انا راكب بلاعه بنزين 6 سلندر و بتعمل 90 كيلو في الصفيحه جوة البلد و رافض احولها غاز, و مش مقتنع بية و مقتنع بتأثيرة التدميري عالموتور, و كمان سوء الاداء و ان اي حد بيحول غاز بيتخنق من العربية و يحس انها بطة

العربيات اللي بتتحول غاز بنجاح اللي بتشتغل تاكسي علشان بيمشي كل يوم الف كيلو و زيادة و يفرق معاه سعر الوقود
و كمان لانة كدة كدة بسبب الاستهلاك العالي بيعمل عمرة كل سنة مثلا

انما عربية ملاكي بتستعملها 2000 كيلو في الشهر بالكتير (بالنسبة لي انا ممكن 4000-5000 كيلو في السنة ) مشاويرك قريبة و قليلة يبقى ليه بتهدلها و تهينها و تلعب فيها وتقصر عمر موتورها الافتراضي و ممكن تندم و تبقى عكيت العربية

و حاجة تانية كمان

الغاز دة بيكلفك حوالي 5000 جنية على ما اعرف علشان تحول العربية, حتى لو مش بتدفعهم مرة واحدة و انما بيتم تقسيطهم عليك على استهلاك الغاز بكارت او بقسط شهري

طيب احسب كدة التوفير اللي انتي وفرتة بتحويلها غاز دة و قسم ال 5000 جنية على شوف حاتوصل للبريك ايفين بعد كام سنة


يعني مثلا نقول لو متر الغاز بيوفر مثلا 75 قرش عن لتر البنزين يعني ال 5000 جنية (تكلفة الغاز دي) تبقى انت لميتها بعد استهلاك 6600 متر غاز تقريباً, و لو انت اصلا بتستهلك 80 لتر بنزين في الشهر يبقى انت دفعت فرق استهلاك 7 سنين بنزين علشان تحولها لغاز
و بالتالي انا اقولك هو انت اصلا حاتقعد بنفس العربية 10 سنين علشان تعمل كدة !!! و للا انت بتخاطر و ممكن تكرة العربية و تعمللك مشاكل و بتكلف نفسك عالفاضي بنسبة مخاطرة عالية وساعتها اللي يقولك اصلك نسيت تمشي عالبنزين اول الدوارة ربع ساعه و للا نسيت تقلب بنزين الصبح و لا مش عارف اية و لا اية و المؤدى في الاخر انك دمرت موتور عربية علشان توفر 75 في كل لتر و دة بعد اول 7 سنين استهلاك

الحل الافضل و العملي هو انك تخلط بنزين 80 مع ال90 او 92 و ليكن بنسبة نصف او ثلث التانك و بالتالي انت بتوصل لتكلفة مقاربة من تكلفة الغاز لو مثلا متوسط البنزين 125 قرش لللتر

ودة انا جربتة لمدة شهرين بقت احط نصف التانك 80 النصف 92 و العربية زي ماهيه و فرق السحب تقريبا بسيط و ملحوظ بالكاد

بس الاول تأكد اية اقل رقم اوكتان للبنزين اللي ممكن تمشي بية العربية

ودة مكتوب على باب تانك البنزين من جوة في تيكت

عندي مكتوب ان دة 85 اوكتين و بالتالي انا راعين الحسبة تبقى ان تخليط البنزين مايقلش ابدا عن ال 86