رجاء كل واحد ياخد باله و هو بيشتري نيو صني من اي معرض

**takakan2005** · 20-02-2013 03:21 AM

أنا أشتريت العربية دى ولما جيت أستلمها فى إسكندرية من المتحدة اللى فى الداون تاون فتشتها من أولها لأخرها وجربت كل حاجة وكانت من غير أى خدش وعاملة 38 كيلو وإتنقلت على تريلا من القاهرة للأسكندرية والحقيقة تسليمهم ممتاز لكن طبعآ دفعت زيادة عن السعر الأساسى المتفق عليه - كاش - 2000 جم زيادة - لكن السعر بالزيادة أتكتب فى الفاتورة والغريبة إن الزيادة دى أتحسبت فى نسبة ضريبة المبيعات - اللى بتروح للدولة - وبعدها عرفت إن الزيادة دى ناس إتحاسبوا عليها وناس لأ ؟؟!!!

وكمان الزيادة دى كانت عن عربية حاجزها من 3 شهور - يعنى كان لسه الدولار ما غليش ومكوناتها حسب الأسعار القديمة وكمان فيها نسبة 40 % مصرى - يعنى بحساب سعر الدولار القديم أو بمعنى أصح بالجنيه المصرى قبل ما نقصت قيمته -

والخلاصة فى الموضوع إن التجار مش ملايكة ولما بيكون عندهم أى فرصة للمكسب مابيرحموش وده عمومآ حال البلد - فوضى - لأن مافيش أى نوع من المحاسبة أو المسائلة لأى شخص !!!

**youssef_u** · 20-02-2013 03:29 AM

الف مبروك يا باشا ربنا يباركلك فيها و يرزق خيرها و يكفيك شر العين ،،، احسن حاجة انك فتشتها من اولها لاخرها و هنا فعلا التاجر لو هيدفع جنيه زياده يدفع المشتري ١٠ ،،،، ربنا يرحمنا من جشعهم

**youssef_u** · 20-02-2013 03:48 AM

المشاركة الأصلية كتبت بواسطة timtim

- بالنسبة للتراب اللي على العربية.. اللي اعرفه انهم بيدهنوا العربيات شحم ويتربوها علشان يحافظوا على البوية بتاعتها من الخرابيش !!
- وبالنسبة للبتاعة اللي بتتجر منها العربية ... ممكن يكونوا استعملوها وعلشان ينقلوا العربية على الونش .. مش بيمشوا بيها..
- وبالنسبة للسقف هو اصلا السقف بتاع الصني دي في سوكة زي اللي بتبقى في الكبوت يعني مش كله مستوى واحد...
والله أعلم..
وفعلا بنشوف عربيات كتير عند بتوع السمكرة والدوكو من غير نمر وباللزق الابيض..

حكاية الشحم دي انا بشوف العربيات خارجة من المصنع كل يوم و بتلمع و معليهاش نقطة تراب

**أبو_يوسف** · 20-02-2013 08:18 AM

مانا مش قصدي المصنع هو اللي بيشحمها انما التجار والموزعون اللي بيوقفوها في مخازن .. وهما تقريبا مش بيتعمدوا يتربوها.. بس انت عارف العربية لما بيكون عليها تراب وتيجي تتمسح بتجرح البوية وبتعمل دواير.. هما بقى بيشحموها وطبعا من الركنة في المخازن بيجي عليها تراب بيسبوه لحد لحظة التسليم بتتعمل بالمياة وتتمسح والشحم دا بيمنع تجريح البوية..

**Nashaat Rady** · 20-02-2013 09:03 AM

الي كل غشاش: يجيـــــلك و يحــــط عليك يا رب، هو إحنا ناقصين، مش كفاية بندفع الطاق طاقين في العربيات ده.

**samasuper** · 16-03-2013 11:40 PM

السلام عليكم ورحمه الله وبركاته
يوم الاربعاء الماضى كنت راجع من الشغل وبعدى من جنب المطار الطريق اللى هو بيودى لموقف العاشر
وبعدين كان فى اختناق فى الطريق قبل كوبرى الحرفيين وده مش طبيعى الا اذا كان فى سبب
المهم شفت عربيه كبيره نسبيا ماشيه بسرعه قليله جدا حوالى 30 كم / ساعه قلت ابص عليها يمكن فيها مشكله وجدت العربيه سليمه ببص قدامها لقيت عربيه نيسان لسه معلقش نمر زيرو باللزق اللى بيبقى موجود عليها من ماشيه بتتطوح
طلع العيب ان العربيه مخبوطه من عند الكاوتشه اللى قدام السائق الخابطه تقريبا لوحت المقص بشكل مخلى الكاوتشه بترف بشكل مخيف وده مخلى السواق يسوق بسرعه قليله والعربيه اللى وراه عشان لو حصل حاجه
كنت عاوز اصوره بس ملحقتش لانى سرعتى فى المكان ده كانت 90 كم تقريبا

**youssef_u** · 16-03-2013 11:52 PM

المشاركة الأصلية كتبت بواسطة samasuper

السلام عليكم ورحمه الله وبركاته
يوم الاربعاء الماضى كنت راجع من الشغل وبعدى من جنب المطار الطريق اللى هو بيودى لموقف العاشر
وبعدين كان فى اختناق فى الطريق قبل كوبرى الحرفيين وده مش طبيعى الا اذا كان فى سبب
المهم شفت عربيه كبيره نسبيا ماشيه بسرعه قليله جدا حوالى 30 كم / ساعه قلت ابص عليها يمكن فيها مشكله وجدت العربيه سليمه ببص قدامها لقيت عربيه نيسان لسه معلقش نمر زيرو باللزق اللى بيبقى موجود عليها من ماشيه بتتطوح
طلع العيب ان العربيه مخبوطه من عند الكاوتشه اللى قدام السائق الخابطه تقريبا لوحت المقص بشكل مخلى الكاوتشه بترف بشكل مخيف وده مخلى السواق يسوق بسرعه قليله والعربيه اللى وراه عشان لو حصل حاجه
كنت عاوز اصوره بس ملحقتش لانى سرعتى فى المكان ده كانت 90 كم تقريبا

العربية دي اكيد تابع معرض و هتتصلح و تتباع بنفس تمن الزيرو ،،، حسبي الله ونعم الوكيل

و شكرا على نقل الخبر