الموضوع: بعرف أسوق بس مبعرفش أسوق!

الراجل لسة رجله مش واخدة على البدالات ! ، وجوة البلد نفسها بيسوق ببطء وبالراحة
هيطلع ع الطريق دلوقتى يعمل ايه
وجهتين النظر بتوع السفر صح ، بس الفكرة هى امتى يطلع على الطريق مش اكتر

لازم ياخد وقته في السواقة جوة البلد ، ولما يحس انه خلاص بقى كويس (جوة البلد ) ، يبدأ يطلع على الطريق ( وفعلا اول طلعة على الطريق بتبقى نقطة تحول بتقطع شوط كبير في تخطى مرحلة المبتدئ مفيش كلام ) بس لازم يكون في حد معاه ، على الاقل خالص في اول مشوار ويكون طريق هادى الى حد ما

بعد كدة كل حاجة هتيجى لوحدها ، اهم حاجة في السواقة ، الصبر و ان الواحد يسوق في ظروف (وقت وسرعة وطريق) اللى يقدر فيه يسيطر على العربية ، ويبدأ يزود الظروف دى بالتدريج وبحذر وياخد وقته في كل مرحلة لحد ما يتقنها ( الصبر) لحد اتمام مرحلة التعلم بنجاح

ده اللى عايز يتعلم صح ، لو قعد سنتين جوة البلد مش هيتعلم ولو طلع على الطريق من اول اسبوع بيعرض حياته وحياة الغير للخطر ، وغلطة اللى لسة بيتعلم بتبقى جامدة ( يعنى ممكن مثلا من اللخمة يخبط في حاجة من غير ما يدوس فرامل خالص )

وياريت ماننساش ان امتحان السواقة نفسه بيبقى والعربية شبه واقفة وفي مكان ضيق جدا ، يعنى السواقة بالراحة في مكان ضيق اصعب من سواقة الطرق اللى بس محتاجة ممارسة وخبرة، كل مشكلة الطرق السريعة انها عايزة تركيز اكتر وخبرات اكتر والغلطة فيها بفورة


ربنا يسترها على الجميع :)

اكيد يعني لما واحد بيسوق جديد على الطرق السريعة مش هقوله روح سوق في طريق اسيوط الزراعي ولا اسكندرية الزراعي
يعني يكون معاه حد خبرة في السواقة ومشوار اسكندرية مثلا او الاسماعيلية او العين السخنة او حتى اكتوبر يعني طرق كويسة مش عليها نقل كتير قوي وحتى لو عليها الطريق كويس وعليه رادارات فالسرعة هتبقى مقننه شوية

وبعدين يمشي في النص وبراحته ..... وزي ما قلت لازم حد خبرة معاك وتكون اعصابه هادية
وطبعا تكون السواقة بالنهار ...

انا اول ما تعلمت اتعلمت على الطرق السريعة بس كان بيكون في حد معايا
بعد كده جوه البلد بقى سهل جدا ..... هي بس شوية رهبه في الاول

طبعا جوه البلد بيختلف من السواقة في الهرم عن السواقة في العمرانية او بولاق او فيصل مثلا

المناطق دي حتى لو بقالك عشر سنين بتسوق بردو هتبقى صعبة عليك

وربنا يحمينا من شر الحوادث

هو الموضوع مالوش علاقة اوى بسرعة الغيار، انا ممكن انقل بدري شوية او احرق ، وبرضه العربية ما تنتشش منى

الفكرة ان يبقى في سيمترية في حركة الرجل اليمين مع الشمال ، يعنى مع التعود هتلاقى رجلك الشمال بترفع من على الدبرياج في نفس الوقت اللى رجلك اليمين بتدوس بنزين ، وبنفس النسبة والسرعة ( سرعة الضغط ع البنزين والرفع من ع الدبرياج تتناسب مع الار بي ام يعنى كل ما كنت بتحرق كل ما لازم ترفع رجلك وتدوس في نفس الوقت بسرعة وكل ما كنت بتنقل بدري كل ما لازم تعمل كدة ببطء )


وده اللى يخلى سواقتك ناعمة
لو نقلت لغيار اعلى وماعملتش كدة العربية تنط اوتسقف
ولو نقلت لنقلة اقل او شلت رجلك من ع البنزين بدون ما توازن مع دواسة الدبرياج صح هتلاقى العربية هتنتش لورا او هتكلبش في الارض ( تسقيط النقلة للفرملة )

او تجري جامد ( تسقيط نقلة للشد ) لو دست بنزين جامد قبل ما ترفع رجلك من الدبرياج

اول حاجه سيبك من الناس و انت سايق .. و اوعي حد يوترك ... مهما داس كلكس او زعق
خليك هادي ... عشان لو فقد تركيزك هتغلط
انا كنت زيك كده من 4 شهور بالضبط ... كنت لسه جايب العربيه جديد... و مش بعرف اسوق اوي
و بارضو كنت بتلغبط في الغيارات ...و بمشي بطيي
دلوقتي لو شفتني مش هتصدق ... اصحابي بقوا بيخافوا يركبوا معايا :)))))

فى الاول وفى الاخر السواقه ممارسه وتعود
وبعد كده هتلاقى نفسك بتسوق تريلا مش عربيه بكل سلاسه
بس أصبر فى الاول ومتتسرعش