غلطان وبعترف بس الناس جرالها ايه !!

**Moe Ahmad** · 30-01-2013 10:11 AM

اولا يا باشا انت غلطان و انت معترف بكده فالاولى انك تصلح غلطتك لانك مش هتعرف تخلى الناس كلها متغلطش و اعمل حساب اللى بيعدى الشارع و جنبة نفق او كوبرى بس مش بيقدر يطلع سلالم و ان الناس الكبيرة بيعتمدو على ان اللى سايق هيقف علشان يعدو و ملهمش دعوة باى حاجة و ده زوق منك مش اكتر انك تعديهم و انا حصل معايا مرتين اكون نازل من كوبرى والعربية واخده سرعتها و الاقى راجل كبير مش قادر يمشى و بيعدى يعنى حركتة بطيئة جدا و مش بيقف علشان تعدى لا بيفضل ماشى ومش بيخليك عارف تاخد انه حارة وفى الاخر كلنا ماشين بستر ربنا

**ahmedhilmy** · 30-01-2013 10:35 AM

النا س اللي بيعدوا الشارع هما اللي بيبلطجوا علي اللي سايقين العربيات يا راجل اتقي الله في صحتك و مالك و راعي اللي ماشي علي رجله ده في قاعده مروريه عالميه بتقولك المشاه اولا

**Nistelrooy** · 30-01-2013 10:41 AM

بحترم الناس الي بتعدي وتسرع وهي بتعدي الشارع او تمد

وبكره اوي الي بيشمي بتناكة في وسط الشارع وزي ما يكون قاصد ده لو ماشي عادي مش هيمشي بالبطء ده !
خصوصا لو واحدة بنت وغالبا بتكون فاكرة نفسة حلوة وهي مش كدا خالص :)

**friendship7897** · 30-01-2013 10:42 AM

كويس إنك معترف إنك مدمن (سرعة)
يعنى أنت اللي غلط .
والسرعة لها أماكنها ووقتها
والحمد لله ربنا ستر عليك وعلى الناس اللي عدو وعلى الست الكبيرة
وأكيد الموقف دا هيحد من إدمانك كتير
ربنا يشفينا ويهدينا جميعاً

**kar!m** · 30-01-2013 10:52 AM

الموضوع بايظ من أوله لاخره .. مفيش سرعات مكتوبه في الشوارع .. و معظم اللي سايق مش عارف السرعه جوه المدن كام.

ده غير الفساد في عملية استخراج رخص القيادة .. خلت اللي معاه رخصه ميعرفش أساسيات القيادة السليمة.

كمان مفيش قانون رادع .. عشان كده الناس بتخالف و محدش بيتجازى.

غير ان لا زال في ناس فوق القانون و بالتالي مفيش مصداقية ولا التزام.

يعني الدنيا كلها بايظة.

**ahmdmagdy** · 30-01-2013 11:49 AM

بص يا باشا انت عملت اللي عليك بس برضه حتي لو اللي بيعدوا غلطانين لازم تاخد بالك لأن دول ناس و لو قدر الله حصل حاجه و خبط واحد منهم هتقع في مشاكل انت في غني عنها

**no2nn** · 30-01-2013 12:01 PM

الله اكبر الله اكبر ايه يا جماعه ده اكتب الموضوع بالليل اجي الصبح الاقي 24 رد
يا حلاوه يا ولااااااااااااااااااااااا اااااااااااااااد
دا انا هارد عليكو واحد واحد ^^

**no2nn** · 30-01-2013 12:11 PM

المشاركة الأصلية كتبت بواسطة pegpus

مع كل احترامى لحضرتك
السرعه لها اماكن و طرق و حدود وأوقات وبعد نظر انا قاربت على 50 سنه ولازلت مدمن سرعه حتى الأن ولكنى من خلال خبرتى أتحدث

وعليكم السلام يا استاذ pegpus
اولا يشرفني جدا ان حضرتك تكون منور الموضوع ويشرفني اكتر اني اخد نصيحه من حضرتك
وان شاء الله سيتم العمل بها
تقبل تحياتي

المشاركة الأصلية كتبت بواسطة MohammedAladel

كويس إنك معترف بإن الغلط غلطك برضه والمشكلة مشكلتك وحلها أنك تمشى على مهلك فى المدينة وبلاش تهور وبعدين
مش أى عربية تستحمل الجرى مش السيراتو اللى تجرى بيها عشان مش هتعرف توقفها وكمان مش معاك abs

وعليكم السلام استاذ محمد
نورت الموضوع
وحاااااااااااااااااااااضر هاقلل من التهور بس ادعيلي انت دعوه كده عن ظهر قلب ^_^
وتقبل تحياتي

المشاركة الأصلية كتبت بواسطة Khaled Online

لما اللي سايقين يلتزموا بتعليمات وآداب المرور، نبقى نستفسر عن المشاة اللي معندهمش راجل مرور يعديهم ولا أماكن عبور طريق واضحة، والحمدلله إنك ماوقفتش عشان انت غلطان والناس مش مستحملة والله أعلم كان ممكن يحصل إيه. احمد ربنا وبلاش اللي بتعمله ده

وعليكم السلام استاذ خالد
منور الموضوع
احب بس ارد ع نقطه بسيطه من ردك
احب بس اوضح لحضرتك ان مفيش اي علامات مروريه في شارع الهرم ( 3|4 شوارع القاهره )
مفيش اي حاجه تنبه ايه تنبيه للي سايق لدرجه ان في مطب في منطقه سهل الجري فيها عن الشبراوي ومطب رخم جدااا ومفيش علامه عندو تعرف اللي سايق ان في مطب هنا يا بني ادمين ياللي بتسوقوا !!
ومظنش ان اي حد من الناس اللي عارفه شارع الهرم ملبسش في المطب ده
وف الاخر شرفتني مناقشتي مع حضرتك
وتقبل تحياتي

المشاركة الأصلية كتبت بواسطة ahsd2000

انت الغلطان . اللي ماشي في الشارع ممكن يكون سلوكه خطاء وبيعدي بطريقه غلط بس مسئوليتي اني اركز واتوقع الحاجات دي واتفاداه حفاظا على سلامته وسلامتى . محدش هيعذرك ابدا لو لخبطت حد حتى لو كنت مش غلطان 1000% .

استاذ ash2000
منور الموضوع ^^
كلامك مظبوط 100%100
وادعيلي
وتقبل تحياتي

المشاركة الأصلية كتبت بواسطة rockana9112007

انا ملاحظ حاجة فى كلامك ,,,,,,,انك مدى لنفسك العذر انك تقفل العداد ..........اصل حضرتك مدمن سرعة

ومش مدى اى عذر للناس اللى ماشية على رجليها ...............

انا عاوز احكيلك حاجة حصلتلى ومن بعديها حرمت اجرى فى مناطق سكنية

انا مرة برضة كنت ماشى بسرعة فى شارع الهرم وكنت رايح على الجيزة لقيت واحد ست كبيرة ولابسة اسود فى اسود فجأة بتعدى الطريق قلبت نور وكلاكسات لاقيتها اتسمرت فى نص الشارع قصادى .......بصراحة انا فاديتها بالعافية .....بس كنت متغاظ منها جدااااااااا وقفت جمبها عشان اديها كلمتين فى جنابها

ولما وقفت وبصتلها انا تنحت وجسمى كلة قشعر

تخيل انى لاقيتها لابسة نظارة كعب كوباية معمولة من يجى 30 سنة ..... الست دى طلع نظرها ضعيف جداااا جدااا ويادوب شايفا متر قصادها

تخيل انا لو كنت خبط الست دى ...انا مكنتش هسامح نفسى ابداااا ....نظريا هيا اللى غلطانة .بتعدى الشارع من وسط الطريق بدون ماتاخد بالها .........بس فعلاااا انا اكتشفت انى لازم اعذر الناس واعمل ليهم حساب

انا والدتى نظرها ضعيف كان ممكن تكون مكان الست دى

وخلى بالك ربنا مابيسبش

استاذ rockana
منور الموضوع يا كبير
شاكر جدا لحضرتك على النصيحه
وانت خوفتني اوي من اخر جمله دي ^_^
تقبل تحياتي

المشاركة الأصلية كتبت بواسطة aldesha989

خلى بالك بس السرعه مش حلوه على طول ولازم تكون مركز فى الطريق اوى

انا مره عندنا على البحر فى اسكندريه راجع من المعموره ونازل عند ميامى كده ولقيت تلات عربيات واقفين على البحر انا قول لسه هقف واحنا على البحر اطلع فكيك واخد منهم الغرزه واخلع لسه بخلع لقيت كميه بشر لا تعد بتعدى وواحده بتشتمنى مع انى ما كنتش بجرى روحت واقف جنبيهم بقينا اربع عربيات هههههههههههههههه

وكأننا بنحميهم علشان يعدو الطريق

اصلآ فى حاجه اسمها انفاق وفى حاجه اسمها اشارات بس الناس ماعندهاش مشكلة مش بتفرق معاهم

وبرضه من شهر 9 اللى فات كنت نازل انا وقريبى وصحابه بعربية واحد صاحبهم المهم
ماشين على البحر ولقينا اسعاف وزحمه وعربية عريس وعروسه واقفه والعروسه قاعده جوا وقفنا شمال بعد الاسعاف بحاجه بسيطه ونزلنا نساعد

لقينا راجل واتنين ستات فى عربيه الاسعاف
ايه اللى حصل ؟
كانو بيعدو الطريق مع ان اقسم بالله العظيم النفق قصادهم او بينه وبينهم عشره متر
ايه بقى اللى يعديهم على البحر واحنا عندنا طريق البحر عامل زى الطرق السريعه ؟ وفى انفاق ؟
ليه يعملو كده لا قدر الله حد مات ؟
ليه حد يموت وليه حد يدخل السجن وليه حد يتحرق دمه ونفسيته تتعب ؟
انا زعلت اقسم بالله على العريس والعروسه ليلة دخلتهم مش هتتنسى طول الحياه ده يقولها انتى فقر ودى تقوله وش امك نحس ههههههههههههههههههههههههه ههه

ربنا يهدينا بقى احنا بقينا صعاب مع بعض والله ومع نفسنا كمان

استاذ aldesha
منور الموضوع يا باشا
وزدتني خبره بالموقفين بتوعك
وربنا ستر اكيد ع العريس والعروسه دول

تقبل تحياتي

المشاركة الأصلية كتبت بواسطة bassemali

شارع الهرم ده ماينفعش تمشي فيه أكتر من 60 حد أقصى .. لأن عبور المشاه فيه كتير وانت بتقول أنك عمال تكلكس وتقلب نور وده عمل إرتباك للمشاه ... ولازم تعرف ان اللي مابيعرفش يسوق لما بيجي يعدي الشارع مابيبقاش عارف المسافه اللي بينه وبين العربيه اللي جايه كافيه ولا ممكن تعملك أزمه أصلا .

استاذ bassemali
منور الموضوع
وشاكر جدا ع النصيحه ^_^
تقبل تحياتي

**dr.hazem** · 30-01-2013 12:21 PM

المشاركة الأصلية كتبت بواسطة no2nn

يا جدعان انا عندي مشكله واظن ان كتير عندو نفس المشكله بس عندي بزياده
من تلت ساعه كنت واخد العربيه وبملاها بنزين في شارع الهرم من اول بنزينه شل وانت جاي من نفف الجيزه بعد ونبي كده مليت البنزين واخدت اول يوتيرن بعد البنزينه .. يوتيرن قدام التوحيد والنور كده وراجع ع البيت والمشكله اني مسرع بالعربيه والمشكله دي وصلت بيا اني اقفل عداد السرعه عشان ميرخمش عليا بصوتو لو عديت ال 120 المهم ماشي ع الشمال طبعا وبقلب نور للي قدامي اللي واخد حارتين ( اللي جنب الرصيف والحاره اللي جنبها ) اموت واعرف الناس دي بتستفيد ايه لما بتمشي ما بين حارتين !!!

المهم بعد عناء الباشا وسعلي عشان اعدي وبرمي عيني بعيد لقيت ناس عايزه تعدي ناس كتير قلبتلهم نووور وضربت كلاكس جااااامده ومجهز رجلي ع الفرامل لو حصل حاجه طبعا كل ده وايدي لسا ع الكلاكس وابص الاقي كل الناس بتعدي !!!!!!!

امال انا بضربلكو كلاكس وبقلب نور ليييييييييييييييييييييييي ييييييييييييييه !!!!!!!!!!!!!!!!!!!!!!!!!
الحمد لله كلهم عدو بسلام وابص الاقيلك ست عجوزه وقفت قدام العربيه وانا سرعتي تقريبا كانت 80 او 90 مش متاكد لان العداد مقفول زي ما قول
طبعا ضربت فرامل بس مش جامد اوووي عشان العربيه متزحفش عشان مفيش abs
وقمت واخد غرزه بينها وبين الناس اللي عدو الحاره اللي انا فيها مكانوش حتى عدو كل الشارع
وكان بيني وبينها بالظبط عقله صباع !!!!!!
انا مختدش بالي منها اصلا
انا عيني كانت ع المرايه اليمين وفجاه لقيتها قدامي والحمد لله الذي لطف وقدر اني مطيرش الست دي
والمووضوع كلو مخدش غير ثانيه ونص او اقل !!!!!
اول ما اخدت الغرزه لقيت رجلي ع البنزين ومش عايزه تترفع ومرضتش اقف لاني لو وقفت بصراحه معرفش كان ممكن اعمل ايه !!!
الناس بقت غربيه اوي
الناس بقت تبلطج ع الناس اللي سايقه العربيات
المفروض الناس تعدي لما ميكونش في عربيات مش ينقو العربيات ويعدو قدامها !!
انا عارف والله اني غلطان وده مش بمزاجي اانا مدمن سرعه !!
دلوقتي كل اللي انا طالبه من حضراتك كاخوه ليا انكو توضحولي الناس ليه بتنقي العربيات اللي ماشيه ع الشمال وتعدي قدامها
وياريت لو حد حصلو موقف مشابه يحكيه عشان محسش اني لوحدي عشان الست دي قفلتني بعد اللي حصل ده !!
وربنا يستر علينا وعليكم
والسلام ختام

العربيه ( كيا سيراتو 2008 )

اعطي الطريق حقه...
أولوية المرور في الطريق للمشاه...
حريتك تتوقف عندما تبدأ حرية الآخرين فلو انت مدمن سرعه ده ميديلكش الحق انك تمشي بسرعات كده وسط المدينة...
اوعى تستهين بالعناصر الموجودة معاك عالطريق وتسرع وتتعذر بانك مدمن سرعه لان السرعه ضررها متعدي وبتضر ناس أبرياء على الخط....
الله يرضى عليك خد بالك وبلاش الكلام ده...
تحياتي

Sent from my SE Arc S using Forum Runner

الموضوع: غلطان وبعترف بس الناس جرالها ايه !!

LinkBack

أدوات الموضوع

عرض

-

-

-

-

-

-

المواضيع المتشابهه

يا ريت لو غلطان أعرف غلطان فى ايه؟؟؟

شفتوا الناس جرالها ايه؟

كل الناس بتكرهنى ......وانا مش غلطان......

هي الناس جرالها إيه

الناس جرالها ايه فى رمضان

الكلمات الدلالية لهذا الموضوع

المفضلات

المفضلات

ضوابط المشاركة