لو حنتكلم على شقاوة المدرسه
فالواحد ليه صولات و جولات و اجمل ذكريات
لأننا كنا فى المدرسه تقريبا من اولى حضانه لغايه لما خلصنا ثانويه عامه
و كل فصل ليه فتواته اللى بيتخانقو للدفاع عن اصحابهم او مع فتوات الفصول التانيه
و طبعا اول ما الخناقه تبداء تلاقى المتفرجين عملو حلقه و انطلق الهتاف الشهير "we will we will rock you "
لأ اسف مش هو ده احنا كنا بنقول "عاوزين دم عاوزين الناس تتلم" .. بس بنفس الحماسه
انا كنت فتوة الفصل لغايه خامسه ابتدائى و بعد كده خت علقه من واحد اسمه "اسلام عبد الرحمن" اتهزمت فيها و بعد كده اعلنت اعتزالى
و فى مرحله فى اعدادى كنا عاملين عصابتين و كل عصابه ليها مقر لها (اللى فاكره مقر عصابتنا كان فى حته وراء الجامع اللى كان فى حوض المدرسه)
وكل عصابه تعمل غاره على العصابه التانيه
غير ماتشات الكوره و اللى كنت بحب اقف جون على عكس الناس كلها
كانت ايام ... طبعا انا دلوقتى فى القاهره و صلتى اتقطعت بزملاء الطفوله
لكن ربنا يخلى الفيس بوك جمعنا تانى
وسبحان الله تشوفنا دلوقتى استحاله تقول ان المجموعه دى كانو زملاء طول فترة المدرسه (من اولى حضانه الى ثانوى)
فعلا لما افكر فيها الاقى اننا مجموعه متباينه جداااااااااا دلوقتى
فمننا اللى طلع دكتور و مهندس و الظابط و اللى شغال فى بنك و اللى مش لاقى شغل
و اللى شغال لسه فى اسيوط و اللى فى القاهره و اللى بره مصر (ماليزيا - دبى - السعوديه - الكويت - البرتغال.... )
مننا الثورى و اللى من ابناء مبارك و اللى من الاخوان و مننا كمان شهيد
شهيد معروف هو النقيب احمد جلال اللى استشهد على الحدود الاسرائليه بنيران طائره اباتشى فى رمضان 19 أغسطس 2011.
أسيوط تودع شهيد مصر علي الحدود
سبحان الله
المفضلات