لحام كاوتش ب4 خوابير لخرم واحد

**windofchange** · 01-01-2013 03:57 AM

السلام عليكم يا شباب نايل موتورز......ان شاء الله تكونوا بكل خير وصحة وسعادة .. النهارده لقيت بتاع الكاوتش قافل ولان الفردة كانت نايمة (ضغطها كان 25) فرحت لبنزينة موبيل اللي في اوتوستراد شيراتون المطار والخرم اللي لقاه (الفردة الامامية) قاللي انه ملحوم قبل كده ب3خوابير المهم انا مش فاكر انه اتلحم قبل كده...وقاللي اللي هيسد الخرم انه يتعمل ب4خوابير ومش عارف ايه طبعا انا اول مرة اسمع الكلام ده (والقاعدة اللي بتقول ان بتوع الكاوتش اللي فالبنزينة اغلبهم غشاشين في دماغي) فدفعت 10 ج*4 خوابير برتقاني يعني 40 جنيه واديته 3 جنيه بقشيش دلوقتي اللي عمله ده صح ولا نصب ؟

**alking_2006** · 01-01-2013 10:10 AM

نصب طبعا

اولا: الخابور ب 5 جنيه فقط فى كل الدنيا و البادج هو اللى ب 8 الى 10 جنيه
ثانيا: الخابور بيبهدل فردة الكاوتش و الاصح انه يتعمل ببادج من العجلة من الداخل و كمان يتسخن عليه

روح بسرعة ظبط العجلة شوفها تنفع تانى اصلا و لا ايه النظام (دى عجلة امامية يعنى مفيهاش هزار)

**amrelsaqqa** · 01-01-2013 10:31 AM

حسبى الله ونعم الوكيل
نصب طبعا!

43 جنيه ليه اصلا ، بعيدا عن انه دمر الفردة ، بس اصلح فردة بما يقرب من 50 جنيه ليه ، ده الفردة على بعضها مستعملة ساعات بتيجى بالسعر ده

اكره الصنايعى اللى يقشطك ويبوظلك الدنيا في نفس الوقت ، والله بفضل ادعي عليه كل ما افتكره
يا اخى عايز تاخد فلوس خد، طماع وشماط ماشى ، انما كمان تبوظلى الدنيا عن عمد عشان تاخد الفلوس ، حر ونار في جتة اللى خلفوك

صعب اوى لدرجة مستحيل ان خرم واحد يتعمل بـ 4 خوابير، والا كانت الفردة بقى ضغطها 5 مش 25

**windofchange** · 01-01-2013 10:54 AM

شكرا يارجالة وحسبي الله ونعم الوكيل...هي الفردة عايزة تتغير عموما بس ازاي كده هي باظت هو عمل خرم واحد ب4 خابور بس مرة واحدة دخل الخابور مش 4 مرات

**alking_2006** · 01-01-2013 11:28 AM

يا راجل دا انا فى مرة و قدام عينى كنت مستنى بتاع الكاوتش يخلص زبون علشان يلحملى الفردة

الفردة بتاعة الزبون كان فيها خرم صغير
وسع الخرم و دخل خبور و كشف لقاه الخرم بينفس
خرج الخابور و وسع الخرم و دخل خبورين و كشف لقاه الخرم بينفس
خرج الخبورين و وسع الخرم و دخل 3 خوابير و كشف لقاه الخرم بينفس
خرج ال3 خوابير و وسع الخرم و دخل 4 خوابير و كشف لقاه الخرم بينفس
خرج ال4 خوابير و وسع الخرم و دخل 5 خوابير و كشف لقاه الخرم بينفس

لحد ما الخرم اللى كان قد كدا بقى قااااااااااااااااااااااد كدا :) و بردو الخرم بينفس و الفردة باظت
و فعلا بيدخل الخوابير كلها مع بعض فى نفس الوقت طالما فى نفس الخرم
احلى اشتغالات

الرجاء قراءة مشاركتى فى الموضوع دا
http://www.nilemotors.net/Nile/32253...post3874674466

و عموما روح لواحد بتاع كاوتش نظيييييييف و هوا يقرر الفردة تنفع و لا ايه النظام