بسم الله الرحمن الرحيم


من صغرنا وكانت لكل عربية قديمة اسم مميز ليها , وده بيكون ناتج من مواقفها الكتير مع السيد الوالد (كتير مواقف أصيلة ... وأكتر منها مواقف بايخة )

وفي الغالب كانت الست الوالدة هي صاحبة التسمية , ولو جينا للعربيات القديمة كان الاسم مابيخرجش عن حاجة من اتنين : "زوبة " ... أو "عزيزة"


لكن مع التطور في أشكال وأنواع العربيات ومواقفها العجيبة والغريبة , بقى معظم الناس بيسموا عربياتهم تسمية متطابقة مع وجهة نظرهم عنها

عن نفسي ليا صديق عزيز مسمي عربيته "برعي" ... هي بصراحة ماينفعش معاها غير التسمية دي


وكانت فكرتي اننا نكسر الملل وكل واحد فينا يدخل يقول الاسم اللي سماه لعربيته , بس يقوللنا اسم موديلها والاسم اللي اخترعه ليها


وهابدأ بنفسي :

نيسان صني - 2013 أوتوماتيك - لونها دهبي

اسم الدلع : "نانسي" ... خطر في بالي لما كنت حاجز عربية برونزي وكنت مزنوق ومش لاقي غير الدهبي متوافر , وكان لونها بيفكرني بنانسي ... ازاي؟؟ ماعرفش


ياريت كلنا نقول بقى التسمية اللذيذة للسيارة العزيزة , وربنا يبارك لكم جميعاً فيما رزق


سلام عليكم