الموضوع: اخيرا وبعد معاناه سقط ماتور جولف 2 فالبيتلز

المشاركة الأصلية كتبت بواسطة fouaa

اخيرا وبعد تفكير طويل وتردد كبير اخدت قرار انى اغير ماتور البيتل الجميل واعدل العربيه تماما واشوف ماتور اكبر اسرع اقوى ويكون كمان تبريد ميه لانى فالحقيقه كنت محروم من تبريد الميه يا جماعه .
قررت فعلا انى هبدا المشروع وكان عندى شويه دراسات فالاول عشان انا الناس ححسونى انى هعمل المستحيل مبدئيا سالت على اسعار ماتور الجولف 2 1800 الكود بتاعو aps لقيتو بيتراوح مبين 2600 لحد 3200 وانت وشطارتك فالفصال المهم تاخد ميكانيكى كويس عشان يلف الماتور على الارض عشان يتاكد ان حالتو كويسه حصل فعلا رحت اتفرجت على ماتور كامل من غير فتيس عشان هركبو على فتيس العربيه فعلا اشتريت ماتور 1800 بس جبتلو كاربراتير 1600 لان ال1800 هاف انجكشن وكان محتاج ضفيره كامله وكنترول وانا محبتش اوجع دماغى بزياده اول حاجه عملتها لما اشتريت الماتور رحت على ميزان قبانى وزنتو كامل ووزنت ماتور العربيه القديم طلع فى فرق 7 كيلو بس وكده اول فرق بس يتغاضى عنه هنبدا التركيب .
محتاجين نركب الماتور على نفس فتيس العربيه وده هيحتاج حاجه اسمها بلاطه البلاطه دى عباره عن قطعه حديد وظيفتها انها بتتربط فالماتور فنفس اماكن المسامير الاصليه بتاعت الماتور وهتخلى الماتور يتركب بكل سهوله على داير الفتيس وكانو ماتو بيتل عادى رحت للخراط عملى البلاطه بالمقاسات المطلوبه بعد مخدنا بروفا على ورقه اخدت وقت حوالى 6 ساعات وكلفتنى 500 جنيه والحمد لله ركبت زى الفل تانى حاجه كنا محتاجين نعدلها وهيا الفلاى ويل او ترس الفولام وده لانى هركب نفس الترس الاصلى بتاع العربيه والاسطوانه والدسك الفكره ان الفولام كان بيتركب فالبيتل بصاموله وحده من النص وماتور الجولف بيتربط فيه بست مسامير محتاجين نخرم الترس عشان يبقى بست مسامير قبل منخرط زودناه لحام كهربا فنفس المكان المطلوب تعديلو عشان يعمل علو وبعدين رحنا المخرطه نضفنا الحام وظبطناه وعملنا مكان المسامير السته كده ربكنا البلاطه والفلاى ويل والاسطوانه وجاهزين نركب الماتور فالعربيه احتاجنا بس نشيل السطاره الصاج الى بين الرفرفين عشان نعرف نبيت الماتور ملحوظه صغيره ماتور البيتل ملهوش قواعد بيتشال فقط على داير الفتيس والشاسيه مصمم انو يشيلو وليه قواعد فالفتيس يعنى مجرد مهنركب الماتور الجديد بنفس طريقه التركيب القدديمه العربيه هتشيلو وهيبقى تمام نزلنا الماتور مكانو وربطنا مساميرنا وبقى زى الفل عملنا بعد كده ضفيره الكهربا ووصلنا المشط الالكترونى والموبينه وبقى الماتور جاهز انو يدور والحمد لله دار على طول .
تانى مرحله بقى كانت مرحله تثبيت الردياتير ومد خراطيم ليه من اول العربيه قدام لحد الماتور ورا الردياتير حطناه فالمكان المخصص للاستبن وده على قدو بالظبط هوا والمروحه وعشان احل مشكله الخراطيم فكرت فمواسير بولى بتاعت السباكه وبالفعل جبت سباك عملنا خط مواسير من الاول للاخر بالتكسيحات المطلوبه عشان تبقى متثبته كويس ومتتحركش وثبتنا الاربه ورا عند الماتور ميزت ردياتير الجولف انو مفيهوش غطا مبيتفتحش بتزود من الاربه وشكرا .
المرحله الى كانت بعد كده تركيب الشكمان رحت لحداد فصلى فلنشه ركبناها فالفرن كلفتنى 50 جنيه وعملت ماسوره 2 بوصه وجبت علبه ديفل جاسبن صغيره تمنها 450 جنيه صوت العربيه بقى يخض .
واخيرا كانت مرحله تقفيل ضهر العربيه الستاره الى كنا فكناها فالاول ركبتها تانى فك ورباط وباب الكبوت طردناه بره شويه وذلك لكبره حجم الماتور .
النتيجه فالنهايه مبهره للغايه التاسرع خرافى والسرعه القصوى المؤشر لف لحد مصد فالحته الى بتوقفو والعربيه وقفه الفرامل موش بطاله بس هعمل فيها تعديل قريب وهبقى اقولكو طبعا
ان شاء الله هصور العربيه وهنزل الصور
عاوز راىيكو بقى فالى انا عملتو .

دى براءة اختراع ياباشا الله ينور وربنا يكفيك شرها يارب.