لسه شارى ابيزا 98 ورحله العذاب

**mido_more** · 14-12-2012 08:24 PM

بسم الله الرحمن الرحيم...اولا لانى جديد فى موضوع العربيات دى ولما نويت اشترى عربيه رشحولى ابيزا لانها بختصار يعنى متوافقه مع اللى انا عاوزه شبابيه والكلام ده ..المهم علشان ادخل فى الموضوع على طول...لما اشتريت العربيه للاسف مجبتش ميكانيكى يشوف اخبار الموتور ..اخدتها وحاسس ان صوت المكنه غريب !!! قولت مفيش مشكله اروح عند اى ميكانيكى وان شاء الله حاجه بسيطه..المهم اخدت العربيه من القاهره ..للمنصوره غيرت مساعدين ..وشويه تظبيطات بسيطه فيها كده..بس فى كام مره كده المؤشر بتاع الحراره يعلى .ابطل وازود ميه وتمام تشمى عادى...المهم توكلت على الله ونويت على السفر ...لشمال سيناء..طلعت الساعه حوالى 6 من المنصوره وعلى الدولى الساحلى .اولا امبير الحراره فصل.قولت بس اوصل وربنا ييسر..فجأه بعد حوالى ساعه مشى لما اهدى بالعربيه على مطب ولا حاجه ..تبطل لوحدها .بس ادور بتدور على طول..الجو بليل وانا تعبان ونفسى اروح وبس ..عديت كوبرى السلام ب 50 كيلو العربيه بطلت مش راضيه تدووووووووور ابدا.سبتها شويه بصيت على القربه ولا نقطه ميه فيها ...صبرت لما بردت ودورت وزودت ميه مفيش 5 كيلو نفس الموضوع بصيت على القربه ولا نقطه ميه !!!!!!!!!!! راحت فين الله اعلم .اكيد اتبخرت...المهم احاول معاها مفيش ..لما دارت لقيت الشكمان دخن ابيض .قولت كده باذن الله وش سلندر..فاضلى بس 20 كيلو واوصل وصلت المروحه مباشر وشديت ودالوقتى مرميه تحت البيت ..مش متخيلين طبعا كميه الاحباط ...اجيب منين فلوس تانى اصرف عليها موتور .مش عارف اعمل ايه فيها ولسهه عاوز ارخصها وموالى طويييييييييييل ..ياريت اى حل من خبراء المنتدى ..

**Karim Ibiza** · 14-12-2012 09:36 PM

انزل بورسعيد وهات شورت بلوك وركبه وده هيكون اوفر حل وهيعمل من 1500 الى 2000 جنيه ومتصلحش الموتور اللى فيها لان تكلفة التصليح هتكون نفس تكلفة الشورت بلوك ومش هايعيش معاك

**Ahmed_Gallant** · 14-12-2012 10:55 PM

اولا قدر الله وماشاء فعل
ثانيا زى ما الاعضاء قالو فوق مينفعشى تسافر بالعربيه فى حالات كتير زى انها تكون بتسخن او مافيهاش نور عالى او الكاوتش تعبان ومش معاك استبن او الفرامل ضعيفه او فى معاد فى الصيانات حل وانت مغيرتشى القطعه دى خصوصا سير الكاتينه لان الحاجات دى فيها خطر عليك اولا والعربيه ثانيا
ثالثا كنت الاول لما بكون فى مشوار خصوصا سفر ممكن اجى كتير على العربيه واستهلكها فى مقابل انى اوصل البيت ومش مهم العربيه زى انى مشيت بالعربيه 20كيلو ومفيهاش زيت فى الفتيس بس عشان مش عايز اتعب نفسى واقطرها لاى حد بتاع زيوت وواحد معرفه مشى بالعربيه بتاعته 40 كيلو من غير ما يكون في زيت فى الموتور وده خلى البستم يكسر البلوك من الجنب والله يرحم الموتور بتاعه على كده
اقرب موقف حصل معايا ركبت شنبر جوه فرده عجل وكنت مسافر والاستبن فى كذا خرم وبيريح على 3 ايام ونسيت ازوده وانا ماشى على 100 العجله راحت نامت وبقت على الارض وانا محستشى بيها غير وهى مولعه بدون مبالغه رحت واقف على جنب ونسيت الشغل اللى انا رايحه ونسيت انى انا فى وسط الصحرا رحت باصص على الكاوتش واتاكدت انه انتهى رحت ماشى بيه على سرعه 20 لاقرب واحد بتاع كاوتش رحت زودت الاستبن بس عشان لو قلتله ركبلى داخلى صباح الاستغلال هو اصلا زود الفرده ب2 جنيه :) وكملت طريقى ووصلت قبل معادى بنص ساعه وخلصت شغل وظبطت هوا واتكلت على الله وبعدها بيوم رحت اشتريت كاوتشين جداد والحمد لله الجنط اللى مشيت عليه محصلوش حاجه وده لان اخويا قاللى ايه اسوأ حاجه هتحصلك يعنى هتقف بيك فى الصحرا قفل عربيتك عليك واستغطى ونام للصبح والف مين هيعدى عليك ويساعدك ده لو بالليل وانت معاك موبايلك تتصل باهلك وتقولهم حد ييجى يقطرنى فى 100 حل بس مش عارف ليه الواحد عربيته بتهون عليه فى الوقت ده
رابعا نصيحتى انك تجيب شورت بلوك زى ما الاخوه قالو ولو مش معاك فلوس هتجيب بلوك بس اللى هو النص التحتانى بس ده فى حاله ان وش السلندر بالصبابات بالتاكيهات بالمانفولد بالسلطات بالبابا غنوج سليم وده هيقلل التكلفه معاك جدا بس هتركب جوان وش السلندر وده الفرق ان الشورت بلوك هييجى مقفول على بعضه لكن البلوكه هيبقى فى شغل اضافى ولازم ميكانيكى كويس عشان يقفل الجوان صح لان المكن ده مبيهزرشى وبيتلكك ان حد يمد ايده فيه
خامسا اوعى تحبط من اولها كلنا بنمر بازمات مع العربيات دى المهم انك تفتكر انها كانت بتفرفر منك وتبطل بس وصلت لبيتك سالم
تحياتى
و
اسف على الاطاله

**mido_more** · 15-12-2012 01:05 AM

اولا عاوز اشكر كل اخواتى اللى ردوا على الموضوع..بس اخوكو داخل على جواز كمان كام شهر..اركب شورت بلوك ..ولا اركب جوان وش سلندر وخلاص واهى يمكن تمشينى الكام شهر اللى جايين..ولا يمكن لما الميكانيكى ىيشوفها يقولى المكنه ضاربه خالص ولازم تغير يا اما تعمر .ساعتها مش عارف اعمل ايه..وكمان انا اقرب مكان ليا فعلا بورسعيد..ياترى امشى بيها وكل كام كيلو احطلها ميه ولا اقطرها وخلاص ..وانا مش عارف انا جايب عربيه توفر عليا الموصلات طلعت هيا كمان عاوزه حد يوصلها ولا ايه...يا جماعه قالولى لو وش سلندر مش هتكلف 400 جنيه..ويمكن اقل ولو قطرتها هدفع كتير المسافه كبيره فعلا..

**SYD** · 15-12-2012 02:21 AM

في البداية احب ارحب بيك في قسم سيات نايل موتورز

الف مبروك عليك العربية - ربنا يديك خيرها ويكفيك شرها

قدر الله وما شاء فعل

في البداية كدة - انت طالما الشكمان دخن ازرق × أبيض يبقي كدة الجوان مسافر وطبعا دة كان احد اهم اسباب نقص المياة في القربة - وطبعا كان ممكن تلحق نفسك قبل ما تدخل في الحوار دة بمجرد انك لقيت الحرارة عليت والمياة نقصت - لأن العربيات دي صعب شوية تجيب جوان بالسهولة دي
اعضاء عندنا كتير منهم انا ومنهم احمد جالنت مشينا بعربياتنا بدون مياة في القربة او بدون طرمبة مياة اصلا
وطبعا دة قمة الأعتمادية في العربيات دي

انت ابسط الحلول دلوقتي واوفرها انك تقشط وتركب جوان ولو الوش قفع منك يبقي هتركب جوانين
وكل دة مش مشكلة ومش هيعيب الموتور او العربية في شئ - بس اهم حاجة الشغل يتعمل صح وياريت عند حد متخصص او حد معروف بالأمانة والشغل النظيف
تاني الحلول وهو انك تجيب بلوك استيراد

بس انت ماقولتلناش عربيتك موديل كام والمكنة اللي فيها ايه ؟؟

عموما انت بس الأول ابحث وراء مشكلة نقص المياة وشوف التسريب منين - هل من احد الخراطيم او من الردياتير نفسه او القربة او شجرة المياة او طبة حساس الحرارة او الطرمبة او او او
واعمل مؤقتا الجوان وان شاء الله العربية هتظبط معاك

واحنا سوا ان شاء الله وهنمشي معاك خطوة بخطوة
العملية بسيط وابسط مما تتصور وكله محلول وياما دقت علي الراس طبول واكتر من كدة وربك بيزيح

تحياتي لحضرتك

والله المستعان
،
،

**mido_more** · 15-12-2012 03:48 PM

العربيه يا جماعه موديل 98 مكنه 1800 ..بتدخن ابيض وبلاقى تحت الشكمان سواد كتير على الارض..وبعدين العربيه سربنتينه ..ايه موضوع الراديتير ده فى الابيزا ..مش عندى:b4_556:..وهل امشى بيها ولا لا؟

**sameh_se** · 10-01-2013 12:54 PM

بص مفيش اى داعى للياس الى انت بتقولة دة بيقول ان حضرتك السبب بس انا مبقلش انك غلطان كل واحد ادرا بظروفة و حضرتك الى كنت فى الموقف بس الى انا عايز اقوله ان المكن ده عن تجارب لما بيظبط بيدلع صاحبه .
و الى حضرتك بتقولة ده اكد لى ان مواتير فولكس دى بيبقى فيها الخراب و مابتقلش لا .
بس برده الحجر الداير لابد من لطه على العموم ربنا يكون فى عونك و يهدي لك عربيتك و يخف عنك افتكاسات الصنايعية .