تركيب مثبت سرعة وصيانة وهمية فى منصور

**nagy wassef** · 31-12-2012 10:11 AM

من كام شهر رحت لمنصور اللى فى الهرم ده و كنت عايز اركب مثبت سرعة فا قالولى ب900 جنيه.
قلتلهم ليه غالى كده قالولى طب خلاص جدعنة مننا هنعملك صيانة 20000 ببلاش ( العربية كانت عاملة ساعتها 18000)
قولتلهم اوك تمام ؟
و فضلت منتظر حوالى خمس ساعات على ما البهوات خلصوا بس بعد ما دفعت الفاتورة ببص فيها لقيت انهم مش كاتبين انهم عملو صيانة العشرين.

سالت قالولى روح للمهندس (الصراحة مش فاكر اسمه بس هو مليان شوية) المهم قاللى ولا يهمك و راح كتبهالى بأيده على الورقة.
المهم انا كنت جبت اخرى و تعبان رحت سلمت و مشيت تمام؟
بس بعد استخدام كام شهر و العربية ماشية 23000 كده حسيت ان صوت العربية عالى قوى و على طول ريحة الزيت مفحفحة و لو انت واقف وانا عديت بالعربية هتشم و تنبسط :)

انا قلقت و رحت اشتريت كاسترول 10 الاف و رحت للميكانيكى و نزل الزيت و قاللى ليه اتأخرت كده على الزيت دا نازل مية قلت له ماتأخرتش دا من 5 الاف بس قاللى مستحيل يبقى اللى قاللك غيروا ضحك عليك.... و فعلا الزيت اسود فحمة و مفيهوش اى لزوجة و ريحته صعبة قوى و نازل بيغلى.

مكنتش عارف افرح انى لحقت العربية و لا اتضايق انى اضحك عليا كده و الفلوس اللى خادوها ديه اللى مش من حقهم.
و ليه يعملوا كده؟ هى الكام ميت جنيه بتوعى همة اللى هيغنوهم؟ الضمير خلاص اختفى!!!!

مش عارف اعمل ايه معيش حاجة تثبت و انا مش متعود اسيب حقى.
منتظر ردودكم و اسف للاطالة.

**ahmedeg1** · 31-12-2012 11:13 AM

انتا غلطان لازم تشيك على الصيانه بنفسك

**nagy wassef** · 31-12-2012 11:21 AM

يعنى خلاص حتى التوكيل......

**akmm** · 31-12-2012 12:00 PM

حسبى الله ونع الوكيل ... حتى التوكيلات ... روح تانى لهم وشوف حتوصل لأيه معاهم ومعاك الفاتوره والكتابه اللى باليد عليها ويمكن يكون المهندس نفسه مهمل فقط مش قصده يغش ....ولكن لازم فيه مواجه معاهم وقابل مدير المركز الأول وصر على المقاباه دون ان تقول انه فيه مشكله عندك فى العربيه من الصيانه الأخيره .... ولازم تقابله ... ونحب نعرف فى النهايه وصلت لأييه ؟

**nagy wassef** · 31-12-2012 12:12 PM

طب و انا هثبت ازاى كلامى؟ ممكن يقوللى الزيت اتغيير...... ده اذا اصلا اقروا انهم عملوا الصيانة

**nagy wassef** · 31-12-2012 12:40 PM

كلمت واحد اسمه هشام الحبال المدير المالى هناك عشان انا كان معايا رقمه قاللى وليه غيرت الزيت بعد كده بره!!!!!!!!!!!!!!!!!!!!!!!!! قلتله هو انا هعتب عندوكوا تانى؟ قاللى و انت عايز ايه دلوقتى؟ قلت له انت قلى... على الاقل يا سيدى بكلمكوا عشان متكرروهاش مع حد تانى راح قاللى متشكريين يا سيدى و راح قفل!!!!!
كلمت الصيانة واحدة ردت عليا قالتلى عادى الزيت لازم يتغيير كل 6 شهور!!!!! يعنى حضرتك عايزه يقعد قد ايه!!!!! رحت قفلت فى وشها.. منهم لله

**ENG\AHMED** · 31-12-2012 02:24 PM

الزيت ميقعدش اكتر من 6 شهور حتى لو مامشيتش كيلو واحد
وواضح كدة من موديل العربية والعداد انه بيقعد كتير اوى ودة غلط

**هيثم الدسوقى** · 31-12-2012 02:31 PM

المشاركة الأصلية كتبت بواسطة nagy wassef

كلمت واحد اسمه هشام الحبال المدير المالى هناك عشان انا كان معايا رقمه قاللى وليه غيرت الزيت بعد كده بره!!!!!!!!!!!!!!!!!!!!!!!!! قلتله هو انا هعتب عندوكوا تانى؟ قاللى و انت عايز ايه دلوقتى؟ قلت له انت قلى... على الاقل يا سيدى بكلمكوا عشان متكرروهاش مع حد تانى راح قاللى متشكريين يا سيدى و راح قفل!!!!!
كلمت الصيانة واحدة ردت عليا قالتلى عادى الزيت لازم يتغيير كل 6 شهور!!!!! يعنى حضرتك عايزه يقعد قد ايه!!!!! رحت قفلت فى وشها.. منهم لله

التوكيلات والله كلهم شوية حرامية

انا باشوف ميكانيكى كويس وبافضل واقف على ايده عشان اعرف هو اشتغل فيها ولا لاء بس المشكلة فى التقفيل انك ما تعرفش ايه اللى فيه

و كله بقى مابيصدق واحد بيصدقه عشان يسرقه ومفيش ضمير خالص وربنا يعوض عليك فيها بجد

**nagy wassef** · 31-12-2012 02:57 PM

ازاى يا باشمهندس احمد انا اللى اعرفه زى كل الناس انه سنة مش 6 شهور ثانيا ماينزلش اسود محروق بالطريقة ديه ثالثا حتى الفلتر لم يتم تغييره و بعدين هو صيانة العشريين ديه مش فيها حاجات تانية غير تغيير الزيت