أول حاجة: قدر الله وماشاء فعل ....حمدالله على سلامتك مليون مرة والحمدلله جات في الحديد

تاني حاجة: ماتسيبش حقك وفعلاً أي حد مكانك كان قال أكتر من كدة, مش منطقي أبداً يكون عربية منزلينها تتباع من غير قطع غيار...ده حتى فلتر التكييف مش موجود في التوكيل وبادور اجيبه من برة مصر ازاي !!


تالت حاجة: بما ان حضرتك مش مأمن عليها سيبك من التوكيل والكلام الفارغ ده طالما هما مش هايحلولك حاجة في الوقت المطلوب, الكلام المايع اللي حضرتك سمعته ده بيدل على ان ماعندهمش أي حل في المستقبل القريب, علشان كدة اطلع على الحرفيين وخدها من قصيره , وكان فيه زميل مشكور هنا قال على مكان محل في شارع رمسيس عنده قطع غيار العربية الجديدة على ما أذكر ... ياريت يقوللنا مكانه وتليفونه ويبدأ التعامل معاه


رابع حاجة: لو عربية مالهاش قطع غيار, وهي سلعة معمرة وبتمشي في الشوارع وتتبهدل زيها زي أي عربية تانية, يبقى المفروض ماتنزلش أساساً قبل مايتوفرلها قطع الغيار, وبالفعل لو كان عندي معرفة ان قطع غيارها بالندرة دي ماكنتش جبتها إلا بعد توافر قطع الغيار .... كامل الحق معاك في انك تقول ماحدش يجيبها حالياً, لأنها بالفعل هاتقعد مركونة ومالهاش لازمة زي أي عربية صيني مالهاش توكيل حصللها حاجة !!! ... وللأسف عربية كويسة وأدائها محترم بتبوظ سمعتها بسبب قرش ملح , التوكيلات مش موفرة قطع غيارها بدعوى ان المصنع بيستعمل كل ما لديه !!! ده مش رد منطقي يقولوه لأشخاص راشدين


متابع مع حضرتك ومنتظر اعرف تطورات الوضع لحد فين , وياريت حضرتك تعمل موضوع صغير كدة تذكر فيه الأجزاء المطلوبة بالظبط , علشان كل واحد من الشباب هنا سواء جوة أو برة مصر يحاول يدور بمعرفته واللي يلاقي قطعة منهم يبعتها لحضرتك بالطريقة اللي تريحك , على الأقل نكسر الحصار اللي في مصر ونتعاون في توفيرها لحضرتك


وحمدالله على سلامتك تاني , ويارب تكون دايماً بخير


ومنتظر رد أحمد مصطفى ونشوف هايقول إيه في الحكاية دي