أنا قريت كلامكو كله وهقولكو أنا على الوصفه السحريه للسعاده الزوجيه.
فيه هنا مشكلتين. أولهم انها اسمها الحياه الزوجيه وكل واحد نفسه يعيش يوم من العزوبيه.
المشكله التانيه ان الخلافات بتبقى دايما على الخروج.
طيب هقولكو أنا عملت ايه واللي عملته ده فرق معايا كتير. الفكره يا جماعه ان الخروج نفسه يبقى روتين فمتحسوش بفايدته يعني انتو بتخرجو كل خميس او جمعه أو سبت وده مقرر اسبوعي فبقى زيه زي الشغل بالظبط. الدراسه هتيجي أهي خلو عيالكو في المدرسه في يوم وأنا عن نفسي بفضل الحد دايما عشان أول يوم في الاسبوع وكل الناس بتبقى في شغلها والدنيا رايقه في المولات وخدو اجازه انتو الاتنين من شغلكو واخرجو مع بعض بالنهار من غير العيال. الخروج بالنهار بيجيب السعاده لكن الخروج بالليل بيبقى للهدوء. وانتو محتاجين شويه فرفشه. أنا بحب أروح مول العرب بالنهار وخصوصا ان اليومين دول الجو حلو بالنهار مهوش حر. وأحلى حاجه في مول العرب انه فيه مكان مفتوح منه للسما وكافيهات محترمه تقعد فيها تتشمس وترغي وانت مبسوط. لو المكان بعيد عليكو شوفو مكان بديل قريب منكو بس المهم يكون مفتوح مش مول كله حيطان زيه زي البيت. أحنا بنخرج الساعه 11 مثلا ونرجع البيت على الساعه 2 والبنت بتيجي من الحضانه الساعه 3.
نيجي بقى للخطوه التانيه انكو متجيبوش سيره البيت ولا العيال وتتكلمو زي أيام الخطوبه كأنكو لسه بتتعرفو على بعض. أنا بقعد أحكي لمراتي مواقف هيه محضرتهاش زي مواقف أيام الجامعه أو المدرسه الخ الخ وهيه برضه تحكيلي عن صاحباتها واخواتها المهم تتكلمو في أي حاجه ملهاش علاقه بأنكو زوج وزوجه وبينكو بيت وعيال والحاجات دي. الموضوع ده ممكن تعملوه مره كل شهر هيفرق معاكو كتير.
ياريت أسمع رأيكو في الفكره دي وجربوها كده وقولولي انطباعكو ايه.
المفضلات