رحم الله ايام طفولتنا الغبراء
الواحد كان عايش فيها زي القطه
ياكل ويلعب وينام
يروح المدرسه ويرجع يلعب وينام
ويروح مع ابوه الشغل ويقعد يتباس من زميلات ابوه وهو مكسوف وحيعملها علي روحه
ويرجع بكيس الحلويات المتين كنز كنوز الارض بالنسباله ايامها
لعن الله هذه الايام اللي الواحد مكانش حاسس فيها بقيمه اللي بيحصله
كميات من الدلع والحنان الواحد بياخدهم في الوقت اللي ميعرفش قيمتهم فيه
مع انه لو اخد ربعهم وهو كبير كان زمانه محسش باكتئاب عمره
هي الحياه كده
دايما تدي الواحد الحاجه في الوقت اللي ميعرفش قيمتها فيه
علشان يقعد طول عمره يتحسر عليها


طبعا بتسالوني ايه لازمته الكلام ده دلوقتي
حقولكم اصل الموضوووووووووع

الواد بودي ابن اختي في تانيه ابتدائي
معاه مفكره صغيره كده بيكتب فيها اي حاجه
وممكن يكون مبيكتبش فيها حاجه من اساسه
اخدتها منه بنت زميلته وكتبتله فيها انا بحبك اوي يا عبد الرحمن (:
امه اكتشفتها وحكت لامي وانا عرفت من امي والواد مبسوط اوي بصاحبته اللي بتحبه
فاخذتني الذاكره لايام ابتدائي ايام ما كان الواحد مش عارف قيمه حاجه
لما واحده زميلتي ساكنه جنبي تتميز بالعيون الملونه والشعر الاصفر الحرير
مشيت معايا واحنا طالعين من المدرسه ومروحين
وكل ما تقرب مني انا اسيبها وامشي علي الرصيف التاني ):
وهي تعدي وراياوانا بنفس الغباء المستقبلي اللعين اسيبها وامشي برضه
فعلا كنا جيل خايب اخره ياكل باكو الشيكولاته وينام
انما جيل دلوقتي
واخد حقه تالت ومتلت في كل حاجه ومن صغره كمان
ايييييييييييييه دنيا
يلا قولت احكيلكم وافكركم بحاجات اكيد حصلت لكل الناس هنا
واحسركم علي حاجات كانت في ايدينا في ايام مكناش فاهمين فيها حاجه
هههههههههههههه