر يارب هية دماغك راحت لفين ياباشا , انا اقصد على سعر السرقة اللى بيبع بية التوكيل , متهيألى الجملة واضحة مش عارف انت فهمتها كدة ازاى , هو انا بردة هشمت فى حد اتسرقت منة سيارتة , ربنا يرد لكل واحد سيارتة امين يارب
انا اقصد ان سعر العربية 170 الف جنية بعد السرقة من التوكيل , وفيها كل الاوبشن دة والمميزات اللى انت بتقولها دية " طيب مستغلينها لية " دة كدة 170 الف قليل عليها
اللي ركبوا كوري ركبوا عربيات و عربيات ممكن ناس كتير ماتسمعش عنها لكن هما عارفين كويس هما بيعملوا أيه و لما واحد كان راكب سيفيك يبيعها علشان يشتري ألنترا و فئة أولي اكيد هو عارف هو عايز أيه و بيعمل أيه و مش عايز يرمي فلوس زيادة في الشارع
طيب دة واحد , مافية عضو عندنا فى قسم هوندا , باع هيونداى 2012 وكان جايبها بالاوبشن تقريبا , وركب سيفيك 2012 , وبيقول اية الفرق دة , الحمد لله ان ربنا خلصنى من هيونداى " ترد علية تقولة اية ؟؟؟؟؟
دية مشاركة من العضو نقلتهالك مخصوص
" انا الحمد لله كمان تخلصت من الالنترا 2012 و ربنا كرمنى وجبت سيفيك 2012 هحاول اعمل تقرير قريب بس بعد اما امشى بيها شويه وبعد صيانة الالف بس مبدئيا العربيه فرق السما من الارض عن الانترا يعنى صحيح مليانه بلاستيك بس بلاستيك عن بلاستيك يفرق الانترا بتزيق من كل حته الباور اه اخف بس صباح الخبط اللى تحس بىه فى الدركسيون العربيه معمول عليها خصم معقول الايام دى وقارنت بينها وبين الاوكتافيا اول فئه بس استخرت واستريحت نفسيا للهوندا "
ربنا يستجيب منك و يرحمنا فعلا برحمته و من اللي مش عارفين و اللي بيقولوا أي كلام عن حاجة هما مش عارفينها أو مش عايزين يعرفوها
و لك كل تحياتي و تقديري
عشان ربنا يرحمكوا من الناس دية المفروض تتكلموا بكلام معقول مش تحسسونا ان الهيونداى النترا دية عربية لا تقدر بثمن , عشان فية ناس بتشترى على كلامكوا دة
لك تحياتى
المفضلات