الموضوع: إيه الفرق بين مواتير التربو والمواتير العادية؟؟؟

المشاركة الأصلية كتبت بواسطة borio1704

النايتروس .. أو غاز أكسيد النيتروز N₂O.. بيسخدموه في العربيات علشان يزود كمية الأكسجين اللي بتتحرق جوه السلندر.

طبعا الغاز بيتخزن في أنابيب تحت ضغط ويبقى في شكل سائل .

النيتروس بيعمل حاجتين:

1- لما الدفعة النيتروس بتطلع من الأنبوبة.. السائل بيتحول إلى بخار.. وده بيبرد الجو المحيط بيه... وبالتالي كمية الهوا اللي داخلة بتبقى حجمها أصغر (لإنه الهوا بقى أبرد) وبالتالي السلندر يقدر يستوعب هوا أكتر وأكسجين أكتر..

2- الغاز ده بيتحلل مع الحرارة جوه السلندر إلى نيتروجين وأكسجين ، يعني بقى عندنا أكسجين أكتر كمان..



في جميع الأحوال.. وزي ما قلنا في الموضوع الأصلي.. الأكسجين الزيادة بيساعد على احتراق أحسن وبالتالي كمية الطاقة اللي بناخدها من السلندر بتزيد.

وعلى حسب المكتوب في ويكيبيديا.. الطاقة الزيادة اللي ممكن ناخدها من ضخ النيتروس ممكن توصل إلى حوالي 3000 حصان !!!!
Nitrous oxide engine - Wikipedia, the free encyclopedia


ده معناه إننا محتاجين تعديلات قوية على الأجزاء الداخلية للموتور علشان تستحمل الطاقة الزايدة دي.



...

تسلم ايدك

thnxxxxx

طيب، ليه الناس بتخاف من التيربو، اي حاجة ليها مميزات و عيوب، ف ايه يقى اهم عيوب التيربو؟ خاصة في مصر

موضوع رائع جدا

يعني حضرتك عشان اركب تيربو لعربية هيونداي فيرنا فيها موتور افانتي 1500 وغتيس فيرنا 1600 الالات جر امامي اعمل ايه ومحتاج اغير ايه بالظبط؟؟؟

المشاركة الأصلية كتبت بواسطة borio1704

كتير مننا سمع قبل كده عن التربو... وإن مواتير التربو قوية وحاجات زي كده


طيب هو إيه الفرق بين مواتير التربو والمواتير العادية؟؟؟


موتور التربو ما يفرقش كتير عن الموتور العادي... كل الموضوع إن موتور التربو متركب عليه تربو :)




بس التربو ده بيعمل إيه؟؟؟ وبيشتغل إزاي؟؟؟


التربو Turbo عبارة عن مروحة قوية (توربينة Turbine) مهمتها إنها تزود كمية الهوا اللي داخل على السلندر عشان يزود قوة الحرق داخل السلندر

إزاي؟؟؟ هو مش لو زودنا الهوا الحرق ممكن يقل؟؟؟

لأ.... كل ما كان الهوا أكتر بنقدر ناخد حرق أفضل للبنزين


الموضوع عامل زي الفرق بين الفحم لما تولعه... بيبقى كده



وبعدين لما تهوي عليه أو تشغل قدامه مروحة هيولع جامد ويشعلل.. زي كده





وعشان نفهم أكتر... خلينا نشوف الأول هو الموتور العادي الهوا بيدخله إزاي؟؟؟



ده شكل الموتور العادي




فيه حاجة إسمها Intake Manifold أو مانيفولد السحب وده اللي بياخد الهوا من الفلتر ويوزعه على السلندرات


طيب هو بيسحب الهوا إزاي؟؟

متهيألي إننا محتاجين بردو ناخد فكرة سريعة عن دورة الاحتراق



ده شكل دورة الاحتراق للموتور



اللي يهمنا هو اللي بيحصل في المرحلة رقم 1 ورقم 4


• في المرحلة رقم 1 السلندر بينزل لتحت ويسحب معاه الهوا.. بنفس فكرة السرنجة لما بتشفط الدوا

كدا الهوا دخل السلندر وبعدين عملية الحرق بتتم .. ومش هندخل في تفاصيلها لإن ده مش موضوعنا دلوقتي.

• في المرحلة رقم 4 السلندر بيطلع لفوق ويطرد العادم من فتحة تانية اللي بتودي على الشكمان




طيب ... أمال إيه حكاية التربو؟؟؟

زي ما قلنا التربو هو عبارة عن مروحة.... بس الفكرة العبقرية هنا بقى إني استخدم العادم في تشغيل المروحة..


إزاي؟؟؟


بص على الصورة كده



التربو عبارة عن مروحة مزدوجة على عمود واحد... واحدة متوصلة على العادم والتانية متوصلة على هوا السحب..

ولما تدوس بنزين العادم بيطلع بكمية كبيرة ويبدأ يحرك المروحة... اللي هي كمان بتحرك المروحة التانية اللي على السحب وتدخل هوا زيادة .. أو بمعنى أصح "تضغط الهواء"..



التربو عشان يشتغل كويس لازم الهوا اللي داخل في السحب يكون بارد نسبيا، إنما اللي بيحصل إن الهوا بيبقى سخن جدا ويمكن يوصل لحد 150 درجة مئوية بسبب حاجتين:

* ضغط الهواء بيرفع درجة حرارة الهوا..

* لما الموتور بيسخن العادم السخن بيسخن التربو جدا لدرجة إنه يوصل لدرجة الاحمرار... وطبعا الهوا هيسخن هو كمان..

بص على الصور دي



والهوا لما يسخن بيبقى متمدد جدا .. يعني كمية الأكسجين اللي هتحرق البنزين هتبقى قليلة، وكده يبقى التربو مالوش لازمة، لإن الهوا اللي داخل مافيهوش هوا !!!


طيب إيه الحل عشان نبرده؟؟؟

الحل في تركيب سربنتينة يدخل فيها هوا السحب ويبرد فيها قبل ما يدخل السلندر.. السربنتينة دي بيسموها "مبادل حراري" أو Heat Exchanger وبيقولوا عليها في دنيا التربو Intercooler




عشان كده تلاقي العربيات اللي فيها تربو بيكون فيه فتحة في الكبوت... عشان المبادل الحراري يبرد

زي كده






طبعا الفتحات دي ممكن أي حد يعملها في العربية .. حتى لو مجرد منظر مش بجد

طيب... إزاي أعرف إن الموتور ده فيه تربو بجد؟؟


الموتور التربو حتلاقيله صفارة مميزة بتزيد مع زيادة دوران الموتور... وغالبا حتلاقيها متأخرة سنه صغيرة عن الموتور... وده اللي بيسموه تأخير التربو أو Turbo Lag




طيب فيه حاجة مهمة جدا..

تركيب التربو لازم يبقى معاه تعديلات تانية على كل أجزاء الموتور اللي بتواجه الضغط والطاقة الزايدة في السلندر.. زي :

البساتم (Pistons)
الشنابر (Piston Rings)
البييلاّت (Connecting Rods)
السبايك (Bearings)
جوانات وش السلندر والفرن والسحب (Gaskets)
مانيفولد السحب (Intake Manifold)
وش السلندر (Cylinder Head)

وأحيانا كمان ممكن يكون فيه تعديلات على البلوك


وفي أغلب الأحوال.. علشان التربو يشتغل صح بدون مشاكل .. لازم الطاقة الزايدة اللي هتطلع من التربو يكون معمول حسابها في تصميم الموتور



أخر حاجة...


زي ما شرحنا قبل ... الهوا الأكتر معناه حرق أفضل وأسرع... ومعناه بردو استهلاك بنزين أعلى لو قارناه بموتور عادي له نفس السعة اللترية...

بس الميزة الأساسية من التربو هي إننا نقدر ناخد قدرة أعلى من مواتير أصغر... أو نقدر نعمل تعديل على الموتور الأصلي وناخد منه قدرة أعلى، وبكفاءة استهلاك وقود أفضل بدون شك.

في الحالة دي لما نيجي نقارن ... هنقارن الموتور أبو 1600 سي سي وفيه تربو مع موتور عادي 2700 سي سي ... لإنهم بيطلعوا تقريبا نفس القدرة الحصانية، وساعتها هتلاقي موتور الـ1600 سي سي مع تربو بيستهلك بنزين أقل من موتور الـ2700 سي سي



...