الموضوع: حد يساعدنى اشترى جرو جيرمن شيبرد

المشاركة الأصلية كتبت بواسطة amr axel

لا حول و لا قوة الا بالله
مهو للأسف فيه ناس كتيير مش فاهمين و بيهببوا الدنيا و تلاقي الكلب طلع جبان و يفضل يقول ليه ده انا بشرسه مش فاهمين ده التشريس ده تدريب معين و الحراسة تدريب و مش كل الحراسة واحد كمان حراسة الاماكن ليها تدريب و حراسة البيوت تدريب و الحراسة الشخصية تدريب
و للأسف فيه شئ اسوء من ده اني بلاقي ناس تجيب كلاب عشان يدخلوا بيها خناقات زي خناق الديوك و اوقات كتيير كلاب بتروح فيها :(

فعلا موضوع الخناقات دى كارثة كبيرة والوقت من معايير الشراء يقولك الكلب 5 دقايق ويموت الكلب اللى قدامة والمشكلة انة بيبهدل الكلب اللى معاة يعنى انا مرة شوفت كلب كان تحفة بسم الله ماشاء الله علية تقليب رائع بس ودانة نايمة فبسال لية قالوا عصب ودانة اتكسر تقريبا بسبب الخناقات حرام والله
والمشكلة بردة ان الناس بتستعجل فى التدريبات يعنى تلاقى الجرو عندة 4 شهور وبيدربوا شراسة متسيب الجرو يعيش سنة وفى ناس كمان بتبدا الشراسة قبل الطاعة ودى فعلا كارثة بجد لانة هيبقى عامل زى العربية اللى مفيهاش فرامل ولو نزل الشارع بية هيبقى قنبلة موقوتة
والله اعلى واعلم فيما قلت

الموضوع دا شامل وكامل وكل حاجه ممكن تحتاج تعرفها عن انواع الكلاب وتربيتها هتلاقيها هنا

http://www.nilemotors.net/Nile/101192-a.html

المشاركة الأصلية كتبت بواسطة moustafa_ertu

والله الكلام ده جميل وشيق وممتع جدا
بس برده انا كده توهت منكم

انا مبقتش عارف ايه النوع المناسب اللى ينفع معايا
انا عايز كلب كويس عشان البيت فى اطفال صغار من سنه الى 3 سنوات
وفى نفس الوقت برده يكون قوى وذكى والذكاء مطلوب اكيد عشان الاطفال ( لا ياكلهم ولا حاجه )
ممكن ادربه فى اماكن مختصه طاعه وشراسه.

ومهم برده الصوت عايزه قاتل محترف وصامت عشان الجيران بتشتكى من الصوت وطبعا معاهم حق
ايه بقه المناسب
ودى الاولويه

غير مزعج
ذكى
مطيع
شرس

واسف للاطاله

طبعا الاخ الفاضل الاستاذ عمرو مقدرش اضيف علية اى كلمة قال الخلاصة بمعنى اصح
بس انا عايز احط حضرتك فى الصورة لية الاختيار الامثل هيبقى جيرمن شيبرد
اولا حضرتك من كلامك مبتدىء واى حد مبتدىء ينصح بالجيرمن لانة اسهل فى التربية والتدريب
ثانيا حضرتك هتحطة فى البيت يبقى عايز كلب عائلى والجيرمن عائلى من الدرجة الاولى
ثالثا فى اطفال يبقى حضرتك مش عايز كلب غشيم يبقى فى انواع بنستبعدها وبنختار من المجموعة المتبقية الجيرمن لانة حنون جدا
بس على فكرة اى كلب لو جبتة جرو وربيتة مفيش خوف بس اى نوع تانى هيبقى محتاج الخبرة وحضرتك مبتدىء
رابعا موضوع الذكاء الجيرمن شيبرد ذكى جدا ودة بيعتمد على التقليب كل ما كان التقليب كويس كل ماكان الذكاء اعلى لان الجيرمن كل ماكانت جمجمتة ضخمة كل ما كان ذكاؤة اعلى
نيجى لموضوع عدم الازعاج الجيرمن شيبرد اكثر نباحا من كلاب تانية ولكن مع التدريب هيقل النباح وكمان لو التدريب كويس هيبقى بالامر يعنى حضرتك تديلة امر النباح ينبح
اما مايخص الطاعة والشراسة الحاجتين دول بايد حضرتك لانة هيتدرب طاعة وشراسة ومفيش كلب يتولد شرس بس بتبقى عندة الميول والتدريب بينميها
وطبعا استاذ عمرو وضح لحضرتك ان فى شولاين وورك لاين
انا كمان شايف ان الورك لاين افضل لان حضرتك تقريبا مش هتاجر ولا هتدخل الكلب مسابقات
انا حاولت اعطى لحضرتك خلفية سريعة عن الجيرمن بس انصح حضرتك بانك تقرأ كتير عن تربية الكلاب
واسف على الاطالة
واى استفسار انا تحت امر حضرتك
والله اعلى واعلم فيما قلت