للأسف مشكلة التزييق فى الصنى الجديدة.. لا حل لها

**GRADER** · 08-09-2012 01:09 PM

[SIZE="5"]السلام عليكم ورحمة الله
للأسف كده مشكلة التزييق بقت شىء أكيد فى معظم سيارات الصنى الجديدة وانا بعانى منها أنا وأعضاء كتير من الى اشترو العربية وهى مش حاجة ممكن الواحد ينساها أو يتغاضى عنها بالذات لو بتعدى كل يوم على طريق مش مرصوف أو مكسر والظاهر كمان ان المشكلة دى مالهاش حل عند نيسان..

حاولت أقنع نفسى الفترة الى فاتت ان دى حاجة بسيطة وممكن تتحل بسهوله فى التوكيل

بس للأسف صديقنا الاستاذ engamin راح أوتو ايجيبت وده المفروض انه أفضل مركز صيانة قالوله ان فى تعديل مؤقت بتركيب كاوتشه تحت المساعد وده هما الى اخترعوه من دماغهم مش عارف ازاى !!! ولا كأنى رايح لعفشجى !! وقال ايه واخدين عليه اعتماد من نيسان وفى الأخر الحل ده فشل ولا عمل أى حاجة زى ما أفاد أخونا الاستاذ engamin

و بعدين قالوله ان نيسان هتبقى تجيب تعديل أصلى و تبقى تركبه للعربيات الى فيها المشكله دى فى المستقبل الى مانعرفش امتى لحد دلوقتى!!

وبعدين لما فى عربيات بتنزل من غير العيب ده ليه أركب تعديل فى عربيتى ؟؟!!!!!

و شوية أكتشف ان بطارية عربيتى سائلة وفى عربيات تانية نازلة ببطاريه جافة كلورايد وبالضمان !!!
طب لما هما شافو ان البطارريه السائلة مش كويسه وغيروها طب ذنب الناس الى استلمت بطارية سائله ايه؟؟!! وليه ماتتغيرش؟

ده معناه ان انا اشتريت عربية ب 102000 جنيه بتزيق ولازم أستنى وأستحمل الصوت الغبى ده وأستحمل تريقة أى حد بيركب معايا لما بيلاحظ الصوت الى مش ممكن ماتلاحظهوش..

انا حاسس بخيبة أمل كبيرة فى نيسان الى أول مرة أشتريها وحاسس بخيبة أمل أكتر فى مراكز الصيانة الى كنت فاكر انها من أفضل مراكز الصيانة فى مصر.

و أعتقد ان دى حاجة هتخلى ناس كتير قوى تغير رأيها فى شراء الصنى الجديدة لأن من غير المقبول ولا المعقول ان الواحد يشترى عربية زيرو فضل مستنيها شهور أو دفع فيها أوفر برايس غير مبرر وفى الأخر يحتار كده فى تصليح عيب صناعة فيها..

كان نفسى بدل ما أكتب الكلام ده أكتب شكرى للعربية واعجابى بيها بس للأسف الموضوع ده نسانى أى حاجة حلوة فى العربية

أرجو من كل من يمتلك السيارة وعنده نفس العيب انه يتواصل معايا ويشاركنا برأيه عشان نشوف هنعمل ايه فى المشكلة دى وهنتصرف ازاى مع التوكيل والسلام عليكم ورحمة الله

**john55** · 08-09-2012 01:46 PM

انا حضرتك شاري اكسنت ب105 وفيها نفس المشكله التزييق لما يكون حد راكب في الخلف لما رحت صيانه 5000 قلتلهم علي المشكله راح شايل صدادات المساعد وحط مكنهم حتيتين كاوتش وقالي ان الصدادات لا تناسب الطرق المصريه مشعارف اللي عمله دا صح ولا غلط علي المساعدين وشكرا

**exact** · 08-09-2012 02:24 PM

متابع

**saint2011** · 08-09-2012 02:28 PM

أنا لا أعتقد أن شركة عريقه ذى نيسان هتسكت على هذا العيب ونتمنى فى القريب العاجل يجدوا حل صبرا إن شاء الله وأيضا تابع مع أتو إيجيبت وربنا يسهل

**dr_hassan1eg** · 08-09-2012 02:34 PM

مين قال ان فيه عربيات نازلة ببطارية جافه؟؟؟؟؟؟؟؟؟؟؟؟؟

**saint2011** · 08-09-2012 02:42 PM

المشاركة الأصلية كتبت بواسطة dr_hassan1eg

مين قال ان فيه عربيات نازلة ببطارية جافه؟؟؟؟؟؟؟؟؟؟؟؟؟

فيه زميل على المنتدى لسه مستلم من أسبوع تقريبا او أكتر مستلم ببطاريه جافة وكان عامل تقرير أستلام بكده

**محمد بدر** · 08-09-2012 03:02 PM

تزييييييييييييييق !!!!!!!!!!!!!!!!!!!!!!!!!! أكيد هو ده نتيجة التقفيل المصرى طبعا" وبعدين لو دية البداية ممكن يظهر إيه تانى مع الإستخدام ربنا يسترها
ولاكن لابد من عمل مراجعة شاملة للسيارة ومراجعة التوكيل الذى يثق فيه معظم أعضاء المنتدى وممكن يساعدوك كما ساعدوا الأخرين وربنا يسلمها ان شاء الله

**ehab78** · 08-09-2012 03:34 PM

ان شاءالله خير وهتكون حاجة بسيطة
بس الواحد بيكون على اخره فعلا لما يدفع مبلغ وقدره في عربية زيرو ويكون حاطط في باله انه مش هيشوف وش بتوع الصيانة غير في مواعيدها العاديةفقط00ويفاجأ بان في اي عيب حتى لو كان بسيط وغير مؤثر على العربية نفسها000بجد حاجة تنرفز
ربنا معاك وخليك وراهم لغاية ماتشوف حل نهائي
ربنا يوفقك لكل خير

**Ahmed.TV** · 08-09-2012 03:37 PM

استاذ انس .. ازى حضرتك .. قلبى معاك .. انا عارف الواحد نفسه يدفع كل قرش ويلاقيه فى محله
انا حجاوبك .. على استفساراتك على قدر علمى ..
بس المهم انك لازم تصبر

انا واحد من الناس بسمع تنزيق فى الطابوه بتاع التيدا على فترات .. وفى عربيات كورى فيها تزيق وبى ام وبورا كمان اللى فى الكراسى واللى فى البلاستيك واللى كذا مكان فى العربية .. فحاول متركز معاه الفترة دى عقبال ما يتحل

بخصوص اوتو ايجيبت .. واى مركز خدمة اخر .. بيحاولوا يحلوا المشكلة بقدر ما بيتوفر من امكانيات قطع غيار عنده .. هما بيركبوا كاوتشة التيدا .. لان دى اقرب حاجة .. ومعنى انهم ركبوا كاوتشة التيدا .. يبقا اكيد فى كاوتشة للصنى باذن الله .. بس هى مش متوفرة عندهم ولا فى امركز خدمة .. فهما حيعلموا ايه !! فبيحالوا يتصرفوا

وبعدين بالنسبة للمصنع .. فى خط انتاج جديد وشغالين فيه بقوة فى الانتاج .. ولدرجة انهم بينتجوا اكتر من الخطة الانتاجية عشان يقدروا يحققوا طلبات العملاء .. العملاء اللى اكيد عاملة ضغط عليهم .. والكل عايز يستلم فى اقرب وقت لدرجة انهم بينتجوا 1800 سيارة فىا لشهر .. بعد ما كان من المخطط انهم ينتجوا 900 سيارة فقط

المهم ما علينا مش دى القصة ولا المشكلة كمان .. معروف اى قطعة غيار فى نيسان مش موجودة وبتيجى من بره مصر بتاخد وقت .. واسالنى انا فى قطعة غيار جتلى بعد 3 شهور

فهما اكيد بيتاكدوا ان المشكلة من الكاوتشة دى .. وحيبعتوا يجبوها من بره للناس .. وخالى بالك العربية بقالها شهور ومحدش اصلا كمان لحق عمل بيها 20 الف كيلو

وده خط انتاج جديد فى مصر .. ومتقلقش اللى مش متوفر حاليا حيكون متوفر بكمية وكثرة قدام .. عشان عايزين يثبتوا للعملاء ان كل حاجة فيها متوافرة .. وان نجاح العربية من توفر قطع غيارها

غير كدا المشكلة فى التزيق ده مش عاملة مشكلة ميكانيكة يكون منها قلق او ياثر على اداء العربية
الصبر بس وان شاء الله اكيد حيكون ليها حل .. بس الناس تصبر .. واكيد فى امل

وبخصوص البطارية .. بردوا انا شايفها انها حاجة جميلة .. وبالاخص للناس اللى حتستلم .. وبعدين زى ما قولنا .. دى حاجة تحسب لنيسان .. انها بتطور وبتضيف كل حاجة كويسة .. ويمكن مش انت بس اللى تتضايق ده مفروض ان ملاك التيدا كمان يزعلوا لان بطاريتهم سائلة ههههههههه

على العموم السائلة والجافة .. الاتنين فيهم ضمان .. واى مشكلة بتظهر فى السائلة وارد تظهر فى الجافة .. وكمان الاتنين زى ما قولتلك عليهم ضمان

اومال حتعلموا ايه لو لقيتوا مثلا ان الكاوتش اتغير وبقا بريدج ستون

ربنا يباركلك فيها .. واصبر واهدى وان شاء الله خير .. وارجع تانى لاوتو ايجيبت وقولهم الحل المؤقت ده مظبطش معايا .. وهما مش حيتاخروا ابدا

وان شاء الله خير

وربنا يعطيك خيرها ويكفيك شرها

تحياتى ليك يا جميل