الموضوع: تقرير صيانة ال 1,000 كيلومتر للعسوله byd f0 بتاريخ الاثنين 3\12\2012

أخواني الكرام اعزكم الله ورزقكم رزق حلال طيب و يسر عليكم احوالكم

اشارككم اليوم تجربتي مع توكيل القطامية و الصيانة الاولى للسيارة F0

- كنت قد حجزت يوم الاحد 2\12 بالتليفون و ردت علي انسه و قالت ممكن حضرتك تشرفنا بكره الساعة 10 صباحا.

- وصلت التوكيل الساعة العاشرة و كان اسمي موجود في الكشف و لقيت طابور طويل و لاحظت عدم الالتزام في الدور و بعض المحسوبية و المعامله الخاصة لبعض الناس و قد علمت بعد ذلك انهم رتب جيش او شرطة الله اعلم.

- معظم السيارات كانت F3 و 2 سياره Flyer و 2 سيارة F0 منهم سيارتي.

- منظر افراد الصيانه بصراحه يخوف ..تحس انهم صانيعية رصيف من شكلهم, لابسين هدوم عاديه و غرقانه شحم ومحدش فيهم لابس افرول او لديهم زي موحد غير طبعا المهندسين.

- استغربت جدا جدا من طريقة معاملتهم للسيارة. اول ما الفني يركب العربيه علشان يدخل بيها الهانجر تلاقيه اتحول بقدرة قادر الى سائق رالي!!! بصراحة انا زعلت من العافينة و سوء القيادة و مش لاقي اي مبرر ليهم سواء كان مستعجل او حتي بيجرب العربية قبل ما يشتغل فيها!!!

- دخلت العسولة الساعة 11:30 و خرجت حوالي الساعة 12:30.

- كان عندي شكوي من صفاره في التيل و راحت اول ما استلمت العربيه و بعد ما مشيت بيها شوية رجعت تاني.

- و شكوى من صوت طقه في العجل قدام و بعد ما العربية خرجت لقيت ماحدش عمل فيها حاجه و بالتالي العربية دخلت العربيه تاني الصيانه. و الحمد لله الصوت راح.

- عضة في الفتيس و دي لسه موجودة ...تقريبا دي حاجه اساسيه في ال BYD.

- و شرخ في باغة عداد السرعة و قد وعدني مدير المبيعات بتغيرها عند صيانة الاف و اكتشفت انه كلام فاضي لانهم ماعندهمش عدادات من اصله و الباشا كان بيتم البيعه بالنصب و احتفظت بحقي و اثبته في امر الشغل و كان الموضوع هايتكوس. المفروض هيجيبوا عدادات في الشحنه الجايه و الله اعلم.

المهم خلصت الساعة 2:30 و احب اقول التوكيل في مجمله يعاني من سوء الادارة و الالتزام و قلة النظافة و لازم تتابع العربية في الهانجر و هيه خارجه و تتابع امر الشغل ووصول امر الشغل للحسابات ده لو حابب تنجز و برضه انت و حظك.

- اما العسوله فهي محترمة جدا و اقتصادية جدا (بتعمل 300 كيلومتر في الصفيحة) داخل البلد و لسه هجربها في السفر بس ربنا يكرم و ييسر الحال.

اااه نسيت لو بتحب القهوة اوعى تشرب بن من عندهم و اعمل زي واحد ناصح شوفته جاب شوية بن في كيس معاه

الف مبروك يا باشا على الصيانة و عقبال صيانة ال100000 كم ان شاء الله

و على فكرة كل التوكيلات فيها بلاوى و اكثرهم ناس بتتعلم على العربية

تحياتى