الموضوع: رجاء خاص .. بلاش إحباط :)

المشاركة الأصلية كتبت بواسطة dodyam

الله ينور على كلامك يا استاذ حاتم
وعاوز أضيف على كلامك نقطة ياريت محدش ياخد رأى من واحد مش مالك للعربية وركبها مرة لفترة صغيرة و جاى يقيم لان فيه منهم كتير فجأة الأيام دى بقى بيخش على القسم يرمى كلمتين و يطلع عدا طبعا بعض الأشخاص المحترمين المعروفين على مستوى المنتدى مش القسم بس

وياريت تتأكد ان صاحب الكلام اللى بتقراه هو مالك للعربية أو اتعامل معاها فترة
وانا عن نفسى اللى خلانى اختارها سعرها مقابل قيمتها و وسع الصالون والوكيل القوى و سمعة نيسان اليابانية مع معرفتى ان الاجزاء اليابانية هى الموتور و الفتيس و الباقى معظمه هندى و التجميع وبعض المكونات مصرى واعتقد انها لا تختلف فى ذلك عن الشكل القديم المجمع فى مصر أيضا و سمعته كويسة

شكرا على ذوقك خاصة انك اكيد لا تقصد بـ "عادا طبعا بعض الاشخاص المحترمين" ان غيرهم مش محترمين حاش الله فانتم اكبر من ذلك

بس زي ما كلام غير المالكين بيكون احيانا غير دقيق لعدم خبرتهم بالعربية (ولو ان مش لازم اطلع القمر علشان اتكلم عليه) برضه كلام بعض المالكين بيكون فيه تحيز أصل فيه بعض الناس بيعتبر العربية واحد من اولاده ولازم يمتدحه مهما كانت عيوبه!!

عموما انا باقول رأيي لوجه الله وأكيد صاحب الموضوع بيقرأ جميع الآراء سواء مع او ضد ويكون قناعته هو وأكيد هو بيقدر ان الي دخلوا الموضوع مافيش بينهم لا بيزنز ولا عداوة مع شركة نيسان ايجيبت

وعلى فكرة افضل وسيلة للاقناع تقديم الحجج لا مهاجمة الرأي الآخر أو قائليه أو إهانتهم صدقني ستستفاد من هذه الكلمات ان شاء الله اكثر من الموضوع نفسه

أرد بقى على الجزء الثاني (المقبول) من كلامكم
السيب القديم يختلف عن الجديد ياباشا
القديم قطعه ياباني وموتوره ياباني خالص 1600 والجديد قطعه هندي وموتوره تجميع هندي
يعني فيه فرق
الصني الجديدة من وجهة نظري عربية كويسة القيمة مقابل السعر
بس مش معنى كده اننا مفتكر ان نيسان ايجيبت حست بينا وقررت تبيع لنا ببلاش لا بتبيع هندي بسعر اقل وعلى فكرة الهندي مش وحش الفيرنا عربية اثبتت جدارتها يعني
لكن مش معنى كده اننا نتجاهل الحقائق ونقول انها زي الشيب القديم
اشكركم مرة اخرى

أما أجري بقى اروح قسمي ههههههه
تحياتي

جزاكم الله خيراً والله الواحد بيستفيد من كل الأراء إللي بتتقال بهدوء وعقلانية ..

بس إن واحد يخش يرمي كلمتين ملهمش أي تلاتة لزمة .. ويجري .. ده في حد ذاته شيء مؤسف مش عشان هيكرهني في العربية .. بس بحزن لما ألاقي ناس بتعمل كدة بدون حجة أو برهان

جزاكم الله خيراً جميعاً :)

متهيألى ان نتيجة انك مش حاطط معايير واضحة لتقييم العربية مع تحديد أهمية كل معيار بالنسبة لك هو ده اللى بيخللى الحكم بيكون فى المطلق وبالتالى بيطاع مش مرضى . اما عن نفسى اشتريت العربية و انا مقتنع بيها 100% شكلا و اداءا - رغم ان فى ناس كتيير مش عاجبها الشكل علشان معلق فى أذهانهم شكل معين زى اللالنترا مثلا. بس فى رأى ان شكل الصنى الجديدة حصل فى تعديل جوهرى و بقى انسيابى أكتر و عملى أكتر . بجانب التعديلات الجوهرية فى الصالون و اتساعه المحترم و كمان الماتور الجديد . العربية عدت معايا ال 1000 كم و أقدر أقولك بكل أمانة ان معنديش أى ملاحظات جوهرية علىيها و انها محققة لى الرضا عنها بنسبة عالية جدا. يعنى الخلاصة ان الصنى الجديدة package محترمة و تستاهل الثمن اللى انا دفعت فيها لانها متوازنة فى جميع المعايير مش زايدة فى معيار زى الشكل مثلا على حساب معايير أهم - بالنسبة لى _ زى الصالون و عوامل الأمان.

المشاركة الأصلية كتبت بواسطة ultramisho

شكرا على ذوقك خاصة انك اكيد لا تقصد بـ "عادا طبعا بعض الاشخاص المحترمين" ان غيرهم مش محترمين حاش الله فانتم اكبر من ذلك


بتحرجنى بذوقك مش كده .... ماشى ياعم

بس أنا ماجبتش سيرة التانيين ولا قلت على حد حاجة وحشة لا سمح الله


بس زي ما كلام غير المالكين بيكون احيانا غير دقيق لعدم خبرتهم بالعربية (ولو ان مش لازم اطلع القمر علشان اتكلم عليه) برضه كلام بعض المالكين بيكون فيه تحيز أصل فيه بعض الناس بيعتبر العربية واحد من اولاده ولازم يمتدحه مهما كانت عيوبه!!


على فكرة أنا ما قلتش المالكين بس أنا جملتى كانت كالتالى
( وياريت تتأكد ان صاحب الكلام اللى بتقراه هو مالك للعربية أو اتعامل معاها فترة )
و جملة اتعامل معاها فترة تعنى انه ممكن يكون واحد غير مالك وبيقول رأي دقيق و صحيح عن تجربة مع العربية يعنى ركبها و جربها فترة تسمح له بتكوين رأى كامل عن العربية
وأحب أضيف انه ممكن يكون مالك للعربية و برضه رأيه مش صح اما لنقص خبرة لديه أو انه ما امتلكهاش فترة كافية
والمثالين حصلوا فعلا فى كذا مشاركة فى القسم

وحاجة تانية العربية أساسا لسه جديدة ولسه أدامها فترة تثبت نفسها فيها و نشوف مشاكلها


عموما انا باقول رأيي لوجه الله وأكيد صاحب الموضوع بيقرأ جميع الآراء سواء مع او ضد ويكون قناعته هو وأكيد هو بيقدر ان الي دخلوا الموضوع مافيش بينهم لا بيزنز ولا عداوة مع شركة نيسان ايجيبت

وعلى فكرة افضل وسيلة للاقناع تقديم الحجج لا مهاجمة الرأي الآخر أو قائليه أو إهانتهم صدقني ستستفاد من هذه الكلمات ان شاء الله اكثر من الموضوع نفسه


أنا معاك فى موضوع تقديم الحجج طبعا و رفض الاهانة لكن كلامك موجه ليا بشكل شخصى بكلماتك زى صدقنى و ستستفاد وانا ما اهنتش اى شخص


أرد بقى على الجزء الثاني (المقبول) من كلامكم


أفهم من كده بنفس أسلوبك انك مش قابل الجزء الأول
طبعا انت حر بس برضه أنا زيك بأنصح نصيحة لوجه الله


السيب القديم يختلف عن الجديد ياباشا
القديم قطعه ياباني وموتوره ياباني خالص 1600 والجديد قطعه هندي وموتوره تجميع هندي
يعني فيه فرق


الشكل الجديد احنا دايما بنقول ان قطع يابانى زى الفتيس و الموتور و الباقى معظمه هندى زى الدينامو و الهيكل و فى حاجات صينى زى الفوانيس و الكاوتش الماكسيس و حاجات مصرى زى الزجاج و الفرش و التجميع
وممكن حد من الأعضاء اللى زاروا المصنع يأكدلنا الكلام ده


الصني الجديدة من وجهة نظري عربية كويسة القيمة مقابل السعر
بس مش معنى كده اننا مفتكر ان نيسان ايجيبت حست بينا وقررت تبيع لنا ببلاش لا بتبيع هندي بسعر اقل وعلى فكرة الهندي مش وحش الفيرنا عربية اثبتت جدارتها يعني
لكن مش معنى كده اننا نتجاهل الحقائق ونقول انها زي الشيب القديم
اشكركم مرة اخرى

أما أجري بقى اروح قسمي ههههههه
تحياتي

أنا بس أحب أوضح حاجة للكل علشان فى ناس بتتهم الأعضاء هنا فى القسم انهم متعصبين لنيسان و لعربياتهم
احنا أول ناس بتقول لما يكون فى عيب فى العربية لانى هأخبى عليه ليه... أكيد هاكون عاوز اقول علشان على الاقل خالص آخد نصيحة الزملاء فى كيفية التصرف
واكتر من عضو و انا شخصيا ذكرنا عيوب العربية زى الكاوتش الماكسيس و التقفيل المصرى و صوت الفرامل و المشكلة المشهورة اللى اتحلت بتاعة المساعدين
ودايما بنقول ان طالما وراك نيسان و كلاء أقوياء يبقى ما تقلقش
واكيد فى استثناءات لان الدنيا مش وردى فى مصر يعنى اكيد هتلاقى مشاكل بس قارن ده بعربيات و توكيلات تانية فى نفس الفئة السعرية و ما أعلاها و ما أقل
انا نفسى لما جيت اشترى لفيت على اقسام المنتدى و سألت بره كتير وكان اكتر حاجة بتقلقنى التوكيل من اللى باسمعه عنهم
واى عضو بيقرى اللى بنكتبه هو حر ياخد بيه او لأ
بس احنا الواجب علينا بنكتبه لانى بأحس اللى انا بأكتبه ده شهادة فبأكتب المميزات و العيوب علشان أفيد غيرى زى ما غيرى فادنى

اللى بيزعلنى بعد كل ده الاتهامات الموجهة لينا بصراحة بدون اى وجه حق
وباشوف ان فى ناس بتحاول تقلل من مجهود الاعضاء فليه التكسير فيهم مش فاهم
يعنى احمد تى فى الراجل طالع عينه فى القسم و مع ذلك بتوجه اليه اتهامات ملهاش اى تلاتين لازمة
تحس كأن فى ناس بتحاول تخلينا نبطل كتابه عن النيسان يمكن غيرانين يمكن مندوبين شركات أخرى الله اعلم بس فعلا بيكتبوا كلام غريب

وتوضيح انا مش باكلم عن النقد البناء علشان محدش يزعل

على العموم حصل خير و اهلا بيك دايما عندنا وتشرفنا
.

أستاذى الفاضل بعد السلام عليكم ورحمة الله وبركاته

اود ان انصح سيادتك ببعض الأشياء التى واجهتها مثلك تماما عندما نويت شراء سيارة جديدة وهى :
أولا / يجب السؤال والإستفسار على كل شئ حتى لو كنت مقتنع وحد عاب فى العربية خللى صدرك رحب .
ثانيا / مفيش حاجة مافيهاش عيوب خصوصا عندنا ولكن قيم السيارة من حيث العيوب والمزايا وانهى فيهم اكتر من التانية وحتى لو العيوب قليلة شوفها مؤثرة ولا يمكن التغاضى عنها .
ثالثا / شوف اسم شركة زى نيسان مش هتغامر باسمها وسمعتها عشان تجمع السيارة فى مصر اوتحط فيها مكونات هندى او مصرى الا بمواصفات معينة تحافظ على سمعة سياراتها .
وعلى فكرة انا لما جبت صنى 2008 لقيت فيها عيوب تجميع بس مش مؤثرة لأن أساسيات السيارة يابانى محدش لعب فيها , وبعدين نيسان من التوكيلات المحترمة فى مراكز الصيانة بتاعتها لو فيه اى حاجة حيغيروها على حساب الشركة مش حتدفع مليم , أستخير ربنا وتوكل على الله عز وجل والعامل النفسى عليه دور كبير جدا لا تستسلم لليأس اللى انت فيه ده محدش بيشترى عربية كل يوم افرح وفرح اولادك باستلام السيارة الجديدة وربنا يرزقك خيرها ويكفيك شرها والسلام ختام .

إدعوا لمصر ربنا يحرسها ويحرس أهلها
عاشت مصر عزيزة مكرمة مصونة بإذن الله

المشاركة الأصلية كتبت بواسطة ahmed.tv

شرف لينا وجودك معانا .. وشرف لى انى اتعرف على ناس محترمة مثلك واقراء كلامها الهادى المقنع حتى لو مش متفق معاه بس بتوصله باسلوب محترم حتى لو فيه اختلاف

بعيد عن الصنى الجديدة اللى هنا فى مصر .. تفكير العالم اتغير دلوقتى .. وكلنا عارفين ان كل المصانع العالمية بتتجه الى التصنيع والتجميع فى بلاد اخرى غير اوروبا واليابان .. فاكبر الشركات العالمية بتصنع وبتجمع منتجاتها فى الصين .. بس تحت اشراف ورقابة عالمية ومن الوكيل الام لهذه الشركات سواء كانت سيارات او مثلا اجهزة كهربائية وهكذا

وحتى الهند بردوا البلد الوحيدة اللى بتصنع نيسان ميكرا الصغيرة فى عائلة نيسان وبتصدرها الى اوروبا .. وعدم سبب نزول السيارة الى الان الاسواق المصرية ان تكلفتها حتكون غالية .. مع ثقافة العميل والسوق المصرى فمش حتحقق مبيعات

والله زى ما بحكيلك .. انا لو معايا تمن ومهر الجيتا حتى لو بتتقفل فى الصين .. حجيبها
او لو معايا تمن الهوندا حتى لو كانت صينى حجبها بردوا

يمكن العقبة الوحيدة اللى تقف قدامى فى عدم شراء هوندا او جيتا لو كان معايا فلوسها مثلا الوكيل .. لان يهمنى خدمة ما بعد البيع جدااااا .. واكيد فى ناس اخرى غيرى مش بيفرق معاها الموضوع ده .. بس عن نفسى طالما جايب جديد وزيرو لازم اتعامل مع التوكيل ويكون توكيل محترم وبيرضى عملائه

تحياتى ليك .. ومنورنا حقيقى .. واتشرفت بوجودك معانا

استاذ أحمد
ايه الكلام الجميل ده بارك الله فيكم
أشكركم على ذوقكم ومجاملاتكم الرقيقة
وعلى فكرة أنا باحب القسم ده ونادرا ماباكتب في قسم السيراتو
وعلى فكرة انا اول واحد بيهاجم السيراتو رغم انها عربيتي يمكن علشان انا عارف عيوبها اكتر من غيرها
حقيقي قسم محترم وجميع اعضاءه محترمين بارك الله فيكم

اخوكم