طب إنتوا قولولي أنا أعمل إيه، و اللي هتقولوه هيمشي

**SaimOnatoR** · 06-01-2013 04:44 PM

طبعا أنا شاكر لتفاعلكم مع الموضوع و أعتقد فعلا إن إقتراح السلسلة و العمودين هيكون مناسب جدا لأن الجراج محل و أنا مش عامله رصيف و هعمل العمودين من غير ما أجور على حق الشارع بإذن الله، طبعا أكيد عايزين تعرفوا أنا إتصرفت إزاي، مبدأيا أنا عرفت إن صاحب العربية راكن من الساعة 6 المغرب و أنا رجعت بيتي 11 مساءا و فضلت أدور عليه لحد 1:30 صباحا، و اليوم دة كان الجو سئ بشكل غير عادي و أنا كل شوية نازل طالع و في الأخر قررت إني أفضيله عجلتين مع إن ضميري كان بيأنبني بس قولت إنه لازم يتأدب عشان بعد كدة ياخد باله خصوصا إن العلامات واضحة و إنه كان راكن برعونة يعني ياريته محضن على الجراج لأ دة بالعربي رماها و طلع و بصراحة مقدرتش أتخيل كنت هعمل إيه لو كان راكن و عربيتي جوا، خصوصا إني إبني الصغير عنده حساسية في صدرة - و الحمد لله - و أحيان كتير بضطر أطلع بالعربية الفجر عشان أوديه المستشفى، المهم ركنت في الشارع و فضلت طول الليل شاغل بالي لأني مش متعود على موضوع إن العربية تبات في الشارع، تاني يوم صحيت الساعة 7 صباحا و فضلت مستنيه يظهر لحد الساعة 11 !! و بعد كدة كان لازم أنزل شغلي و عرفت الساعة 1:30 ظهرا إنه حرك العربية بعيد جدا من غير ما يفتح بقه و طبعا دة بعد ما زود العجلتين، يعني لو أنا كنت جوا الجراج كان هيحبسني من 6 المغرب لتاني يوم الساعة 1:30 يعني اقل من يوم بشوية.
أخيرا أنا مش مبسوط إني إضطريت إني أفضيله العجلتين و لو البلد كان فيها نظام كنت هكلم الشرطة ييجوا يشيلوا العربية و اللي أنا عملته كان الحل الوحيد وقتها لأاني كمان كان عندي أمل إني اشوفه لما ييجي و أعرف أديله كلمتين، تحياتي للجميع و شكرا جدا على النصايح الغالية اللي بإذن الله هعمل بيها.

**Mostafa.Ismail** · 06-01-2013 05:31 PM

طالما جراج خاص ومع وجود العلامات التحذيرية .... يبقى "رفع الاذى" هو الحل ... يعنى تجر عربيتة فى اى مكان تانى وكفاية علية الخضة لما يرجع وميلقبش عربيتة.

**D . a .\ AYMAN** · 07-01-2013 02:59 AM

كونك إنك قمت بإفراغ الهواء من عجلتين .. ده مش أذى ليه ولا حاجة ... ده عقاب ... وعقاب عادل جدا كمان ... وأقل من اللى يستحقه

لأن الإجراء القانوني الطبيعي في أي دولة فيها قانون يحترم زي مصر طبعا ... إنك تتصل بالنجدة تيجي وتجيب ونش مرور يرفع العربية دي وياخدها مخالفة على طول ... وأعتقد إن الحل ده فيه أذى أكبر لصاحب العربية

وعلى فكرة أنا مرة عملت الحل ده ... وبعد 3 ثلاث ساعات أو أربعة تقريبا واقف في الشارع أنا والمدام وأولادي مش عارف أخرج بسبب واحد قفل عليا بطريقة غريبة جدا وصف تاني ... إتصلت بالنجدة وطلبت ونش مرور .. وطبعا على ما ونش المرور وصل بعد حوالي ثلاث ساعات .. زيادة على الساعة اللى وقفتها قبل ما اتصل بيه ... يعني وقفت حوالي اربع ساعات بدور على صاحب العربية لغاية ما اتبهدلت أنا والأولاد

وفي الاخر لما الونش جه ورفع العربية والإكصدام بتاعه اتكسر من تحت -كانت شيفروليه كروز جديدة- قعد يعيط وعمل فيها عبيط وأصله كان قاعد في المحل بتاعه جنب العربية وما جتش نادتني ليه ... مع إني قلبت الشارع عليه وسألت كل المحلات اللى موجودة

...

الحل الطبيعي للجراج إنك تحط بوابة حديد بما لا يجور على الطريق العام .. لكن طبعا الشعب المصري كله هاييجي يركن قدام البوابة نفسها

عشان كدة الحل العملي للاسف هو الماسورتين والسلسلة .. باعتبار إن ده في جميع الأحوال جراج ومش من حق حد أصلا يركن في الحتة دي وانت كدة برضه لم تعتد على حق حد

**tutankhamoun** · 07-01-2013 05:49 AM

المشاركة الأصلية كتبت بواسطة d . A .\ ayman

كونك إنك قمت بإفراغ الهواء من عجلتين .. ده مش أذى ليه ولا حاجة ... ده عقاب ... وعقاب عادل جدا كمان ... وأقل من اللى يستحقه

لأن الإجراء القانوني الطبيعي في أي دولة فيها قانون يحترم زي مصر طبعا ... إنك تتصل بالنجدة تيجي وتجيب ونش مرور يرفع العربية دي وياخدها مخالفة على طول ... وأعتقد إن الحل ده فيه أذى أكبر لصاحب العربية

وعلى فكرة أنا مرة عملت الحل ده ... وبعد 3 ثلاث ساعات أو أربعة تقريبا واقف في الشارع أنا والمدام وأولادي مش عارف أخرج بسبب واحد قفل عليا بطريقة غريبة جدا وصف تاني ... إتصلت بالنجدة وطلبت ونش مرور .. وطبعا على ما ونش المرور وصل بعد حوالي ثلاث ساعات .. زيادة على الساعة اللى وقفتها قبل ما اتصل بيه ... يعني وقفت حوالي اربع ساعات بدور على صاحب العربية لغاية ما اتبهدلت أنا والأولاد

وفي الاخر لما الونش جه ورفع العربية والإكصدام بتاعه اتكسر من تحت -كانت شيفروليه كروز جديدة- قعد يعيط وعمل فيها عبيط وأصله كان قاعد في المحل بتاعه جنب العربية وما جتش نادتني ليه ... مع إني قلبت الشارع عليه وسألت كل المحلات اللى موجودة

...

الحل الطبيعي للجراج إنك تحط بوابة حديد بما لا يجور على الطريق العام .. لكن طبعا الشعب المصري كله هاييجي يركن قدام البوابة نفسها

عشان كدة الحل العملي للاسف هو الماسورتين والسلسلة .. باعتبار إن ده في جميع الأحوال جراج ومش من حق حد أصلا يركن في الحتة دي وانت كدة برضه لم تعتد على حق حد

مش عارف الناس ليه معتبرة أن تفسية الكاوتش آذى ........ و لما هو يقف أمام الجراج و يقفله يبقى مش آذى .

شكرا يا أستاذ أيمن .

**dr.hazem** · 07-01-2013 06:30 AM

المشاركة الأصلية كتبت بواسطة tutankhamoun

مش عارف الناس ليه معتبرة أن تفسية الكاوتش آذى ........ و لما هو يقف أمام الجراج و يقفله يبقى مش آذى .

شكرا يا أستاذ أيمن .

انا حصل معايا حاجة تانية....
واحد جه ركن جنبي ولزق عربيته جدا ناحية بابي...
انا حجما ولا يمكن اخش من الباب التاني وجيت ةنت مستعجل جدا وفوجئت بالوضع ده قعدت استنى ووالله مستعجل في الاخير حشرت نفسي بين العربيتين وقعدت افتح بابي واخبط بيه عربيته جامد لحد أما عرفت اركب وتمنيت لو صاحبها يكون موجود عشان اناوله اللي فيه النصيب....
انا بعدين زعلت ومن وقتها قلت ميصحش الغلط يتحل بغلط زيه... بغض النظر فيه اذى ولا لأ...
وللأسف انا اتقفل عليا صف تاني في رمضان قبل الفطار نزلت اجيب عيش وواحد قفل عليا ساعه الا ربع لما كنت هتجنن خلاص ومسكت نفسي وجه قلتله حرام عليك وبس ركبت ومشيت....
والحقيقة انا شايف التعدي على حق الطريق اهون من التعدي على حق الماشيين على الطريق....
تحياتي

Sent from my SE Arc S using Forum Runner

**mo7a_mo7a** · 07-01-2013 01:40 PM

تعمل عمودين وسلسلة حديد بقفل

**sherry215** · 09-01-2013 03:02 AM

انا حصلت معايا وكانت عربية مرسيدس قديمة واتوماتيك
بس من حسن حظي ان كان فيه محل بتاع مفاتيح عنده زي مفتاح ماستر وفتحنا العربية
ودخلناها الجراج وقفلنا عليها بعربية تانية
حاجة تحرق الدم فعلا
بس بلاش موضوع الطوب ده
ممكن عمودين حاجة تكون باينة