نيسان ولا لانسر ولا إلنترا أرجوكم الوقت قرب جدا على الشراء

**tarek3elmasry** · 25-06-2007 05:00 PM

أنا محتار والله لإني عندي أسرة صغيرة بنت و ولد في الإعدادي و الإبتدائي , ومحتار علشان العربية لازم تكون عائلية و أتوماتيك وقوة الموتور 1600 وفي حدود 90000 جنيه إن شاء الله . وأنا عايش بره وراجع كمان أسبوع . ومن إمبارح ومن ساعة ما إتعرفت على موقعكم الجميل ده و أنا في حيرة من كثرة القراءة . نيسان ولا لانسر ولا إلنترا أرجوكم الوقت قرب جدا على الشراء . أتمنى أن يلقى سؤالي هذا إستحسانكم .

**وائل عطية** · 25-06-2007 05:03 PM

لانسر وانت مغمض طبعاً ومش هاتندم إن شاء الله
يليها الصني (فقط بسبب التقفيل المصري)
أما الإلنترا دي المفروض ماتتحطش مع اللانسر والصني في مقارنة

**hazem_khidr** · 25-06-2007 05:26 PM

زي ما الاخ الكريم وائل عطيه قال لانسر بس متهيالي ال 1600 ازيد من 90 الف!! عموما ححاول اسالك
هيا انا شايف حاجه في اللانسر ممكن تكون ميزه و عيب في نفس الوقت
الانتتشار الرهيب دا ميزه في قطع الغيار و سهوله الصيانه لكن عيبها انها بقت كتير اوي و اي حد بيركبها مع احترامي لكل الاخوه لكن بحس انها بقت زياده اوي

**إسلام شاهين** · 25-06-2007 05:44 PM

أما الإلنترا دي المفروض ماتتحطش مع اللانسر والصني في مقارن

لو شريف المصري سمعك هتبقى مشكله
لانسر وانت مغمض طبعاً ومش هاتندم إن شاء الله

مغمض مفتح الصح طبعا هو الانسر

الانتتشار الرهيب دا ميزه في قطع الغيار و سهوله الصيانه لكن عيبها انها بقت كتير اوي و اي حد بيركبها مع احترامي لكل الاخوه لكن بحس انها بقت زياده اوي
الانتشار ده أكبر شهاده نجاح لجوده وقوة العربية ومدى إعجاب الناس بيها ومدى وضوح إن العربية (بالنسبة ليا ) ملهاش حل اتكل على الله وصدقنى مع الانسر مش هتقدر تغمض عنيك

**معاذ الشرباصى** · 25-06-2007 05:49 PM

كريم منير بيقول لو رحت جبت لانسر خليجى من ناشيونال موتورز على 92الف

اتأكد منه من المعلومة

**hazem_khidr** · 25-06-2007 05:49 PM

يا اخ اسلام انا ما شككتش بقدره العربيه لا سمح الله و لا قولت عليها حاجه وحشه بس الانتشار دا فعلا مشكله بالنسبالي يعني لو حجيبها حغير في شكلها جامد علشان تبقي مميزه .

**إسلام شاهين** · 25-06-2007 06:00 PM

يا حازم أنا ماقلتش إن شككت في قدراتها لأن مينفعش حد يقول عليها كده مش عشان حاجه عشان هيا عربية فعلا مالهاش حل (برضه بالنسبة ليا ) وأعتقد لكل اللي راكبينها وبعدين الواحد مابيجيبش عربيه علشان يبقى مميز إلا لو هيركب مرسيدس أو بي إم أو حاجه تانيه غير منتشره المهم عربيه أصيله وجامده وتستحمل ، وفعلا الانسر دلوقتي هي رقم 1 .

**Hossam Mounir** · 25-06-2007 06:07 PM

أما الإلنترا دي المفروض ماتتحطش مع اللانسر والصني في مقارنة

أستاذ ...وائل ... مع أحترامي لحضرتك ... حضرتك ركبت الألنترا الجديدة ... طيب ممكن تكون ركبتها ... سوقتها ...

فى الحالة دى بس هأقبل كلامك ... أما لو سيادتك ماركبتهاش ... ومسوقتهاش ... يبقى حاول تغيير ردك اللي أنت كاتبه ... يا سيدى الفاضل ... أنا ركبت الانسر حوالي 10 مرات وسوقتها مرتين(الأتوماتيك) .... ومعايا حالياً الالنترا الجديدة عامل بيها 1250 km ... حتى كتابة هذه السطور احب أقولك .... ما فيش فعلاً ... وجه للمقارنة بينها وبين أى عربية اتوماتيك أنا ركبتها... من حيث الأتي :
التسارع ... السحب ... الثبات على السرعات العالية علشان المبالغة أن جيبت 135 km/hr وما عرفتش أزود أكثر من كده علشان كان معايا المدام وبنتي ( العربية ما تهزتش مني) ... الباور بتاع الدركسييون EPS ... التكييف وتأثيرة على سحب العربية ...

على فكرة أستاذ معتز سليم ... معاه المانيوال ... وجاب بيها 170 ... وبردة منتهى الثبات ... وأنا اسف يا معتز ان كنت قولت المعلومة دى علشان تخصك ... بس بصراحة مداخلة أستاذ وائل ... أجبرتني على الرد ...

بصراحة عربية ما فيهاش غلطة ... بالأضافة للتقفيل الشيك أوى أوى ... ووسع الصالون ... مع حجم شنطة مثالي لعائلة مكونة من 4 أفراد ... وده بقى رد عن تجربة ...
وكفاية كدة ... علشان ما يحسد المال إلا أصحابه ... :D :D :D

تحياتي للجميع ....

م / حسام منير

**bassam nagy** · 25-06-2007 07:02 PM

سوء النيسان صنى او الانسر من المفترض ان الاشكال الجديدة نازلة مصر النيسان صنى الشكل الجديد 2008 موجودة خليجى فى معارض كتيير اما الانسرلسة مانزلتش بس على وشك غير ان سحبة الانسر الاوتوماتيك مش اد كدة. الالنترا شكل جديد وعربية واسعة ومريحة غير موتور 1600 121 حصان